Ʋɔnudrɔ̃lawo 2:1-23

  • Nuxlɔ̃ame si tso Yehowa ƒe dɔla gbɔ (1-5)

  • Yosua ƒe ku (6-10)

  • Woɖo ʋɔnudrɔ̃lawo be woaxɔ na Israel (11-23)

2  Eye Yehowa ƒe dɔla+ tso Gilgal+ yi Bokim eye wògblɔ be: “Mekplɔ mi tso Egipte va anyigba si ŋu meka atam ɖo na mia tɔgbuiwo la dzi.+ Eye megblɔ hã be: ‘Nyematu nu, si mebla kpli mi la gbeɖe o.+  Migabla nu kple anyigba sia dzi nɔlawo o,+ eye migbã woƒe vɔsamlekpuiwo ƒu anyi.’+ Ke mieɖo to nye gbe o.+ Nu ka ŋuti miewɔ alea ɖo?  Eya ta nye hã megblɔ be: ‘Nyemanya wo ɖa le mia ŋgɔ o,+ woazu mɔ̃ na mi,+ eye woatsɔ woƒe mawuwo akplɔ mi atrae.’”+  Esi Yehowa ƒe dɔla la gblɔ nya siawo na Israel-viwo katã la, dukɔ la fa avi hoo.  Eya ta wona ŋkɔ teƒe la be Bokim,* eye wosa vɔ le afi ma na Yehowa.  Esi Yosua na dukɔa dzo la, Israel-viwo dometɔ ɖe sia ɖe yi anyigba si dome wònyi la dzi ne wòaxɔe.+  Eye dukɔ la yi edzi subɔ Yehowa le Yosua ƒe agbemeŋkekewo katã kple ame tsitsi siwo ganɔ agbe le Yosua ƒe ku megbe, siwo kpɔ dɔ gã siwo katã Yehowa wɔ na Israel teƒe la, ƒe agbenɔɣi katã.+  Eye Yehowa ƒe subɔla Yosua, Nun vi la, ku esi wòxɔ ƒe alafa ɖeka kple ewo.+  Eye woɖii ɖe anyigba si dome wònyi la dzi le Timna-Heres+ le Efrayim tonuto la me le Gaas To la ƒe dziehe gome.+ 10  Dzidzime ma katã ku eye wotsɔ wo kpe ɖe wo tɔgbuiwo ŋu,* eye dzidzime bubu va ɖe wo yome, ame siwo medze si Yehowa alo nya dɔ siwo wòwɔ na Israel la o. 11  Eya ta Israel-viwo wɔ nu si nye vɔ̃ le Yehowa ŋkume, eye wosubɔ Baalwo.+ 12  Ale wogblẽ Yehowa, wo fofowo ƒe Mawu, ame si kplɔ wo tso Egipte-nyigba dzi+ la ɖi. Wodze mawu bubuwo, siwo nye dukɔ siwo ƒo xlã wo godoo la ƒe mawuwo yome,+ eye wode ta agu na wo tsɔ do dziku na Yehowa.+ 13  Wogblẽ Yehowa ɖi hesubɔ Baal kple Astoret legbawo.+ 14  Yehowa ƒe dɔmedzoe bi ɖe Israel ŋu, ale be wòtsɔ wo de asi na adzohawo woda adzo wo.+ Etsɔ wo dzra na woƒe futɔ siwo ƒo xlã wo+ la, eye womegate ŋu nɔ te ɖe woƒe futɔwo nu o.+ 15  Afi sia afi si woyi la, Yehowa ƒe asi sẽna ɖe wo dzi, ale be vɔ̃ tua wo,+ abe ale si Yehowa gblɔ na wo kple ale si Yehowa ka atam na woe ene,+ eye woɖo xaxa me ŋutɔ.+ 16  Eya ta Yehowa ɖoa ʋɔnudrɔ̃lawo na wo, ame siwo ɖea wo tso adzohawo si me.+ 17  Gake wogbe toɖoɖo ʋɔnudrɔ̃lawo gɔ̃ hã, wowɔa ahasi kple mawu bubuwo, eye wodea ta agu na wo. Wotrɔ ɖa kaba tso mɔ si dzi wo tɔgbuiwo, ame siwo ɖo to Yehowa ƒe sededewo,+ zɔ la dzi. Womewɔ nu abe wo tɔgbuiwo ene o. 18  Ɣesiaɣi si Yehowa ɖo ʋɔnudrɔ̃la na wo+ la, Yehowa nɔa anyi kple ʋɔnudrɔ̃laa, eye wòɖea wo tso woƒe futɔwo si me le ʋɔnudrɔ̃la la ƒe ŋkekewo katã me; elabena ewɔa nublanui na*+ Yehowa ne ame siwo te wo ɖe anyi+ kple ame siwo sẽ ŋuta le wo ŋu na wole hũ ɖem. 19  Ke ne ʋɔnudrɔ̃la la ku la, wogawɔa nu gbegblẽ ɖe edzi wu wo fofowo, wodzea mawu bubuwo yome, eye wosubɔa wo hedea ta agu na wo.+ Womeɖea asi le woƒe nuwɔnawo kple woƒe tosesẽ la ŋu o. 20  Mlɔeba Yehowa ƒe dɔmedzoe bi ɖe Israel ŋu+ wògblɔ be: “Esi dukɔ sia tu nu, si mebla+ kpli wo tɔgbuiwo, eye womeɖo to nye gbe o+ ta la, 21  nye hã nyemanya dukɔ siwo Yosua kpɔtɔ ɖi hafi ku la dometɔ ɖeka pɛ hã ɖa le wo ŋgɔ o.+ 22  Ne matsɔ wo ado Israel kpɔ be woalé ŋku ɖe Yehowa ƒe mɔ+ ŋu ahazɔ edzi, abe ale si tututu wo fofowo lé ŋku ɖe eŋu ene loo, alo womalé ŋku ɖe eŋu o hã.” 23  Eya ta Yehowa ɖe mɔ dukɔ siawo tsi anyi. Menya wo ɖa zi ɖeka o, eye metsɔ wo de asi na Yosua o.

Etenuŋɔŋlɔ

Egɔmee nye, “Avifalawo.”
Esia nye nya si wozãna ne wole nu ƒom tso ku ŋu.
Alo, “evea.”