Yuda 1:1-25

 Yuda, Yesu Kristo ƒe kluvi, gake henye Yakobo nɔvi, le esia ŋlɔm na ame siwo woyɔ, siwo Mawu Fofo la lɔ̃, eye wole ƒomedodo me kplii, eye wòkpɔ wo ta na Yesu Kristo:  Nublanuikpɔkpɔ kple ŋutifafa kpakple lɔlɔ̃ nadzi ɖe edzi na mi.  Lɔlɔ̃tɔwo, togbɔ be menɔ agbagba ɖe sia ɖe dzem be maŋlɔ xɔxɔ si mí katã míakpɔ ŋu nya na mi hã la, mekpɔe be, ehiã be maŋlɔ agbalẽ na mi atsɔ axlɔ̃ nu mi be, miaʋli sesĩe hena xɔse si wotsɔ na ame kɔkɔewo zi ɖeka ɖe ɣeyiɣiawo katã nu la boŋ.  Susu si tae nye be, ame aɖewo va tra ɖe eme dzaa, ame siwo Ŋɔŋlɔawo ɖo ɖi hena ʋɔnudɔdrɔ̃ sia ɣeyiɣi didi aɖee nye esia, ame mavɔ̃mawuwo, ame siwo trɔa mía Mawu ƒe amenuveve la wòzua mɔɖeɖe ɖe ŋukpenanuwo wɔwɔ ŋu, eye womewɔa nuteƒe na míaƒe Aƒetɔ ɖeka kolia, si nye Yesu Kristo, si tɔ míenye la o.  Medi be maɖo ŋku edzi na mi, togbɔ be mienya nuwo katã zi ɖeka ɖe ɣeyiɣiawo katã nu hã, be togbɔ be Yehowa ɖe dukɔ aɖe tso Egipte nyigba dzi hã la, etsrɔ̃ ame siwo meɖe xɔse fia o la emegbe.  Eye mawudɔla siwo meyi edzi nɔ afi si woda wo ɖo le gɔmedzedzea me o, ke boŋ wogblẽ woawo ŋutɔwo ƒe nɔƒe ɖi la, etsɔ babla mavɔwo dzra wo ɖo ɖi ɖe viviti tsiɖitsiɖi me hena ŋkeke gã la ƒe ʋɔnudɔdrɔ̃.  Nenema kee Sodom kple Gomora kpakple du siwo ƒo xlã wo hã, esi wonɔ agbe gbegblẽ wògbɔ eme abe woawo ke ene hedze ŋutilã yome hena eŋudɔwɔwɔ le mɔ si mele dzɔdzɔme nu o megbe la, wotsɔ wo wɔ nuxlɔ̃amekpɔɖeŋu na mí, to ale si wotsɔ dzo mavɔ he to na woe me.  Ke hã la, nenema kee ame siawo hã, to susu dzodzrowo bubu me la, woƒoa ɖi ŋutilã la, eye wodoa vlo aƒetɔnyenye heƒoa nu gbegblẽ tso ŋutikɔkɔemewo ŋu.  Gake esi nya aɖe ɖo mawudɔlawo ƒe tatɔ Mixael kple Abosam dome, eye wònɔ nya hem kplii le Mose ƒe ŋutilã ŋu la, metee kpɔ be yeadrɔ̃ ʋɔnui to nya manyomanyowo gbɔgblɔ nɛ me o, ke boŋ egblɔ be: “Yehowa neka mo na wò.” 10  Ke hã, ame siawo le nu gbegblẽ ƒom le nu siwo katã womenya ŋutɔŋutɔ o la ŋu; gake nu siwo katã gɔme wose le dzɔdzɔme nu abe lã manyanuwo ene la, nu siawo me woyi edzi le nu gblẽm le wo ɖokuiwo ŋu le. 11  Baba na wo, elabena wodze Kain ƒe mɔ dzi yina, eye woƒu du dze Bileam yome le eƒe mɔ manyomanyo la dzi hena fetu, eye wotsrɔ̃ le Kora ƒe nuƒoƒo aglãdzedzetɔe la