Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Yohanes 11:1-57

11  Ke ŋutsu aɖe nɔ dɔ lém, eŋkɔe nye Lazaro, eye wòtso Betania, si nye kɔƒe si me Maria kple nɔvianyɔnu Marta tso la me.  Maria siae kɔ ami ʋeʋĩ ɖe tame na Aƒetɔ la hetsɔ eƒe ɖa tutu eƒe afɔwo ŋu, eye nɔviae nye Lazaro si nɔ dɔ lém la.  Eya ta nɔvinyɔnuawo dɔ ame ɖe egbɔ gblɔ be: “Aƒetɔ, kpɔ ɖa! Ame si gbɔ mèlɔ̃a nu le o la le dɔ lém.”  Gake esi Yesu see la, egblɔ be: “Menye ku tae wòle dɔ sia lém ɖo o, ke boŋ Mawu ƒe ŋutikɔkɔe tae, bene woato edzi ado Mawu ƒe Vi la ɖe dzi.”  Ke Yesu lɔ̃a Marta kple nɔvianyɔnua kpakple Lazaro.  Ke hã, esi wòse be enɔ dɔ lém la, egatsi afi si wònɔ la ŋkeke eve.  Eye le esia megbe la, egblɔ na nusrɔ̃lawo be: “Mina míagayi Yudea ake.”  Nusrɔ̃lawo gblɔ nɛ be: “Rabi, nyitsɔ laa koe Yudeatɔwo nɔ didim be yewoaƒu kpe wò, eye nègale afi ma yima?”  Yesu ɖo eŋu be: “Alo menye gaƒoƒo wuievee kekeli nɔa anyi le ŋkeke me oa? Ne ame aɖe zɔna le kekeli nu le ŋkeke me la, melɔa naneke o, elabena ekpɔa xexe sia me kekeli la. 10  Gake ne ame aɖe zɔna le zã me la, elɔa nu, elabena kekeli mele eyama me o.” 11  Egblɔ nya siawo, eye emegbe la, egblɔ na wo be: “Mía xɔlɔ̃ Lazaro le ɖiɖim ɖe eme, gake meyina afi ma, be maɖanyɔe tso alɔ̃ me.” 12  Eya ta nusrɔ̃laawo gblɔ nɛ be: “Aƒetɔ, ne ɖiɖimee wòle ɖe eme la, ekema eƒe lãme asẽe.” 13  Ke hã, eƒe ku ŋue Yesu ƒo nu tsoe. Gake woawo wosusui be enɔ nu ƒom tso ale si woadɔ alɔ̃ aɖi ɖe emee ŋu. 14  Eya ta Yesu ʋu eme na wo kɔtɛ azɔ be: “Lazaro ku, 15  eye le mia ta la, mekpɔ dzidzɔ be nyemenɔ eteƒe o, bene miaxɔe ase. Gake mina míayi egbɔ.” 16  Eya ta Toma, si woyɔna be Venɔvi la, gblɔ na etɔ nusrɔ̃lawo be: “Mina míawo hã míayi, bene míaku kplii.” 17  Eye esi Yesu va ɖo la, ekpɔ be exɔ ŋkeke ene xoxo le ŋkuɖodziyɔdoa me. 18  Ke Betania te ɖe Yerusalem ŋu, eye wo dome didi abe kilometa etɔ̃ ene. 19  Eya ta Yudatɔ geɖewo va Marta kple Maria gbɔ, bene yewoafa akɔ na wo le wo nɔviŋutsua ta. 20  Eya ta esi Marta se be Yesu gbɔna la, eyi ɖakpee; gake Maria ya kpɔtɔ nɔ anyi ɖe aƒea me. 21  Marta gblɔ na Yesu be: “Aƒetɔ, ne ɖe nènɔ afi sia la, anye ne nɔvinye la meku o. 22  Ke hã, fifia kura gɔ̃ hã menya be nu geɖe ale si nu nàbia Mawu la, Mawu ana wò.” 23  Yesu gblɔ nɛ be: “Nɔviwò la atsi tsitre.” 24  Marta gblɔ nɛ be: “Menya be atsi tsitre le tsitretsitsi la me le ŋkeke mamlɛa dzi.” 25  Yesu gblɔ nɛ be: “Nyee nye tsitretsitsi la kple agbe la. Ame si ɖenɛ fiana be yexɔ dzinye se la, togbɔ be aku hã la, agagbɔ agbe; 26  eye ame sia ame si le agbe, eye wòɖenɛ fiana be yexɔ dzinye se la, maku akpɔ gbeɖe o. Èxɔ nya sia dzi sea?” 27  Egblɔ nɛ be: “Ɛ̃, Aƒetɔ; mexɔe se be wòe nye Kristo la, Mawu ƒe Vi la, Ame si gbɔna xexea me.” 28  Eye esi wògblɔ esia la, eyi ɖayɔ nɔvianyɔnu Maria, hegblɔ nɛ dzaa be: “Nufiala la va, eye ele yɔwòm.” 