Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Fiawo 19:1-21

EMENYAWO ƑE TOTOƉEME

  • Eliya si le Izebel nu (1-8)

  • Yehowa ɖe eɖokui fia Eliya le Horeb (9-14)

  • Eliya si ami na Hazael, Yehu kple Elisa (15-18)

  • Woɖo Elisa be wòaxɔ ɖe Eliya teƒe (19-21)

19  Ahab+ va gblɔ nu siwo katã Eliya wɔ kple ale si wòwu nyagblɔɖilawo katã+ kple yi la na Izebel.+  Eye Izebel dɔ ame ɖo ɖe Eliya be: “Mawuwo nefiam ne woagafiam ɖe edzi, ne nyemewɔ wò* etsɔ ɣealewoɣi abe wo dometɔ ɖeka ene o fĩ!”  Ale vɔvɔ̃ ɖo Eliya, eya ta esi dzo be yeaɖe yeƒe agbe.*+ Esi yi Beer-Seba,+ si le Yuda,+ ke egblẽ eƒe subɔvi la ɖe afi ma.  Eye wòzɔ ŋkeke ɖeka ƒe mɔ yi gbedzi, eye wòva bɔbɔ nɔ ati dodoe aɖe te. Eye wòbia be yeaku* hegblɔ be: “Esɔ gbɔ! Oo Yehowa, ɖe nye agbe* ɖa azɔ,+ elabena nyemenyo wu tɔgbuinyewo o.”  Eye wòmlɔ anyi dɔ alɔ̃ ɖe atia te. Kasia, mawudɔla aɖe va ka asi eŋu+ hegblɔ nɛ be: “Fɔ nàɖu nu.”+  Esi wòfɔ kɔ dzi la, ekpɔ abolo nogoe le kpe xɔdzowo dzi eye tsize aɖe le eƒe tade. Eye wòɖu nu no nu; emegbe wògamlɔ anyi.  Yehowa ƒe dɔla la gava zi evelia heka asi eŋu gblɔ be: “Fɔ nàɖu nu, elabena mɔ la ate ɖeɖi ŋuwò.”  Ale wòfɔ, eye wòɖu nu no nu, eye nuɖuɖu sia do ŋusẽe wòzɔ ŋkeke blaene kple zã blaene heva ɖo keke Mawu vavã la ƒe to Horeb gbɔ ke.+  Eyi agado+ aɖe me le afi ma be yeatsi adɔ; eye kpɔ ɖa, Yehowa ƒe gbe va nɛ be: “Eliya, nu ka wɔm nèle le afi sia?” 10  Eɖo eŋu be: “Meʋã ŋu ɖe Yehowa, aʋakɔwo ƒe Mawu nu vevie;+ elabena Israel-viwo gblẽ wò nubabla la ɖi,+ wogbã wò vɔsamlekpuiwo, eye wowu wò nyagblɔɖilawo+ kple yi ale be nye ɖeka koe kpɔtɔ. Azɔ wole nye agbe* dim be yewoaɖe ɖa.”+ 11  Ke egblɔ be: “Do go, ne nàtsi tsitre ɖe to la dzi le Yehowa ŋkume.” Eye kpɔ ɖa, Yehowa tso eme va yina,+ eye ya ʋuduʋudu aɖe le towo fem hele agakpewo gbãm le Yehowa ŋgɔ,+ ke Yehowa mele ya la me o. Le ya la yome la, anyigba ʋuʋu, ke Yehowa mele anyigbaʋuʋu+ la me o. 12  Le anyigbaʋuʋua yome la, dzobibi va,+ ke Yehowa mele dzo la me o. Eye le dzo la yome la, gbe bɔbɔe aɖe ɖi blewu.+ 13  Esi Eliya nya see ko la, ehe nyagblɔɖila ƒe awu si wòdo la tsyɔ mo,+ eye wòyi ɖatsi tsitre ɖe agado la nu. Eye gbe aɖe biae be: “Eliya, nu ka wɔm nèle le afi sia?” 14  Eɖo eŋu be: “Meʋã ŋu ɖe Yehowa, aʋakɔwo ƒe Mawu nu vevie; elabena Israel-viwo gblẽ wò nubabla la ɖi,+ wogbã wò vɔsamlekpuiwo, eye wowu wò nyagblɔɖilawo kple yi, ale be nye ɖeka koe kpɔtɔ. Azɔ wole nye agbe* dim be yewoaɖe ɖa.”+ 15  Eye Yehowa gblɔ nɛ be: “Dze mɔ nàgbugbɔ ayi Damasko gbedzi. Ne èɖo la, nàsi ami na Hazael+ wòazu fia ɖe Siria dzi. 16  Eye nàsi ami na Yehu,+ Nimsi tɔgbuiyɔvi, wòazu fia ɖe Israel dzi; eye nàsi ami na Elisa, Safat vi, tso Abel-Mehola, ne wòazu nyagblɔɖila ɖe tewòƒe.+ 17  Ame si asi le Hazael ƒe yi nu la,+ Yehu awui,+ eye ame si asi le Yehu ƒe yi nu la, Elisa awui.+ 18  Ke hã, mesusɔ ame akpe adre ɖe Israel,+ ame siwo katã medze klo na Baal o,+ eye womegbugbɔ nu nɛ o.”+ 19  Ale wòdzo le afi ma, eye wòkpɔ Elisa, Safat vi la, esime wòtsɔ nyi eveve teƒe wuieve le agble ŋlɔm le eŋgɔ, eye eya ŋutɔ le eve mamlɛawo ŋu. Eye Eliya yi egbɔ heda nyagblɔɖila+ ƒe awu la ɖo ɖee. 20  Eye Elisa gblẽ nyiawo ɖi ƒu du kplɔ Eliya ɖo gblɔ be: “Meɖe kuku, na magbugbɔ nu na fofonye kple danye. Emegbe madze yowòme.” Eye wògblɔ nɛ be: “Yi nàgbɔ; Nyemexe mɔ na wò o ɖe!” 21  Eye wòtrɔ le eyome ɖalé nyitsu eve, eye wòtsɔ wo sa vɔe hetsɔ nyiawo ƒe kɔkutiawo wɔ nake tsɔ ɖa lã lae, eye wòtsɔe na ameawo woɖu. Emegbe etso dze Eliya yome va nɔ esubɔm.+

Etenuŋɔŋlɔ

Alo, “wò luʋɔ.”
Alo, “luʋɔ.”
Alo, “yeƒe luʋɔ naku.”
Alo, “luʋɔ.”
Alo, “luʋɔ.”
Alo, “luʋɔ.”