Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

1 Tesalonikatɔwo 1:1-10

EMENYAWO ƑE TOTOƉEME

  • Gbedonamewo (1)

  • Akpedada ɖe Tesalonikatɔwo ƒe xɔse ta (2-10)

1  Paulo, Silvano*+ kple Timoteo+ le esia ŋlɔm na hame si le Tesalonika, si wɔ ɖeka kple Mawu Fofo la kple Aƒetɔ Yesu Kristo: Amenuveve kple ŋutifafa woana mi.  Míeɖoa ŋku mi katã mia dzi le míaƒe gbedodoɖawo me hedaa akpe na Mawu ɣesiaɣi,+  elabena míeɖoa ŋku miaƒe xɔsedɔwo kple dɔ siwo miewɔna le lɔlɔ̃ me kpakple miaƒe dzidodo le mɔkpɔkpɔ+ si le mia si le Aƒetɔ Yesu Kristo me la dzi ɣesiaɣi le mía Mawu kple Fofo la ŋkume.  Nɔviwo, mi ame siwo Mawu lɔ̃, míenya be Mawue tia mi,  elabena nya nyui si míeɖe gbeƒãe la, menye nya si míegblɔ kple nu ko wònye o, ke míegblɔe le ŋusẽ kple gbɔgbɔ kɔkɔe kpakple kakaɖedzi sẽŋu hã me, abe ale si ko mienya ame siwo ƒomevi míeva zu le mia dome le mia ta la ene.  Ale miezu míawo kple Aƒetɔ la srɔ̃lawo,+ esi mietsɔ dzidzɔ si gbɔgbɔ kɔkɔea nana la xɔ nya la le yometiti geɖewo me,+  eye mieva zu kpɔɖeŋu na xɔsetɔ siwo katã le Makedonia kple Akaya.  Nyateƒee wònye be menye ɖeko Yehowa* ƒe nya la ɖi hoo tso mia gbɔ yi Makedonia kple Akaya o, ke ale si miexɔ Mawu dzi se la ŋu nya hã kaka ɖo afi sia afi,+ ale be mehiã be míagagblɔ nya aɖeke o.  Elabena woawo ŋutɔwo yi edzi le nu ƒom tso ale si míeva mia gbɔ zi gbãtɔ, kple ale si mietrɔ le miaƒe trɔ̃wo+ yome heva Mawu gbɔ, be miasubɔ Mawu gbagbe vavã la ŋuti, 10  eye mialala Via tso dziƒowo,+ ame si wòfɔ ɖe tsitre tso ame kukuwo dome, si nye Yesu, ame si ɖe mí tso dziku si gbɔna la me.+

Etenuŋɔŋlɔ

Wogayɔnɛ be Sila.