Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE

Ʋɔnudrɔ̃lawo 17:1-13

EMENYAWO ƑE TOTOƉEME

  • Mika ƒe legbawo kple eƒe nunɔla (1-13)

17  Ŋutsu aɖe tso Efrayim+ tonuto la me, si ŋkɔe nye Mika.  Egblɔ na dadaa be: “Wò klosalo akpe ɖeka alafa ɖeka si wotsɔ, eye nèdo ɖiŋu ɖe eŋu mese la, kpɔ ɖa, klosalo la le gbɔnye. Nyee tsɔe.” Eye dadaa gblɔ be: “Yehowa neyra vinye la.”  Ale wògbugbɔ klosalo akpe ɖeka alafa ɖeka la na dadaa, gake dadaa gblɔ be: “Makɔ klosalo si le asinye la ŋu na Yehowa hena vinye la, ne woatsɔe awɔ nu kpakpɛ kple galegba.*+ Azɔ megbugbɔe na wò.”  Esi wògbugbɔ klosalo la na dadaa la, dadaa ɖe klosalo alafa eve tsɔ na klosalonutula. Etsɔe wɔ nu kpakpɛ kple galegba;* eye wotsɔ wo da ɖe Mika ƒe me.  Mawuxɔ aɖe le Mika si, eye wòwɔ kɔmewu+ kple terafim legbawo*+ heɖo viaŋutsuwo dometɔ ɖeka be wòanye nunɔla na ye.+  Le ŋkeke mawo me la, fia aɖeke menɔ Israel o.+ Ame sia ame wɔa nu si sɔ le eya ŋutɔ ŋkume.*+  Ðekakpui aɖe tso Betlehem+ le Yuda, eye wòtso Yuda ƒomea me. Enye Lewitɔ+ va nɔ afi ma vie.  Ðekakpui la dzo le Betlehem, le Yuda, be yeayi aɖadi teƒe aɖe anɔ. Ezɔ mɔ va ɖo Mika ƒe aƒe gbɔ le Efrayim tonuto la me.+  Eye Mika biae be: “Afi kae nètso?” Eɖo eŋu nɛ be: “Lewitɔ menye tso Betlehem le Yuda, eye meyina be maɖadi teƒe aɖe anɔ.” 10  Eye Mika gblɔ nɛ be: “Tsi gbɔnye, nànye fofo* kple nunɔla nam, eye mana klosalo ewo wò ƒe sia ƒe hekpe ɖe nudodo kple nuɖuɖu ŋu.” Ale Lewitɔ la ge ɖe eme. 11  Lewitɔ la lɔ̃ be yeatsi ŋutsua gbɔ, eye ɖekakpui la va zu abe viawo dometɔ ɖeka ene. 12  Eye Mika ɖo Lewitɔ la be wòanye nunɔla na ye,+ eye wònɔ Mika ƒe me. 13  Eya ta Mika gblɔ be: “Azɔ menyae nyuie be Yehowa awɔ nyui nam, elabena Lewitɔ la zu nunɔla nam.”

Etenuŋɔŋlɔ

Alo, “legba si wolólo ga kɔ̀.”
Alo, “legba si wolólo ga kɔ̀.”
Alo, “aƒeliwo; legbawo.”
Alo, “nu si wòbu be enyo.”
Alo, “aɖaŋuɖola.”