Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 8:1-34

8  Esi wòɖi tso toa dzi la, ameha gã aɖewo dze eyome.  Eye kpɔ ɖa! Kpodɔléla aɖe va, eye wòva bɔbɔ nɛ gblɔ be: “Aƒetɔ, ne èlɔ̃ ko la, àte ŋu ana ŋutinye nakɔ.”  Eya ta edo asi ɖa heka asi eŋu gblɔ be: “Melɔ̃. Ŋutiwò nekɔ.” Eye enumake eƒe kpodɔ la vɔ nɛ.  Azɔ Yesu gblɔ nɛ be: “Kpɔ egbɔ be nàgagblɔe na ame aɖeke o, ke boŋ yi nàtsɔ ɖokuiwò afia nunɔla, eye nàna nu siwo Mose ɖo be woana la, ne wòanye ɖaseɖiɖi na wo.”  Esi wòva Kapernaum la, asrafomegã aɖe va egbɔ, nɔ kuku ɖem nɛ vevie  be: “Aƒetɔ, nye dɔlaŋutsu le aba dzi le aƒe me le lãmetutudɔ lém, eye wòle fu kpem vevie.”  Egblɔ nɛ be: “Ne meva ɖo afi ma la, mada gbe le eŋu.”  Asrafomegã la ɖo eŋu be: “Aƒetɔ, nyemedze be nàva nye xɔ te o, ke boŋ ɖe gbe ko, eye nye dɔlaŋutsua ahaya.  Elabena nye hã ame aɖe ƒe ŋusẽ tee mele, eye asrafowo le nye hã tenye, eye megblɔna na ame sia be, ‘Heyi!’ eye wòyina, eye na ame bubu be ‘Va!’ eye wòvana, eye na nye kluvi be, ‘Wɔ esia!’ eye wòwɔnɛ.” 10  Esi Yesu se nya siawo la, ewɔ nuku nɛ ŋutɔ, eye wògblɔ na ame siwo kplɔe ɖo la be: “Nyateƒe tom mele na mi be: Nyemekpɔ xɔse gã sia tɔgbi le ame aɖeke me le Israel kpɔ o. 11  Gake mele egblɔm na mi be, ame geɖewo atso ɣedzeƒekpa dzi kple ɣetoɖoƒekpa dzi, eye woanɔ kplɔ̃ ŋu kple Abraham kple Isak kpakple Yakob le dziƒofiaɖuƒe la me; 12  gake woatsɔ fiaɖuƒe la ƒe viwo ya aƒu gbe ɖe viviti me le xexe. Afi mae woƒe avifafa kple aɖukliɖuɖu anɔ.” 13  Eye Yesu gblɔ na asrafomegã la be: “Heyi. Neva eme na wò le wò xɔse la nu.” Eye dɔlaŋutsua ƒe lãme sẽ le gaƒoƒo ma dzi. 14  Eye esi Yesu va ɖo Petro ƒe aƒe me la, ekpɔ lɔ̃xoa si asrã lé la wòle anyimlɔƒe. 15  Eya ta eka asi eƒe asi ŋu, eye asrã la dzo le edzi, eye wòfɔ hede asi amedzrowɔwɔ me nɛ. 16  Gake esi fiẽsi ɖo la, amewo kplɔ ame geɖe siwo me gbɔgbɔ vɔ̃wo le la va egbɔ; eye wòɖe gbe na gbɔgbɔawo henya wo do goe, eye wòda gbe le ame siwo katã ƒe lãme gblẽ la ŋu; 17  bene nya si wogblɔ ɖi to Yesaya nyagblɔɖila la dzi la nava eme be: “Eya ŋutɔ tsɔ míaƒe lãmegbegblẽwo, eye wòde ta míaƒe dɔlélewo te.” 18  Esi Yesu kpɔ be, ameha aɖe nɔ ye ŋu la, eɖe gbe be yewoayi ƒua ƒe go kemɛ dzi. 19  Eye agbalẽfiala aɖe va gblɔ nɛ be: “Nufiala, madze yowòme ayi afi sia afi si nàyi.” 20  Gake Yesu gblɔ nɛ be: “Do le abeiwo si, eye atɔ le dziƒoxewo si, gake teƒe aɖeke mele Amegbetɔvi la ya si wòatsɔ ta aziɔ ɖo o.” 21  Eye nusrɔ̃lawo dometɔ bubu gblɔ nɛ be: “Aƒetɔ, ɖe mɔ nam be mayi aɖaɖi fofonye gbã.” 22  Yesu gblɔ nɛ be: “Nɔ yonyeme, eye na ame kukuwo naɖi woƒe ame kukuwo.” 23  Eye esi wòge ɖe tɔdziʋu aɖe me la, eƒe nusrɔ̃lawo kplɔe ɖo. 24  Ke kpɔ ɖa! Ya sesẽ aɖe ƒo le ƒua dzi, ale be ƒutsotsoewo nɔ ŋeŋem ɖe tɔdziʋu la me; gake eya ŋutɔ nɔ alɔ̃ dɔm. 25  Eye wova nyɔe hegblɔ nɛ be: “Aƒetɔ, ɖe mí, míetsrɔ̃ vɔ!” 26  Gake egblɔ na wo be: “Nu ka ta vɔvɔ̃ ɖo mi, mi xɔse ʋɛ tɔwo!” Eye esi wòtso la, eblu ɖe yawo kple ƒu la ta, eye ɖoɖoe zi toŋtoŋtoŋ. 27  Ale wòwɔ nuku na ameawo ale gbegbe, eye wogblɔ be: “Ame ka gɔ̃e nye esia, be yawo kple ƒu kura gɔ̃ hã ɖoa toe?” 28  Esi wòva go kemɛ dzi le Gadaratɔwo ƒe anyigba dzi la, ŋutsu eve siwo me gbɔgbɔ vɔ̃wo le, eye wowɔa adã ale gbegbe be, dzi menɔa ame aɖeke ƒo be wòato mɔ ma o la, do go tso ŋkuɖodziyɔdowo dome va do goe le afi ma. 29  Eye kpɔ ɖa! Wodo ɣli sesĩe gblɔ be: “Nya kae le mía kpli wò dome, Mawu ƒe Vi? Ðe nèva be yeawɔ funyafunya mí hafi ɣeyiɣi ɖoɖia nadea?” 30  Ke hawo ƒe ha gã aɖe nɔ adzɔge ɖaa tso wo gbɔ nɔ nu ɖum. 31  Eya ta gbɔgbɔ vɔ̃awo de asi kukuɖeɖe me nɛ vevie be: “Ne ènya mí do goe la, ɖo mí ɖe haawo me.” 32  Eya ta egblɔ na wo be: “Miheyi!” Eye wodo go heyi ɖe haawo me; eye kpɔ ɖa! Hawo ƒe ha la katã ƒu du sesĩe to to la kɔgo va ge dze ƒu la me doo, eye woku ɖe tsiawo me. 33  Gake wo kplɔlawo si, eye esi woyi dua me la, wogblɔ nu sia nu si dzɔ, kple ŋutsu siwo me gbɔgbɔ vɔ̃wo nɔ la ŋuti nya hã. 34  Eye kpɔ ɖa! Du blibo la katã ƒo zi, eye wodo va be yewoakpɔ Yesu; eye esi wova kpɔe la, woɖe kuku nɛ vevie be wòadzo le yewoƒe nutoawo me.

Etenuŋɔŋlɔ