Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Tito 3:1-15

3  Yi edzi nànɔ ŋku ɖom edzi na wo be woabɔbɔ wo ɖokuiwo na dziɖuɖuwo kple ŋusẽwo, eye woaɖo to wo abe dziɖulawo ene, be woanɔ dzadzraɖoɖi na dɔ nyui sia dɔ nyui wɔwɔ,  be woagagblẽ ame aɖeke ŋu o, woaganye dzrehelawo o, woanye nugɔmeselawo, woaɖe tufafa afia amewo katã bliboe.  Elabena tsã la, mía ŋutɔwo hã míenye movitɔwo, tosẽlawo, ame siwo wokplɔ trae, nudzodzro kple vivisese ƒomevi vovovowo ƒe kluviwo, eye míenɔ vɔ̃ɖinyenye kple ŋubiabiã dzi, míenye ame nyɔŋuwo, ame siwo léa fu wo nɔewo.  Ke hã, esi Mawu, mía Xɔla, ƒe dɔmenyonyo kple amelɔlɔ̃ va dze la,  eɖe mí, menye le dzɔdzɔenyenye ƒe dɔ, si míawo míewɔ la ta o, ke boŋ le eƒe nublanuikpɔkpɔ la nu to tsilelename si na míegagbɔ agbe kple mía wɔwɔ yeyee to gbɔgbɔ kɔkɔe la me dzi.  Ekɔ gbɔgbɔ sia ɖe mía dzi fũu to Yesu Kristo, mía Xɔla la dzi,  bene esi wòbu mí ame dzɔdzɔewoe to ame ma ƒe amenuveve me vɔ la, míazu domenyilawo le agbe mavɔ ƒe mɔkpɔkpɔ la nu.  Nya sia nye nyateƒe, eye medi be kakaɖedzi nadze le wò nyawo me ɣesiaɣi le nya siawo ŋu, bene ame siwo xɔ Mawu dzi se la ƒe susu nanɔ dɔ nyuiwo wɔwɔ ŋu. Nu siawo nyo, eye viɖe le wo ŋu na amegbetɔwo.  Gake ƒo asa na bometsitsi ƒe nyahehewo kple dzidzimewo xexlẽ fia kple dzrehehewo kpakple dzrewɔwɔ le Se la ŋu, elabena viɖe aɖeke mele wo ŋu o, eye wonye nu dzodzrowo. 10  Le ame si doa kɔmama ɖe ŋgɔ gome la, ne èxlɔ̃ nui zi gbãtɔ kple zi evelia vɔ la, ƒo asa nɛ; 11  esi nènyae be wotrɔ ame sia ɖa tso mɔ la ŋu, eye wòle nu vɔ̃ wɔm, esi wòbu fɔ eɖokui, la ta. 12  Ne medɔ Artema alo Tixiko ɖe gbɔwò la, dze agbagba ɖe sia ɖe nàva gbɔnye le Nikopoli, elabena afi mae meɖo be manɔ le vuvɔŋɔli la. 13  Tsɔ nu siwo katã Zena, ame si nya Se la nyuie, kple Apolo, hiã hena woƒe mɔzɔzɔa la na wo, bene naneke nagahiã wo o. 14  Ke na mía tɔwo hã nasrɔ̃ ale si woayi dɔ nyuiwo wɔwɔ dzi, bene woate ŋu akpɔ woƒe nu hiahiã veviwo gbɔ, ne woagazu ame matsekuwo o. 15  Ame siwo katã le gbɔnye la do gbe na wò. Do gbe na ame siwo katã lɔ̃a mí le xɔse me la nam. Amenuveve nanɔ anyi kpli mi katã.

Etenuŋɔŋlɔ