me! 12  Ame siawoe nye agakpe siwo ɣla ɖe tɔ gɔme le miaƒe lɔlɔ̃nuɖuɖuwo me, siwo le nu ɖum kpli mi, alẽkplɔla siwo nyia wo ɖokuiwo vɔvɔ̃manɔmee; alilikpo siwo me tsi mele o, siwo ya lɔna yina gbɔnae; ati siwo li va se ɖe kele ƒe nuwuwu, gake wometsea ku o, woku zi eve, eye woho wo; 13  ƒutsotsoe dzeagbo siwo kplɔa woawo ŋutɔwo ƒe ŋukpenanuwo va kɔna ɖe gota; ɣletivi siwo mezɔna ɖe ɖoɖo aɖeke nu o, siwo wodzra viviti tsiɖitsiɖi ɖo ɖi na tegbee. 14  Ɛ̃, Henox, ame si nye adrelia tso Adam dzi, gblɔ nya ɖi tso woawo hã ŋu, esime wògblɔ be: “Kpɔ ɖa! Yehowa va kple eƒe aʋakɔ kɔkɔe akpeakpewo, 15  be yeadrɔ̃ ʋɔnu wo katã, eye yeabu fɔ ame mavɔ̃mawuwo katã le woƒe mawumavɔ̃mavɔ̃nuwɔna siwo wowɔ le mawumavɔ̃mavɔ̃ me, kple nya baɖa siwo katã nu vɔ̃ wɔla mavɔ̃mawuwo gblɔ tso eŋuti, la ta.” 16  Ame siawo nye liʋiliʋililawo, ame siwo toa nyatoƒoe le woƒe agbe ŋuti, ame siwo wɔa nu le woawo ŋutɔwo ƒe didiwo nu, eye woƒe nuwo gblɔa nya gã nya gãwo, eye wodea bubu amewo ŋu le woawo ŋutɔwo ƒe viɖe ta. 17  Ke miawo la, lɔlɔ̃tɔwo, miɖo ŋku nya siwo mía Aƒetɔ Yesu Kristo ƒe apostolowo gblɔ do ŋgɔ la dzi, 18  ale si wonɔ gbɔgblɔm na mi be: “Le ɣeyiɣi mamlɛa me la, fewuɖulawo anɔ anyi, ame siwo awɔ nu le woawo ŋutɔwo ƒe mawumavɔ̃mavɔ̃ ƒe dzodzro nu.” 19  Ame siawoe dea mama amewo me, ame siwo le abe lãwo ene, siwo me gbɔgbɔ la mele o. 20  Gake miawo la, lɔlɔ̃tɔwo, to mia ɖokui tutu ɖo ɖe miaƒe xɔse kɔkɔetɔ kekeake la dzi, kple gbedodoɖa le gbɔgbɔ kɔkɔe me dzi la, 21  midzra mia ɖokui ɖo ɖe Mawu ƒe lɔlɔ̃ la me, esime miele mía Aƒetɔ Yesu Kristo ƒe nublanuikpɔkpɔ hena agbe mavɔ la lalam. 22  Azɔ hã, miyi edzi mianɔ nublanui kpɔm na ame aɖewo, siwo me ɖikekewo le; 23  mihe wo do go tso dzo la me miatsɔ axɔ na wo. Gake miyi edzi miakpɔ nublanui na ame bubuwo, eye miwɔ esia kple vɔvɔ̃, eye mialé fu awutewui si ŋutilã la ƒo ɖii la kura gɔ̃ hã. 24  Ke ame si ate ŋu akpɔ mia ta be miagakli nu o, eye wòana mianye ame maƒoɖiwo le eƒe ŋutikɔkɔe la ŋkume le dzidzɔ gã me, 25  Mawu ɖeka kolia, si nye mía Ðela to Yesu Kristo, mía Aƒetɔ la dzi la, tɔ nanye ŋutikɔkɔe, gãnyenye, ŋusẽ gã kple dziɖuɖu hena ɣeyiɣi mavɔmavɔ siwo va yi, fifia, kple yi mavɔmavɔ me. Amen.

Etenuŋɔŋlɔ