Dzo kpo yi emenuwo dzi

Dzo kpo yi emenuawo dzi

1 Fiawo 16:1-34

EMENYAWO ƑE TOTOƉEME

  • Yehowa drɔ̃ ʋɔnu Baasa (1-7)

  • Israel-fia Ela (8-14)

  • Israel-fia Zimri (15-20)

  • Israel-fia Omri (21-28)

  • Israel-fia Ahab (29-33)

  • Hiel gbugbɔ Yeriko du la tso (34)

16  Eye Yehowa ƒe gbe va na Yehu,+ Hanani vi+ ɖe Baasa ŋu be:  “Mekɔ wò ɖe dzi tso ke me hetsɔ wò ɖo kplɔla ɖe nye dukɔ Israel nu,+ ke nèto Yeroboam ƒe ʋe me, eye nèna nye dukɔ Israel wɔ nu vɔ̃, ale be wotsɔ woƒe nu vɔ̃wo do dziku nam.+  Eya ta makplɔ Baasa kple eƒe aƒe la ɖa ƒiaƒiaƒia, eye mawɔ eƒe aƒe la abe Yeroboam,+ Nebat vi ƒe aƒe ene.  Baasa ƒe ame si aku ɖe du me la, avuwo aɖui; eye eƒe ame si aku ɖe gbe me la, dziƒoxewo aɖui.”  Ke Baasa ŋutinya susɔeawo, nu siwo wòwɔ kpakple eƒe kalẽwɔwɔwo la, woŋlɔ wo ɖe Israel-fiawo ƒe ŋutinyagbalẽ me.  Eye wotsɔ Baasa mlɔ tɔgbuiawo gbɔ, woɖii ɖe Tirza;+ eye via Ela zu fia ɖe eteƒe.  Nyagblɔɖila Yehu, Hanani vi, dzi kee Yehowa ƒe nya to va ɖe Baasa kple eƒe aƒe la ŋu, le nu vɔ̃ɖi siwo katã wòwɔ le Yehowa ŋkume, esi wòtsɔ eƒe asinudɔwɔwɔ do dziku nɛ, ne eƒe aƒe nazu abe Yeroboam ƒe aƒe la ene, kple esi wòwu Nadab* ta.+  Le Yuda-fia Asa ƒe ƒe blaeve vɔ adelia me la, Ela, Baasa vi, ɖu fia ɖe Israel dzi ƒe eve le Tirza.  Eƒe dɔla Zimri, ame si nye tasiaɖamwo ƒe afã ƒe amegã, ɖo nugbe ɖe eŋu, esime wòle Tirza heno aha mu le Arza si nye aƒedzikpɔla le Tirza la ƒe aƒe me. 10  Eye Zimri va da nui ƒu anyi+ hewui le Yuda-fia Asa ƒe ƒe blaeve vɔ adrelia me, eye wòzu fia ɖe eteƒe. 11  Esi wòzu fia hebɔbɔ nɔ eƒe fiazikpui dzi teti ko la, etsrɔ̃ Baasa ƒe aƒe blibo la katã. Mekpɔtɔ ŋutsu,* eɖanye eƒe ƒometɔ* loo alo exɔlɔ̃wo o dometɔ aɖeke ɖi o. 12  Ale Zimri tsrɔ̃ Baasa ƒe aƒe blibo la ɖikaa, le Yehowa ƒe nya si wògblɔ ɖe Baasa ŋu to nyagblɔɖila Yehu dzi la nu.+ 13  Esia dzɔ le Baasa kple via Ela ƒe nu vɔ̃ siwo katã wowɔ, kple nu vɔ̃ siwo wona Israel wɔ, be wotsɔ woƒe legba maɖinuwo do dziku na Yehowa, Israel ƒe Mawu la ta.+ 14  Ke Ela ŋutinya susɔeawo kple nu siwo katã wòwɔ la, woŋlɔ wo ɖe Israel-fiawo ƒe ŋutinyagbalẽ me. 15  Le Yuda-fia Asa ƒe ƒe blaeve vɔ adrelia me la, Zimri zu fia, eye wòɖu dzi le Tirza ŋkeke adre, esime aʋakɔ la ƒu asaɖa anyi ɖe Filistitɔwo ƒe Gibeton+ ŋu. 16  Aʋakɔ la se le asaɖa la me be: “Zimri ɖo nugbe ɖe fia la ŋu hewui.” Eya ta Israel ƒe aʋakɔ blibo la tsɔ aʋafia Omri+ ɖo fiae ɖe Israel dzi gbe ma gbe le asaɖa la me. 17  Omri kple Israel ƒe aʋakɔ blibo si le eŋu la dzo le Gibeton, eye woyi ɖaɖe to ɖe Tirza. 