Dzo kpo yi emenuwo dzi

Dzo kpo yi emenuawo dzi

Yakobo 3:1-18

3  Nɔvinyewo, mele be mia dometɔ geɖewo nazu nufialawo o, esi mienyae be míakpɔ ʋɔnudɔdrɔ̃ si sesẽ wu la ta.  Elabena mí katã míewɔa vodada zi geɖe. Ne ame aɖe mewɔa vodada le nuƒoƒo me o la, ame sia nye ame deblibo, si ate ŋu ade ga eƒe ŋutilã bliboa hã.  Ne míedea ga nu na sɔwo be woaɖo to mí la, ekema míekpɔa ŋusẽ ɖe woƒe ŋutilã bliboa hã dzi.  Kpɔ ɖa! Tɔdziʋuwo kura gɔ̃ hã, togbɔ be wololo ŋutɔ, eye ya sesẽ hea wo hã la, kuɖɔ sue aɖe koe kuɖɔɖola la tsɔna kua wo yia afi si wòdi.  Nenema kee aɖe hã nye ŋutinu sue aɖe ko, gake wòhekana ɖe nu gãwo ŋu. Kpɔ ɖa! Dzo sue aɖe koe wotsɔna tɔa dzo ave gã aɖee!  Ɛ̃, dzoe aɖe la nye. Madzɔmadzɔnyenye ƒe xexe aɖee aɖe la nye le míaƒe ŋutinuwo dome, elabena eƒoa ɖi ŋutilã blibo la, eye wòtɔa dzo ame ƒe agbe blibo la, eye Gehena* tɔa dzo aɖe la.  Elabena ele be woamla gbemelã ɖe sia ɖe ƒomevi, xewo, nu gbagbe siwo tana, kpakple ƒumelãwo, eye amegbetɔwo mla wo.  Gake aɖe ya la, amegbetɔ aɖeke mate ŋu amlae o. Enye nane si dzi womate ŋu aɖu bɔbɔe o, eye wòyɔ fũu kple aɖi wuame.  Eyae míetsɔna kafua Yehowa, si nye mía Fofo la, gake eya kee míetsɔna ƒoa fi dea ame siwo va dzɔ “ɖe Mawu ƒe nɔnɔme nu” la hã. 10  Nu ɖeka ma mee yayra kple fiƒode dona tso. Nɔvinyewo, mesɔ be nu siawo nanɔ edzi yim alea o. 11  Vudo medzia tsi vivi kple tsi veve tso do ɖeka ma ke me o ɖe, menye nenemae oa? 12  Nɔvinyewo, gboti mate ŋu atse amititsetsewo o, eye wainka mate ŋu atse gbotitsetsewo o ɖe, menye nenemae oa? Eye nenema kee vudo si dzia dzetsi la magate ŋu adzi tsi vivi hã o. 13  Ame kae nye nunyala kple nugɔmesela le mia dome? Netsɔ tufafa si tso nunya me la ɖe eƒe dɔwɔwɔwo fia to eƒe agbenɔnɔ nyui me. 14  Gake ne ŋuʋaʋã vɔ̃ɖi kple dzrehehe le miaƒe dziwo me la, miganɔ adegbe ƒom ahanɔ alakpa dam ɖe nyateƒe la si o. 15  Menye nunya si tso dziƒo va lae nye esia o, ke anyigba dzi tɔe, lã tɔe, gbɔgbɔ vɔ̃wo tɔe. 16  Elabena afi si ŋuʋaʋã kple dzrehehe le la, afi mae tɔtɔ kple nu gbegblẽ ɖe sia ɖe nɔna. 17  Gake le nunya si tso dziƒo gome la, gbã la, ele dzadzɛ, azɔ hã, ewɔa ŋutifafa, esea nu gɔme, elɔ̃na faa ɖoa to, nublanuikpɔkpɔ kple kutsetse nyuiwo yɔe fũu, medea vovototo amewo me le ameŋkumekpɔkpɔ ta o, alakpanuwɔwɔ mele eme o. 18  Gawu la, woƒãa dzɔdzɔenyenyeku le ŋutifafa me na ame siwo wɔa ŋutifafa.

Etenuŋɔŋlɔ

Afi si wotɔa dzo gbeɖuɖɔwo ɖo le Yerusalem dua godo.