Yohanes 15:1-27

15  “Nyee nye wainti vavã la, eye Fofonyee nye agbledela la.  Alɔ sia alɔ si le ŋunye, si metsea ku o la, elãnɛ ɖa, eye ɖe sia ɖe si le ku tsem la, eɖea eŋu, ne wòate ŋu atse ku geɖe wu.  Mia ŋuti kɔ xoxo le nya si megblɔ na mi la ta.  Miyi edzi mianɔ ɖekawɔwɔ me kplim, eye nye hã manɔ ɖekawɔwɔ me kpli mi. Abe ale si ko alɔ la mate ŋu atse ku le eɖokui si o, negbe ɖe wòle wainti la ŋu hafi ene la, nenema kee miawo hã miate ŋui o, negbe ɖe miele ƒomedodo me kplim hafi.  Nyee nye wainti la, miawoe nye alɔawo. Ame si yia edzi nɔa ɖekawɔwɔ me kplim, eye nye hã menɔa ɖekawɔwɔ me kplii la, ame sia tsea ku geɖe; elabena nye manɔmee la, miate ŋu awɔ naneke kura o.  Ne ame aɖe meyi edzi le ɖekawɔwɔ me kplim o la, woaɖee ɖa abe alɔ ene, eye wòayrɔ; eye woƒoa atilɔ siawo nu ƒu, eye wotsɔa wo ƒua gbe ɖe dzo me wofiãna.  Ne mieyi edzi le ɖekawɔwɔ me kplim, eye nye nyawo kpɔtɔ le mia me la, mibia nu sia nu si miedi, eye ava eme na mi.  Nu si me wodoa Fofonye ɖe dzi le lae nye esi: be miayi edzi anɔ ku geɖe tsem, eye miaɖee afia be mienye nye nusrɔ̃lawo.  Abe ale si Fofo la lɔ̃m, eye melɔ̃ mi ene la, miyi edzi mianɔ nye lɔlɔ̃ la me. 10  Ne miewɔa nye seawo dzi la, ekema miayi edzi anɔ nye lɔlɔ̃ la me, abe ale si mewɔa Fofonye ƒe sewo dzi, eye mekpɔtɔ le eƒe lɔlɔ̃ la me ene. 11  “Nya siawoe megblɔ na mi, bene nye dzidzɔ la nanɔ mia me, eye miaƒe dzidzɔ la nagba go. 12  Nye sedede lae nye esi: be mialɔ̃ mia nɔewo, abe ale si melɔ̃ mi ene. 13  Lɔlɔ̃ gã wu esia megale ame aɖeke si o: be ame aɖe natsɔ eƒe luʋɔ aɖo anyi ɖe exɔlɔ̃awo ta. 14  Ne miewɔa nu siwo ƒe se dem mele na mi la, ekema xɔ̃nyewoe mienye. 15  Nyemegayɔa mi be kluviwo o, elabena kluvi menyaa nu si eƒe aƒetɔ wɔna o. Gake meyɔa mi be xɔ̃nyewo, elabena nu siwo katã mese tso Fofonye gbɔ la, mena mienya wo. 16  Menye miawoe tiam o, ke boŋ nyee tia mi, eye meɖo mi, be miayi, eye mianɔ ku geɖe tsem, eye be miaƒe kutsetse la nayi edzi anɔ anyi; ale be nu ka kee miebia Fofo la le nye ŋkɔ me o la, wòatsɔe ana mi. 17  “Nu siwo ƒe se dem mele na mi lae nye esi: be mialɔ̃ mia nɔewo. 18  Ne xexea léa fu mi la, mienyae be elé fum gbã hafi lé fu mi. 19  Ne ɖe mienye xexea ƒe akpa aɖe la, anye ne xexea alɔ̃ ye ŋutɔ tɔ vevie. Azɔ esi mienye xexea ƒe akpa aɖeke o, gake metia mi tso xexea me la, esia tae xexea léa fu mi ɖo. 20  Nya si megblɔ na mi la nenɔ susu me na mi be: Kluvi mewua eƒe aƒetɔ o. Ne woti yonyeme la, ekema woati miawo hã mia yome; ne wowɔ nye nya dzi la, ekema woawɔ mia tɔ hã dzi. 21  Gake woawɔ nu siawo katã ɖe mia ŋu le nye ŋkɔ la ta, elabena womenya ame si dɔm ɖa la o. 22  Ne ɖe nyemeva heƒo nu na wo o la, anye ne nu vɔ̃ aɖeke manɔ wo ŋu o; ke azɔ la, taflatsɛdodo aɖeke megale wo si le woƒe nu vɔ̃ la ŋu o. 23  Ame si léa fum la léa fu Fofonye hã. 24  Ne ɖe nyemewɔ dɔ siwo ame aɖeke mewɔ kpɔ o la le wo dome o la, anye ne nu vɔ̃ aɖeke manɔ wo ŋu o; ke azɔ la, wokpɔ, eye wolé fu mía kple Fofonye siaa. 25  Gake be nya si woŋlɔ ɖe woƒe Se la me la nava eme tae, be: ‘Wolé fum dzodzro.’ 26  Ne kpeɖeŋutɔ si maɖo ɖe mi tso Fofo la gbɔ, si nye nyateƒegbɔgbɔ si tso Fofo la gbɔ, va ɖo la, aɖi ɖase tso ŋunye; 27  eye ele be miawo hã miaɖi ɖase, elabena mieli kplim tso gɔmedzedzea me ke.

Etenuŋɔŋlɔ