1 Korintotɔwo 4:1-21

  • Ele be aƒedzikpɔlawo nanye nuteƒewɔlawo (1-5)

  • Kristotɔ subɔlawo ƒe ɖokuibɔbɔ (6-13)

    • ‘Migagbɔ nu siwo woŋlɔ ɖi la ŋu o’ (6)

    • Kristotɔwo zu nukpɔkpɔ le fefewɔƒe (9)

  • Paulo tsɔ ɖe le eme na eƒe gbɔgbɔmeviwo (14-21)

4  Eya ta mina amewo nabu mí abe Kristo ƒe dɔtsɔlawo* kple aƒedzikpɔla siwo Mawu tsɔ eƒe nya ɣaɣla kɔkɔewo+ de asi na la ene.  Esia ta nu si wodi tso aƒedzikpɔlawo sie nye be woanye nuteƒewɔlawo.  Nye la, meɖe fu nam be miawo alo amegbetɔ bubuwo naɖi ʋɔnu adzro nye nya me o. Le nyateƒe me la, nye ŋutɔ nyemedrɔ̃a ʋɔnu ɖokuinye gɔ̃ hã o.  Elabena nye dzitsinya mebua fɔm le naneke ta o. Gake nyemele gbɔgblɔm be mele dzɔdzɔe o; ame si dzroa menye kpɔ lae nye Yehowa.*+  Eya ta migadrɔ̃ ʋɔnu+ le naneke ŋu hafi ɣeyiɣi la nade o, va se ɖe esime Aƒetɔ la nava. Eyae ahe vivitimenu ɣaɣlawo ava kekeli nu, eye wòana dzimesusuwo nadze ƒãa, eye ame sia ame akpɔ eƒe kafukafu tso Mawu gbɔ.+  Ke nɔviwo, metsɔ nye kple Apolo+ wɔ esia ƒe kpɔɖeŋu na mi le miaƒe nyonyo ta, ale be miasrɔ̃ esia le mía gbɔ be: “Migagbɔ nu siwo woŋlɔ ɖi la ŋu o,” ne miagado mia ɖokui ɖe dzi+ ahabu ame aɖe be enye gã wu ame bubu o.  Elabena ame kae na nèto vovo tso ame bubu gbɔ? Eye nu kae le asiwò, si menye ɖe nèxɔe o?+ Ke ne ɖe nèxɔe la, ekema nu ka tae nèle adegbe ƒom abe menye ɖe nèxɔe o ene?  Ðe mieɖi ƒo xoxoa? Ðe mienye kesinɔtɔwo xoxoa? Ðe miedze fiaɖuɖu+ gɔme xoxo míawo manɔmeea? Ɛ̃, ɖe madi vevie be miadze fiaɖuɖu gɔme, ale be míawo hã míaɖu fia kpli mi hafi.+  Elabena ewɔna nam abe ɖe Mawu tsɔ mí apostoloawo da ɖi abe ame mlɔetɔ siwo woɖe ɖe go hetso kufia na ene,+ elabena míezu abe nukpɔkpɔ le fefewɔƒe ene na xexea,+ na mawudɔlawo kple amegbetɔwo siaa. 10  Míenye bometsilawo+ le Kristo ta, ke miawo mienye aɖaŋudzelawo le Kristo me; míegbɔdzɔ, ke miawo miesẽ ŋu; wode bubu mia ŋu, ke míawo ya bubu mele mía ŋu o. 11  Va se ɖe gaƒoƒo sia tututu dzi la, dɔ+ kple tsikɔ+ le mía wum, míekpɔ awu ado o,* woƒoa mí,*+ aƒe hã mele mía si o, 12  eye míekua kutri tsɔa míaƒe asiwo wɔa dɔ.+ Ne wodzu mí la, míeyrana;+ ne woti mía yome la, míedoa dzi tsɔnɛ;+ 13  ne wogblẽ mía ŋu la, míeɖea mía ɖokui nu tufafatɔe;*+ eye va se ɖe fifia la, wobua mí abe xexea ƒe aɖukpodzinuwo kple gbeɖuɖɔwo katã ƒomevi ene. 14  Menye ɖe mele nya siawo ŋlɔm be matsɔ ado ŋukpe mi o, ke boŋ be maxlɔ̃ nu mi abe vinye lɔlɔ̃awo ene. 15  Elabena ne ame akpe ewo ye le mia dzi kpɔm abe viwo le Kristo me ene hã la, fofo geɖewo ya mele mia si o; elabena mezu mia fofo le Kristo Yesu me to nya nyui la dzi.+ 16  Eya ta mele kuku ɖem na mi be, mizu srɔ̃nyelawo.+ 17  Esia tae mele Timoteo dɔm ɖe mia gbɔ, elabena enye vinye lɔlɔ̃a kple nuteƒewɔla le Aƒetɔ la me. Aɖo ŋku mɔnu siwo mezãna le Kristo Yesu me,+ abe ale si mele nu fiam le hame ɖe sia ɖe me le afi sia afi ene la, dzi na mi. 18  Ame aɖewo doa wo ɖokuiwo ɖe dzi abe ɖe nyemegale mia gbɔ va ge o ene. 19  Gake ne Yehowa* lɔ̃ la, mava mia gbɔ kpuie, eye menye be mase ame siwo le wo ɖokuiwo dom ɖe dzi la ƒe nyawo o, ke boŋ be manya ŋusẽ si le wo si. 20  Elabena Mawu Fiaɖuƒe la mele nuƒoƒo me o, ke boŋ ŋusẽ mee wòle. 21  Kae adze mia ŋu wu? Matsɔ ati ava mia gbɔ loo+ alo mava kple lɔlɔ̃ kpakple gbɔgbɔ fatua?

Etenuŋɔŋlɔ

Alo, “abe ame siwo bɔbɔ ɖe Kristo te.”
Egɔmeɖeɖe tẽe, “míele amama.”
Alo, “wotua asi mí.”
Alo, “míeɖea kuku.”