18  Esi Zimri kpɔ be woxɔ dua ko la, eva fia ƒe aƒe* la ƒe mɔ́ sesẽ la me, eye wòtɔ dzo fia ƒe aƒe la ɖe eɖokui dzi, eye wòku.+ 19  Esia dzɔ le eƒe nu vɔ̃ siwo wòwɔ, esi wòwɔ nu si nye vɔ̃ le Yehowa ŋkume heto Yeroboam ƒe ʋe me, eye wòkplɔ Israel de nu vɔ̃ me la ta.+ 20  Ke Zimri ŋutinya susɔeawo kple nugbe si wòɖo la, woŋlɔ wo ɖe Israel-fiawo ƒe ŋutinyagbalẽ me. 21  Ɣemaɣie Israel dukɔ la ma ɖe akpa eve me. Dukɔ la ƒe akpa ɖeka dze Tibni, Ginat vi yome be yewoaɖoe fia, eye akpa evelia dze Omri yome. 22  Mlɔeba ame siwo dze Omri yome la ɖu ame siwo dze Tibni, Ginat vi yome la dzi. Tibni ku ɣemaɣi, eye Omri zu fia. 23  Le Yuda-fia Asa ƒe ƒe blaetɔ̃ vɔ ɖekɛlia me la, Omri zu fia heɖu Israel dzi ƒe wuieve. Eɖu fia le Tirza ƒe ade. 24  Eƒle Samaria-to la le Semer si klosalo talento* eve, eye wòtso du ɖe to la dzi. Ena ŋkɔ du la be Samaria,*+ ɖe Semer ame si tɔ to la nye tsã ƒe ŋkɔ nu. 25  Omri yi edzi wɔ nu si nye vɔ̃ le Yehowa ŋkume, eye wòwɔ nu vɔ̃ɖi wu ame siwo katã do ŋgɔ nɛ.+ 26  Eto Yeroboam, Nebat vi ƒe ʋe me pɛpɛpɛ, eye wòzɔ le eƒe nu vɔ̃ siwo wòtsɔ he Israel de nu vɔ̃ me be wotsɔ woƒe legba maɖinuwo do dziku na Yehowa, Israel ƒe Mawu, la nu.+ 27  Ke Omri ŋutinya susɔeawo kple nu siwo wòwɔ kpakple eƒe kalẽwɔwɔwo la, woŋlɔ wo ɖe Israel-fiawo ƒe ŋutinyagbalẽ me. 28  Eye wotsɔ Omri mlɔ tɔgbuiawo gbɔ, woɖii ɖe Samaria; eye via Ahab+ zu fia ɖe eteƒe. 29  Ke Ahab, Omri vi zu fia ɖe Israel dzi le Yuda-fia Asa ƒe ƒe blaetɔ̃ vɔ enyilia me; eye Ahab, Omri vi ɖu fia ɖe Israel dzi le Samaria+ ƒe blaeve vɔ eve. 30  Ahab, Omri vi wɔ nu si nye vɔ̃ le Yehowa ŋkume wu ame siwo katã do ŋgɔ nɛ.+ 31  Esi Yeroboam,+ Nebat vi la ƒe nu vɔ̃ siwo katã eya hã wɔ la meɖi naneke nɛ o ta la, eɖe Sidon-fia+ Etbaal vinyɔnu Izebel+ hã, eye wòyi ɖasubɔ Baal+ hede ta agu nɛ. 32  Azɔ hã, eɖi vɔsamlekpui na Baal ɖe Baal+ ƒe xɔ* si wòtu ɖe Samaria la me. 33  Ahab wɔ Asera*+ hã. Eye Ahab wɔ nu geɖe tsɔ do dziku na Yehowa, Israel ƒe Mawu la, wu Israel-fia siwo katã do ŋgɔ nɛ. 34  Le eƒe ŋkekeawo me la, Beteltɔ Hiel gbugbɔ tso Yeriko du la. Esi wòɖo egɔme anyi la, eƒe ŋgɔgbevi Abiram ku, eye esi wòde agbo enu la, eƒe dɔmlɔea Segub hã ku, le Yehowa ƒe nya si wògblɔ to Yosua, Nun vi, dzi la nu.+

Etenuŋɔŋlɔ

Efia, Nadab Yeroboam vi.
Egɔmeɖeɖe tẽe, “ame siwo ɖɔa aɖuɖɔ ɖe gli ŋu.” Enye Hebrigbe me nya si wozãna tsɔ ɖia gbɔ ŋutsuwo.
Alo, “ame siwo abia hlɔ̃ ɖe eta.”
Alo, “fiasã.”
Talento ɖeka le kilogram 34.2. Kpɔ Megbenyawo B14.
Egɔmee nye, “Semer Ƒe Hlɔ̃ La Tɔ.”
Alo, “trɔ̃xɔ.”