1 Tesalonikatɔwo 4:1-18

  • Nuxɔxlɔ̃ le gbɔdɔdɔ manɔsenu ŋu (1-8)

  • Milɔ̃ mia nɔewo geɖe wu (9-12)

    • “Miakpɔ miawo ŋutɔwo miaƒe nyawo gbɔ” (11)

  • Ame siwo ku le Kristo me la atsi tsitre gbã (13-18)

4  Mlɔeba la, nɔviwo, abe ale si ko miexɔ mɔfiame tso mía gbɔ le ale si wòdze be miazɔ ne miadze Mawu ŋu+ abe ale si ko miele zɔzɔm hã ene la, míele kuku ɖem na mi hele nu xlɔ̃m mi to Aƒetɔ Yesu dzi be miayi edzi awɔe geɖe wu.  Elabena mienya mɔfiame siwo míena mi to Aƒetɔ Yesu dzi la.  Elabena esiae nye Mawu ƒe lɔlɔ̃nu be, mianye ame siwo ŋu kɔ,+ eye miatsri gbɔdɔdɔ manɔsenu.*+  Mia dometɔ ɖe sia ɖe nanya ale si wòaɖu eya ŋutɔ ƒe ŋutilã dzi+ le kɔkɔenyenye+ kple bubu me,  menye le gbɔdɔdɔ ƒe dzodzro ƒe fieŋufieŋu me,+ abe ale si dukɔ siwo menya Mawu o la wɔna ene o.+  Ame aɖeke nagagblẽ nu le nɔvia ŋu alo axɔ eƒe gomewo le esi le nya sia me o, elabena Yehowa* hea to na ame le nu siawo katã ŋuti, abe ale si míegblɔe na mi xoxo hexlɔ̃ nu mi vevie ene.  Elabena Mawu meyɔ mí na makɔmakɔnyenye o, ke na kɔkɔenyenye boŋ.+  Eya ta ame si doa vlo esia la, menye amegbetɔe wòdoa vloe o, ke Mawu,+ ame si naa eƒe gbɔgbɔ kɔkɔe mi la boŋ.+  Ke le nɔvilɔlɔ̃+ ŋuti la, mehiã mi be míaŋlɔ naneke na mi tso eŋu o, elabena Mawu fia miawo ŋutɔwo be mialɔ̃ mia nɔewo.+ 10  Le nyateƒe me la, miele ewɔm hã na nɔvi siwo katã le Makedonia blibo la. Ke míele nu xlɔ̃m mi, nɔviwo, be miayi edzi awɔe geɖe wu. 11  Miɖoe miaƒe taɖodzinu be yewoanɔ anyi kpoo,+ eye miakpɔ miawo ŋutɔwo miaƒe nyawo gbɔ+ eye miatsɔ miaƒe asiwo awɔ dɔ,+ abe ale si míefia mi ene, 12  ale be miazɔ ale si dze le ame siwo le egodo la ŋkume,+ eye naneke nagahiã mi o. 13  Azɔ hã, nɔviwo, míedi be ame siwo le alɔ̃ dɔm le ku me+ la ŋu nya nanɔ manyamanya na mi o; ale be miagaxa nu abe ame siwo si mɔkpɔkpɔ aɖeke mele o la ene o.+ 14  Ne míexɔe se be Yesu ku, eye wògafɔ vavã la,+ ekema Mawu akplɔ ame siwo dɔ alɔ̃ le ku me le Yesu me la ayi kpakplii.+ 15  Elabena nya si gblɔm míele na mi to Yehowa* ƒe nya la dzie nye be, mí ame siwo le agbe yi ɖase Aƒetɔ la ƒe anyinɔɣi la, míado ŋgɔ na ame siwo dɔ alɔ̃ le ku me la le mɔ aɖeke nu o; 16  elabena Aƒetɔ la ŋutɔ atsɔ gbeɖeɖe sesẽ kple mawudɔla gãtɔ+ ƒe gbe kpakple Mawu ƒe kpẽ ƒe ɖiɖi aɖi tso dziƒo, eye ame siwo ku le Kristo me la atsi tsitre gbã.+ 17  Emegbe la, woakɔ mí ame susɔe siwo le agbe la le alilikpowo me+ ayi aɖakpe Aƒetɔ+ la le yame ahawɔ ɖeka kpli wo; eye ale míanɔ Aƒetɔ la gbɔ ɖaa.+ 18  Eya ta miyi edzi miatsɔ nya siawo anɔ akɔ fam na mia nɔewo.

Etenuŋɔŋlɔ

Helagbe, pornia. Kpɔ Nya Tɔxɛwo Gɔmeɖeƒea.