Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Yohanes 9:1-41

9  Ke esi wòtso eme va yina la, ekpɔ ŋutsu aɖe si wodzi ŋkuagbãtɔe.  Eye eƒe nusrɔ̃lawo biae be: “Rabi, ame kae wɔ nu vɔ̃, be wodzi ame sia ŋkuagbãtɔe, eya ŋutɔe loo alo edzilawo yea?”  Yesu ɖo eŋu be: “Menye ame sia alo edzilawo ye wɔ nu vɔ̃ o, ke boŋ be woaɖe Mawu ƒe dɔwɔwɔwo afia le eyama gome tae.  Ele na mí be míawɔ ame si dɔm ɖa la ƒe dɔwo esime ŋkeke li; zã le dodo ge, esime ame aɖeke mate ŋu awɔ dɔ o.  Zi ale si mele xexea me la, nyee nye xexea ƒe kekeli.”  Esi wògblɔ nya siawo vɔ la, eɖe ta ɖe anyigba, eye wòtsɔ ta la nya anyi, eye wòtsɔ anyi la sisi ɖe ŋutsua ƒe ŋkuwo dzi,  eye wògblɔ nɛ be: “Heyi nàle tsi le Siloa ta la me” (woɖea Siloa gɔme be ‘Wodɔe ɖa’). Eya ta eyi, eye wòle tsi, eye wònɔ nu kpɔm hafi trɔ gbɔ.  Eya ta eƒe aƒelikawo kple ame siwo kpɔnɛ tsã be nubiala wònye la te gbɔgblɔ be: “Alo menye ame siae bɔbɔ nɔa anyi nɔa nu biam oa?”  Ame aɖewo nɔ gbɔgblɔm be: “Eyae.” Bubuwo nɔ gbɔgblɔm be: “Kpao, amee ɖi ame.” Ŋutsua ŋutɔ nɔ gbɔgblɔm be: “Nyee.” 10  Eya ta wote gbɔgblɔ nɛ be: “Ekema aleke wòdzɔe be wò ŋkuwo ʋu?” 11  Eɖo eŋu be: “Ŋutsu si woyɔna be Yesu lae nya anyi hetsɔe sisi ɖe nye ŋkuwo dzi, eye wògblɔ nam be: ‘Heyi nàle tsi le Siloa me.’ Eya ta meyi ɖalé tsi, eye mekpɔ nu.” 12  Eye wogblɔ nɛ be: “Afi kae ŋutsu ma le?” Egblɔ be: “Nyemenya o.” 13  Wokplɔ ŋutsu si nye ŋkuagbãtɔ tsã la yi Farisitɔwo gbɔ. 14  Ke ŋkeke si dzi Yesu nya anyi tsɔ ʋu ŋku na amea la nye Sabat. 15  Eya ta Farisitɔwo hã gabiae ale si wòwɔ kpɔ nu. Egblɔ na wo be: “Esisi anyi ɖe nye ŋkuwo dzi, eye mele tsi, eye mele nu kpɔm.” 16  Le esia ta Farisitɔwo dometɔ aɖewo te gbɔgblɔ be: “Menye Mawu gbɔe ame sia tso o, elabena mewɔna ɖe Sabat se la dzi o.” Bubuwo de asi gbɔgblɔ me be: “Aleke ame si nye nu vɔ̃ wɔla ate ŋu awɔ dzesi siawo tɔgbi?” Eya ta mama ɖo wo dome. 17  Eya ta wogagblɔ na ŋkuagbãtɔ la be: “Esi wònye eyae ʋu ŋku na wò ɖe, aleke nye wò susu le eŋu?” Ŋutsu la gblɔ be: “Nyagblɔɖilae wònye.” 18  Ke hã, Yudatɔwo mexɔe se be ame si ƒe ŋku ʋu la nye ŋkuagbãtɔ tsã hafi va le nu kpɔm fifia o, va se ɖe esime woyɔ edzilawo vae. 19  Eye wobia wo be: “Mia vi si miebe yewodzi ŋkuagbãtɔe lae nye esia? Aleke wòdzɔe be wòle nu kpɔm fifia?” 