Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ʋɔnudrɔ̃lawo 6:1-40

EMENYAWO ƑE TOTOƉEME

  • Midian te Israel ɖe anyi (1-10)

  • Mawudɔla aɖe na kakaɖedzi ʋɔnudrɔ̃la Gideon be yeakpe ɖe eŋu (11-24)

  • Gideon gbã Baal ƒe vɔsamlekpui (25-32)

  • Mawu ƒe gbɔgbɔ va Gideon dzi (33-35)

  • Alẽgbalẽ ƒe dodokpɔ (36-40)

6  Ke Israel-viwo gawɔ nu si nye vɔ̃ le Yehowa ŋkume,+ eya ta Yehowa tsɔ wo de asi na Midian ƒe adre.+  Midian ƒe asi kpe Israel dzi.+ Eye le Midian ta Israel-viwo wɔ bebeƒewo* na wo ɖokuiwo ɖe towo dzi, ɖe agadowo me kple teƒe siwo yiyi sesẽ.+  Ne Israel ƒã nu la, Midian, Amalek+ kple Ɣedzeƒetɔwo+ va dzea wo dzi.  Wova ƒua asaɖa anyi ɖe wo ŋu, eye wogblẽa anyigba la dzi nukuwo dome va se ɖe Gaza ke, eye womegblẽa nuɖuɖu, alẽ, nyi alo tedzi aɖeke ɖi na Israel o.+  Elabena ɖe wova dona bibibi kple woƒe lãhawo kpakple woƒe agbadɔwo abe ʋetsuviwo ene,+ eye woawo ŋutɔwo kple woƒe kposɔwo mele xexlẽme o,+ ɖe wovaa anyigba la dzi be yewoagblẽe.  Ale Israel va da ahe kolikoli le Midian ta; eye Israel-viwo yɔ Yehowa be wòaxɔ na yewo.+  Esi Israel-viwo yɔ Yehowa be wòaxɔ na yewo le Midian ta la,+  Yehowa dɔ nyagblɔɖila aɖe ɖo ɖe Israel-viwo wòva gblɔ na wo be: “Ale Yehowa, Israel ƒe Mawu la, gblɔe nye esi, ‘Mekplɔ mi dzoe le Egipte, eye meɖe mi tso kluvinyenyeƒe me.+  Ale meɖe mi tso Egipte kple ame siwo katã tea mi ɖe anyi la si me, eye menya miaƒe futɔwo ɖa le mia ŋgɔ hetsɔ woƒe anyigba na mi.+ 10  Eye megblɔ na mi hã be: “Nyee nye Yehowa mia Mawu.+ Migavɔ̃ Amoritɔ siwo ƒe anyigba dzi miele la ƒe mawuwo o.”+ Ke mieɖo tom o.’”*+ 11  Emegbe Yehowa ƒe dɔla va+ bɔbɔ nɔ ati gã si le Ofra, si nye Yoas, Abi-Ezer+ vi tɔ la te. Via Gideon+ nɔ lu ƒom le wainfiãƒe be Midiantɔwo nagakpɔe o. 12  Yehowa ƒe dɔlaa ɖe eɖokui fiae gblɔ be: “Yehowa li kpli wò,+ wò aʋakalẽtɔ.” 13  Ke Gideon gblɔ nɛ be: “Meɖe kuku, nye aƒetɔ, ne Yehowa li kpli mí ɖe, nu ka tae nu siawo katã dzɔ ɖe mía dzi ɖo?+ Eye afi kae eƒe nukudɔ siwo ŋu mía fofowo ƒo nu le na mí+ hegblɔ be, ‘Ðe Yehowa meɖe mí tso Egipte oa?’+ la le? Azɔ Yehowa gblẽ mí ɖi,+ eye wòtsɔ mí de asi na Midian.” 