Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Yakobo 2:1-26

2  Nɔvinyewo, menye ameŋkumekpɔkpɔ ye mietsɔ lé mía Aƒetɔ Yesu Kristo, si nye míaƒe ŋutikɔkɔe la, dzi xɔxɔse me ɖe asi o ɖe, alo eyaea?  Elabena ne ame aɖe si do sikasigɛwo ɖe eƒe asiwo, eye wòle awu xɔasi aɖe me la, ge ɖe miaƒe ƒuƒoƒe aɖe, gake ame dahe aɖe si le awu ƒoɖi me hã ge ɖe eme,  eye ame si do awu xɔasi la ƒe nu nyo mia ŋu, si na miegblɔ nɛ be: “Va nɔ anyi ɖe teƒe nyui sia,” gake miegblɔ na ame dahea ya be: “Wò ya nɔ tsitrenu,” alo: “Nɔ anyi ɖe zikpui ma dzi le nye afɔɖodzinu te” la,  ekema miele vovototo dem mia nɔewo dome, eye miezu ʋɔnudrɔ̃lawo hele afia gbegblẽwo tsom, alo menye nenemae oa?  Nɔvinye lɔlɔ̃tɔwo, mise nya sia. Mawu tia ame siwo nye ame dahewo le xexea me, be woanye kesinɔtɔwo le xɔse me kple domenyilawo le fiaɖuƒe si ŋugbe wòdo na ame siwo lɔ̃nɛ la me, alo mele eme oa?  Ke miawo ya miedo vlo ame dahe la. Kesinɔtɔwo tea mi ɖe anyi, eye wohea mi yia ʋɔnu, menye nenemae oa?  Wogblɔa busunya ɖe ŋkɔ nyui si woyɔ na mi la ŋuti, alo mele eme oa?  Ke azɔ, ne mieyi edzi le fiasedede la dzi wɔm abe ale si ŋɔŋlɔ la gblɔe ene be: “Ele be nàlɔ̃ hawòvi abe wò ŋutɔ ɖokuiwò ene” la, ekema miele agbagba dzem ŋutɔ.  Gake ne mieyi edzi le ame ŋkume kpɔm la, ekema miele nu vɔ̃ wɔm, elabena se la ɖee fia be mienye vodalawo. 10  Elabena ame si wɔa Se la katã dzi, gake dana le ɖeka dzi la, ezu wo katã dzi dala. 11  Elabena ame si gblɔ be: “Mele be nàwɔ ahasi o” la kee gblɔ be: “Mele be nàwu ame o.” Ke ne mèwɔa ahasi o, gake nèwua ame la, ekema èzu sedzidala. 12  Miyi edzi mianɔ nu ƒom alea, eye miyi edzi mianɔ nu wɔm alea, abe ame siwo woatsɔ ablɔɖedukɔ ƒe se adrɔ̃ ʋɔnui ene. 13  Elabena ame si mekpɔa nublanui na ame o la, womakpɔ nublanui nɛ le ʋɔnudɔdrɔ̃ me o. Nublanuikpɔkpɔ ƒoa adegbe be yeɖua ʋɔnudɔdrɔ̃ dzi. 14  Viɖe kae wònye, nɔvinyewo, ne ame aɖe gblɔna be xɔse le ye si, evɔ dɔwɔwɔ ya mele esi o? Xɔse ma mate ŋu axɔe ɖe agbe o ɖe, alo ate ŋuia? 15  Ne nɔviŋutsu alo nɔvinyɔnu aɖe le amama, eye nuɖuɖu si asu nɛ le ŋkekea me mele esi o, 16  evɔ mia dometɔ aɖe gblɔ na wo be: “Miheyi le ŋutifafa me, dzo naɖo lãme na mi, eye miɖu nu ɖi ƒo,” gake miena nu siwo woƒe ŋutilã hiã o ɖe, viɖe kae wònye? 17  Nenema kee xɔse hã, ne dɔwɔwɔ mekpe ɖe eŋu o la, enye nu kuku le eɖokui me. 18  Gake ame aɖe ya agblɔ be: “Xɔse le asiwò, eye dɔwɔwɔwo le nye hã asinye. Fia wò xɔse si ŋu dɔwɔwɔ mekpe ɖo o lam, eye nye hã mafia nye xɔse la wò to nye dɔwɔwɔwo me.” 19  Èxɔe se be Mawu ɖeka koe li, menye nenemae oa? Èle agbagba dzem ŋutɔ. Gake gbɔgbɔ vɔ̃wo hã xɔe se, eye wodzona nyanyanya. 20  Gake Oo ame gbɔlo, ɖe nèdi be yeanya be viɖe aɖeke mele xɔse dɔwɔwɔ manɔŋui ŋu oa? 21  Ðe womebu mía fofo Abraham ame dzɔdzɔe to dɔwɔwɔ me, esi wòtsɔ via Isak na le vɔsamlekpui la dzi megbe oa? 22  Èkpɔe be eƒe dɔwɔwɔwo kpe ɖe eƒe xɔse ŋu, eye to eƒe dɔwɔwɔwo me la, ena eƒe xɔse de blibo, 23  eye ŋɔŋlɔ la va eme, si gblɔ be: “Abraham xɔ Yehowa dzi se, eye wobui dzɔdzɔenyenye nɛ,” eye wova yɔe be “Yehowa xɔlɔ̃.” 24  Miekpɔe be wobua ame be ele dzɔdzɔe to dɔwɔwɔwo me, ke menye to xɔse ɖeɖe ko me o. 25  Ðe menye nenema kee wobu Raxab, gbolo la, be enye ame dzɔdzɔe, esi wòxɔ ame dɔdɔwo nyuie hena woto mɔ bubu dzo oa? 26  Nyateƒee, abe ale si ŋutilã gbɔgbɔ manɔmee nye nu kuku ene la, nenema kee xɔse dɔwɔwɔ manɔŋui hã nye nu kuku.

Etenuŋɔŋlɔ