20  Eye edzilawo ɖo eŋu gblɔ be: “Míenya be mía vie wònye, eye be ŋkuagbãtɔe wònye míedzi. 21  Gake míenya ale si wòdzɔe be wòle nu kpɔm azɔ o, eye míenya ame si ʋu ŋku nɛ hã o. Mibiae. Etsi. Eya ŋutɔ neɖe eɖokui nu.” 22  Edzilawo gblɔ nya siawo, elabena wonɔ vɔvɔ̃m na Yudatɔwo, elabena Yudatɔwo lɔ̃ ɖe edzi xoxo le wo nɔewo dome be, ne ame aɖe ʋu eme be eyae nye Kristo la, ele be woanyae le ƒuƒoƒe la me. 23  Esia tae edzilawo gblɔ be: “Etsi. Mibiae.” 24  Eya ta wogayɔ ŋutsu si nye ŋkuagbãtɔ tsã la vae zi evelia, eye wogblɔ nɛ be: “Tsɔ kafukafu na Mawu; míenya be nu vɔ̃ wɔlae ŋutsu sia nye.” 25  Eɖo eŋu be: “Ne nu vɔ̃ wɔlae wònye la, nyemenya o. Nu ɖeka ko menya, be ŋkuagbãtɔe menye tsã, ke azɔ mele nu kpɔm.” 26  Eya ta wogblɔ nɛ be: “Nu kae wòwɔ na wò? Aleke wòwɔ ʋu wò ŋkuawo na wò?” 27  Eɖo eŋu na wo be: “Megblɔe na mi xoxo, gake miesee o. Nu ka tae miedi be yewoagasee? Alo ɖe miawo hã miedi be yewoazu eƒe nusrɔ̃lawoa?” 28  Eye wodzui gblɔ be: “Wòe nye ame ma ƒe nusrɔ̃la, míawo ya Mose ƒe nusrɔ̃lawo míenye. 29  Míenya be Mawu ƒo nu na Mose; ke ame sia ya la, míenya afi si wòtso o.” 30  Ŋutsu la ɖo eŋu na wo gblɔ be: “Esia wɔ nuku ŋutɔ, be mienya afi si wòtso o, evɔ wòʋu nye ŋkuwo. 31  Míenya be Mawu meɖoa to nu vɔ̃ wɔlawo o, gake ne ame aɖe vɔ̃a Mawu, eye wòwɔa eƒe lɔlɔ̃nu la, eɖoa to ame sia. 32  Tso keke blema ke la, míesee kpɔ be ame aɖe ʋu ŋku na ame si wodzi ŋkuagbãtɔe o. 33  Ne menye Mawu gbɔe ame sia tso o la, mate ŋu awɔ naneke kura o.” 34  Woɖo eŋu gblɔ nɛ be: “Wò si wodzi ɖe nu vɔ̃ me koŋ la, wòe be yeafia nu mía?” Eye wonyae do goe! 35  Yesu see be wonyae do goe, eye esi wòke ɖe eŋu la, egblɔ be: “Èle Amegbetɔvi la dzi xɔm le sesema?” 36  Ŋutsu la ɖo eŋu be: “Aƒetɔ, ame kae nye ame ma, ne maxɔ edzi ase?” 37  Yesu gblɔ nɛ be: “Èkpɔe, eye gawu la, ame si le nu ƒom kpli wò la, eyae.” 38  Eye wògblɔ be: “Aƒetɔ, mexɔ edzi se.” Eye wòbɔbɔ nɛ. 39  Eye Yesu gblɔ be: “Ʋɔnudɔdrɔ̃ si ta meva xexea me ɖo lae nye esi: be ame siwo mele nu kpɔm o la nakpɔ nu, eye ame siwo le nu kpɔm la nazu ŋkuagbãtɔwo.” 40  Farisitɔ siwo nɔ eŋu la se nya siawo, eye wogblɔ nɛ be: “Gbɔgblɔm nèle be míawo hã míenye ŋkuagbãtɔwoa?” 41  Yesu gblɔ na wo be: “Ne ŋkuagbãtɔwoe mienye la, anye ne nu vɔ̃ aɖeke mele mia ŋu o. Gake fifia miele gbɔgblɔm be: ‘Míele nu kpɔm.’ Miaƒe nu vɔ̃ la tsi anyi.”

Etenuŋɔŋlɔ