14  Yehowa* dze ŋgɔe hegblɔ be: “Yi le ŋusẽ si le asiwò la me, eye àɖe Israel tso Midian si me.+ Alo menye nyee dɔ wò oa?” 15  Gake Gideon ɖo eŋu nɛ be: “Meɖe kuku, Yehowa. Aleke mawɔ aɖe Israel? Kpɔ ɖa! Hlɔ̃* si me metso ye nye suetɔ le Manase, eye nyee nye ame tsɛtɔ kekeake le fofonye ƒe me.” 16  Ke Yehowa gblɔ nɛ be: “Manɔ kpli wò,+ eye àsi Midiantɔwo abe ame ɖekae wonye ene.” 17  Eye wògblɔ nɛ be: “Ne ève nunye la, ekema ɖe dzesi aɖe fiam, ne manya be wòe le nu ƒom kplim. 18  Meɖe kuku, mègadzo le afi sia o, va se ɖe esime matrɔ ava gbɔwò atsɔ nye nunana aɖo akɔwòme.”+ Eɖo eŋu nɛ be: “Manɔ afi sia va se ɖe esime nàtrɔ agbɔ.” 19  Eye Gideon yi ɖawu gbɔ̃vi ɖeka, eye wòtsɔ wɔ efa* ɖeka mè amɔwɔ maʋamaʋã boloe.+ Efɔ lã la de kusi me, eye wòku detsi la ɖe nuɖaze me tsɔ yi nɛ le ati gã la te, eye wòtsɔe ɖo ekɔme. 20  Eye Mawu vavã la ƒe dɔla gblɔ nɛ be: “Tsɔ lã la kple amɔwɔ maʋamaʋã bolo la da ɖe kpe gã ma dzi, eye nàtrɔ detsia kɔ ɖi.” Eye wòwɔe nenema. 21  Eye Yehowa ƒe dɔla tsɔ atikplɔ si le esi la ƒe nugbɔ tɔ lã la kple amɔwɔ maʋamaʋã boloa, eye dzo do tso agakpe la me fiã lã la kple amɔwɔ maʋamaʋã bolo la.+ Eye Yehowa ƒe dɔlaa bu vĩi le eŋkume. 22  Gideon kpɔe azɔ be Yehowa ƒe dɔlae.+ Enumake Gideon do ɣli be: “Aléle, Aƒetɔ Dziɖulagã Yehowa, elabena mekpɔ Yehowa ƒe dɔla ŋkume kple ŋkume!”+ 23  Ke Yehowa gblɔ nɛ be: “Ŋutifafa na wò. Mègavɔ̃ o;+ mèle kuku ge o.” 24  Eya ta Gideon ɖi vɔsamlekpui na Yehowa ɖe afi ma, eye woyɔa vɔsamlekpui la be Yehowa-Salom*+ va se ɖe egbe sia. Egakpɔtɔ le Abi-Ezertɔwo ƒe Ofra. 25  Le zã ma me la, Yehowa gblɔ nɛ be: “Lé fofowò ƒe nyitsui ɖeka, nàlé nyitsui evelia si xɔ ƒe adre, nàgbã Baal ƒe vɔsamlekpui si nye fofowò tɔ la, eye nàlã Asera-ti si le exa la ƒu anyi.+ 26  Eye nàɖo kpewo atsɔ aɖi vɔsamlekpui na Yehowa wò Mawu la ɖe mɔ́ sesẽ sia dzi, eye nàtsɔ nyitsui evelia asa numevɔ ɖe Asera-ti* si nàlã la ƒe nakeawo dzi.” 27  Ale Gideon ɖe eƒe subɔviwo dometɔ ewo, eye wòyi ɖawɔe abe ale si tututu Yehowa gblɔ nɛ ene. Ke evɔ̃ fofoa ƒemetɔwo kple dua me ŋutsuwo ale gbegbe be, mewɔe le ŋkeke me o, ke boŋ eyi ɖawɔe le zã me. 28  Esi dua me ŋutsuwo fɔ ŋdi kanya la, wokpɔ be wogbã Baal ƒe vɔsamlekpui la