29  Esi wòsee la, etso kpla, eye wòdze mɔ yina egbɔ. 30  Yesu mekpɔ va ɖo kɔƒea me ŋutɔŋutɔ haɖe o, ke boŋ egale afi si Marta va kpee le. 31  Eya ta esi Yudatɔ siwo nɔ Maria gbɔ le aƒea me henɔ akɔ fam nɛ la kpɔ be etso kpla do go la, wodze eyome, elabena wosusu be eyina ŋkuɖodziyɔdoa gbɔ be yeafa avi le afi ma. 32  Eye ale, esi Maria va ɖo afi si Yesu nɔ, eye eƒe ŋku klii la, ebɔbɔ ɖe eƒe afɔ nu, gblɔ nɛ be: “Aƒetɔ, ne ɖe nènɔ afi sia la, anye ne nɔvinye la meku o.” 33  Eya ta esi Yesu kpɔe wònɔ avi fam, eye Yudatɔ siwo va kplii la nɔ avi fam la, eɖe hũ le gbɔgbɔ la me, eye wòxa nu vevie; 34  eye wògblɔ be: “Afi kae mietsɔe yi ɖamlɔ?” Wogblɔ nɛ be: “Aƒetɔ, va kpɔe.” 35  Aɖatsi ge le mo na Yesu. 36  Eya ta Yudatɔwo te gbɔgblɔ be: “Mikpɔ ale si gbegbe wòlɔ̃e ɖa!” 37  Gake wo dometɔ aɖewo gblɔ be: “Ðe ame sia, si ʋu ŋku na ŋkuagbãtɔa la, mete ŋu xe mɔ na ame sia ƒe ku ya oa?” 38  Eye esi Yesu gaɖe hũ le eɖokui me vɔ la, eva ŋkuɖodziyɔdo la gbɔ. Agadoe wònye, eye kpe aɖe nɔ enu. 39  Yesu gblɔ be: “Miɖe kpe la ɖa.” Marta, si nye ame kukua nɔvinyɔnu, gblɔ nɛ be: “Aƒetɔ, ate ʋeʋẽ xoxo, elabena ŋkeke enee nye esia.” 40  Yesu gblɔ nɛ be: “Ðe nyemegblɔe na wò be ne èxɔe se la, àkpɔ Mawu ƒe ŋutikɔkɔe oa?” 41  Eya ta woɖe kpe la ɖa. Azɔ Yesu wu mo dzi kpɔ dziƒo, eye wògblɔ be: “Fofo, meda akpe na wò be èɖo tom. 42  Nyateƒee, menya be èɖoa tom ɣesiaɣi; gake ameha si le tsitre ɖe afi sia tae megblɔe ɖo, bene woaxɔe ase be wòe dɔm ɖa.” 43  Eye esi wògblɔ nya siawo vɔ la, edo ɣli kple gbe sesẽ be: “Lazaro lee, do va!” 44  Ame si ku la do va, eye eƒe asiwo kple afɔwo nɔ babla kple ameɖivɔwo, eye avɔ bla mo nɛ. Yesu gblɔ na wo be: “Mitui, eye mina wòadzo.” 45  Eya ta Yudatɔ siwo va Maria gbɔ, eye wokpɔ nu siwo wòwɔ la, dometɔ geɖewo xɔ edzi se; 46  gake wo dometɔ aɖewo yi Farisitɔwo gbɔ ɖagblɔ nu siwo Yesu wɔ la na wo. 47  Ale nunɔlawo ƒe tatɔwo kple Farisitɔwo ƒo Sanhedrin la nu ƒu, eye wote gbɔgblɔ be: “Nu kae míawɔ, elabena ame sia le dzesi geɖewo wɔm? 48  Ne míeɖe mɔ nɛ alea la, ekema wo katã woaxɔ edzi ase, eye Romatɔwo ava, eye woaxɔ míaƒe nɔƒe* kple míaƒe dukɔa siaa le mía si.” 49  Gake wo dometɔ ɖeka si nye Kayafa, ame si nye nunɔlagã le ƒe ma me, gblɔ na wo be: “Mienya naneke kura o, 50  eye miebu eŋu kpɔ hã o, be ade mia dzi be ame ɖeka naku ɖe dukɔ la ta, ke menye be dukɔ blibo la natsrɔ̃ o.” 51  Gake menye eya ŋutɔ ɖokui sie wògblɔ nya sia le o; ke boŋ esi wònye nunɔlagã le ƒe ma me ta la, egblɔe ɖi be, ele be Yesu naku ɖe dukɔ la ta, 52  eye menye ɖe dukɔ la ɖeɖe ko ta o, ke boŋ bene wòaƒo Mawu ƒe vi siwo ka hlẽ la hã nu ƒu ɖekae. 53  Eya ta tso ŋkeke ma dzi la, wode adaŋu be yewoawui. 54  Eya ta Yesu megatsana le Yudatɔwo dome le gaglãgbe o, ke boŋ edzo le afi ma heyi nuto aɖe si te ɖe gbedadaƒo ŋu, le du aɖe si woyɔna be Efrayim la me, eye woa kple nusrɔ̃laawo wonɔ afi ma. 55  Ke Yudatɔwo ƒe ŋutitoto la nɔ ɖoɖom, eye ame geɖewo dzo le kɔƒenutoawo me yi Yerusalem do ŋgɔ na ŋutitoto la, ale be woakɔ wo ɖokuiwo ŋu le kɔa nu. 56  Eya ta wonɔ Yesu dim, eye esi wotsi tsitre ɖe gbedoxɔa me la, wogblɔ na wo nɔewo be: “Nu kae nye miaƒe susu? Be megbɔna ŋkekenyuia ɖuƒe kura oa?” 57  Ke nunɔlawo ƒe tatɔwo kple Farisitɔwo de se be, ne ame aɖe nya afi si wòle la, neva gblɔe, ne yewoalée.

Etenuŋɔŋlɔ

Egɔmee nye, “míaƒe tadeaguƒe,” alo “gbedoxɔa.”