Dzo kpo yi emenuwo dzi

Dzo kpo yi emenuawo dzi

Ʋɔnudrɔ̃lawo 13:1-25

EMENYAWO ƑE TOTOƉEME

  • Mawudɔla aɖe va Manoa kple srɔ̃a gbɔ (1-23)

  • Samson dzidzi (24, 25)

13  Israel-viwo gawɔ nu si nye vɔ̃ le Yehowa ŋkume,+ eye Yehowa tsɔ wo de asi na Filistitɔwo+ ƒe blaene.  Ɣemaɣi la, ŋutsu aɖe tso Zora,+ eŋkɔe nye Manoa+ tso Dan viwo+ ƒe ƒomea me. Srɔ̃a tsi ko, eye vi mele esi o.+  Gbe ɖeka Yehowa ƒe dɔla ɖe eɖokui fia nyɔnu la hegblɔ nɛ be: “Kpɔ ɖa, ètsi ko, eye vi mele asiwò o. Gake èle fu fɔ ge adzi ŋutsuvi.+  Ke kpɔ nyuie be màgano wain alo aha muame+ aɖeke o, eye mègaɖu nu makɔmakɔ+ aɖeke o.  Kpɔ ɖa, èle fu fɔ ge adzi ŋutsuvi, eye talũhɛ maka ta ŋu nɛ o,+ elabena ɖevi la anye Mawu ƒe Naziritɔ* tso edziɣi;* eye axɔ ŋgɔ aɖe Israel tso Filistitɔwo si me.”+  Eye nyɔnua yi ɖagblɔ na srɔ̃a be: “Mawu vavã la ƒe ame aɖe va gbɔnye, eɖi Mawu vavã la ƒe dɔla, eye ŋɔdzi le eŋu ŋutɔ. Nyemebia afi si wòtso lae o, eye meyɔ eŋkɔ hã nam o.+  Ke egblɔ nam be: ‘Kpɔ ɖa, èle fu fɔ ge adzi ŋutsuvi. Eya ta mègano wain alo aha muame aɖeke o, eye mègaɖu nu makɔmakɔ aɖeke o, elabena ɖevi la anye Mawu ƒe Naziritɔ tso edziɣi* va se ɖe eƒe kugbe.’”  Eye Manoa ƒo koko na Yehowa vevie be: “Yehowa, meɖe kuku. Taflatsɛ na Mawu vavã la ƒe ame si nèdɔ ɖa fifi laa la nagava mía gbɔ ake, ne wòafia nu si míawɔ na ɖevi si woadzi la mí.”  Eya ta Mawu vavã la ɖo to Manoa, eye Mawu vavã la ƒe dɔla gava nyɔnua gbɔ ake esime wòbɔbɔ nɔ agble me; srɔ̃a Manoa mele egbɔ o. 10  Nyɔnua ƒu du kaba yi ɖagblɔ na srɔ̃a be: “Kpɔ ɖa! Ŋutsu si va gbɔnye nyitsɔ la gaɖe eɖokui fiam.”+ 11  Eye Manoa tso kplɔ srɔ̃a ɖo. Esi wòva ŋutsua gbɔ la, ebiae be: “Wòe ƒo nu kple srɔ̃nyea?” Eɖo eŋu be: “Nyee.” 12  Eye Manoa gblɔ be: “Wò nyawo neva eme! Aleke míanyi ɖevi lae, eye dɔ kae wòawɔ?”+ 13  Eye Yehowa ƒe dɔla la gblɔ na Manoa be: “Ele be srɔ̃wò nakpɔ eɖokui dzi nyuie le nu sia nu si megblɔ nɛ la ŋu.+ 14  Megaɖu naneke si tso waintsetse me o, megano wain alo aha muame+ aɖeke o, eye megaɖu nu makɔmakɔ+ aɖeke hã o. Nu sia nu si ƒe se mede nɛ la, newɔ edzi pɛpɛpɛ.” 15  Azɔ Manoa gblɔ na Yehowa ƒe dɔla la be: “Meɖe kuku, lala vie, ne míaɖa gbɔ̃vi aɖe na wò.”+ 16  Ke Yehowa ƒe dɔla la gblɔ na Manoa be: “Ne melala hã la, nyemaɖu wò nu si nàɖa o; gake ne èdi be yeasa numevɔ na Yehowa la, àte ŋu asa vɔa.” Manoa menya be Yehowa ƒe dɔlae wònye o. 17  Eye Manoa bia Yehowa ƒe dɔla la be: “Ŋkɔwò ɖe,+ ale be ne wò nyaa va eme la, ne míade bubu ŋuwò?” 18  Ke Yehowa ƒe dɔla la ɖo eŋu nɛ be: “Nu ka ŋuti nèle nye ŋkɔ ta biam, evɔ ŋkɔ wɔnuku wònye?” 19  Manoa tsɔ gbɔ̃vi la kple nuɖuvɔsa la sa vɔ na Yehowa le agakpe la dzi. Eye Mawu wɔ nukunu aɖe Manoa kple srɔ̃a kpɔ. 20  Esi dzoƒaɖe la de dzi tso vɔsamlekpuia dzi la, Yehowa ƒe dɔla la to vɔsamlekpuia ƒe dzoƒaɖea me yi dzi le Manoa kple srɔ̃a ŋkume wokpɔ. Eye wotsyɔ mo anyi enumake. 21  Yehowa ƒe dɔla la megaɖe eɖokui fia Manoa kple srɔ̃a kpɔ o. Ale Manoa kpɔe dze sii be Yehowa ƒe dɔlae+ wònye. 22  Eya ta Manoa gblɔ na srɔ̃a be: “Míaku godoo, elabena Mawue míekpɔ.”+ 23  Ke srɔ̃a gblɔ nɛ be: “Ne ɖe Yehowa di be yeawu mí la, anye ne maxɔ numevɔsa+ kple nuɖuvɔsa la tso mía si o, maɖe nu siawo katã afia mí o, eye magblɔ nya siawo dometɔ aɖeke na mí o.” 24  Emegbe nyɔnua dzi ŋutsuvi, eye wòna ŋkɔe be Samson;+ esi ŋutsuvia tsi la, Yehowa yrae. 25  Le ɣeyiɣi aɖe megbe la, Yehowa ƒe gbɔgbɔ de asi dɔwɔwɔ me ɖe edzi+ le Mahane-Dan+ si le Zora kple Estaol+ dome.

Etenuŋɔŋlɔ

Efia, ame si ɖe adzɔgbe; ame si woɖe ɖe vovo.
Egɔmeɖeɖe tẽe, “tso vidzidɔ me.”
Egɔmeɖeɖe tẽe, “tso vidzidɔ me.”