ƒu anyi, wolã Asera-ti* si le exa la hã, eye wotsɔ nyitsui evelia sa vɔe ɖe vɔsamlekpui si woɖi la dzi. 29  Wobia wo nɔewo be: “Ame kae wɔ nu sia?” Esi woku nyaa me la, wogblɔ be: “Gideon, Yoas vi lae wɔ nu sia.” 30  Eya ta dua me ŋutsuwo gblɔ na Yoas be: “Kplɔ viwò la do goe ne míawui, elabena egbã Baal ƒe vɔsamlekpui la ƒu anyi, eye wòlã Asera-ti* si le exa la hã.” 31  Eye Yoas+ gblɔ na ame siwo katã tsɔ nyaa tui la be: “Miawoe aʋli Baal taa? Miawoe axɔ nɛa? Ame sia ame si aʋli eta la, woawui ŋdi sia.+ Ne mawue wònye la, ekema neʋli eɖokui ta,+ le esi ame aɖe gbã eƒe vɔsamlekpui ƒu anyi ta.” 32  Eye wòna ŋkɔ Gideon gbe ma gbe be Yerubaal* hegblɔ be: “Baal neʋli eɖokui ta, le esi ame aɖe gbã eƒe vɔsamlekpui ƒu anyi ta.” 33  Eye Midiantɔwo,+ Amalektɔwo+ kple Ɣedzeƒetɔwo+ katã ƒo woƒe aʋawɔlawo nu ƒu; eye wotso tɔ la heva ƒu asaɖa anyi ɖe Yezreel Bali la me. 34  Yehowa ƒe gbɔgbɔ va Gideon dzi,+ eye wòku kpẽ,+ eye Abi-Ezer+ viwo ƒo ƒu dze eyome. 35  Edɔ amewo ɖo ɖe Manase blibo la katã, eye woawo hã ƒo ƒu dze eyome. Eye wòdɔ amewo ɖo ɖe Aser, Zebulon kple Naftali hã, eye wova do goe. 36  Eye Gideon gblɔ na Mawu vavã la be: “Ne dzinye to ge nàla aɖe Israel, abe ale si nèdo ŋugbee ene+ la, 37  ke makeke alẽgbalẽ ɖe nukuƒoƒe la. Ne zãmu dza ɖe alẽgbalẽa ɖeɖe ko dzi, gake anyigba si ƒo xlãe godoo la katã le ƒuƒuie la, ekema madze sii be dzinye to ge nàla aɖe Israel, abe ale si nèdo ŋugbee ene.” 38  Eva eme nenema tututu. Esi wòfɔ ŋdi kanya hefiã alẽgbalẽa la, zãmu si wòfiã le alẽgbalẽa me la yɔ nuɖugba gã aɖe. 39  Ke Gideon gblɔ na Mawu vavã la be: “Mègana wò dɔmedzoe nabi ɖe ŋunye o, ke boŋ ɖe mɔ nam magaƒo nu zi ɖeka pɛ ko. Meɖe kuku, na magatsɔ alẽgbalẽ la awɔ dodokpɔ ɖeka pɛ ko. Meɖe kuku, na alẽgbalẽa ɖeɖe ko nanɔ ƒuƒuie, ke zãmu naƒo anyigba la katã.” 40  Eye nenemae Mawu wɔ le zã ma me; alẽgbalẽ la ɖeɖe nɔ ƒuƒuie, ke zãmu ƒo anyigba la katã.

Etenuŋɔŋlɔ

Agate ŋu afia, “tomenudzraɖoƒewo.”
Egɔmeɖeɖe tẽe, “miese nye gbe o.”
Yehowa ƒe dɔlae wowɔnɛ.
Egɔmeɖeɖe tẽe, “Ame akpe.”
Efa ɖeka le lita 22. Kpɔ Megbenyawo B14.
Egɔmee nye, “Yehowa Nye Ŋutifafa.”
Egɔmee nye, “Baal Neʋli Eɖokui Ta Le Ʋɔnu.”