Dzo kpo yi emenuwo dzi

Dzo kpo yi emenuawo dzi

Mateo 7:1-29

7  “Midzudzɔ ʋɔnudɔdrɔ̃, ne woagadrɔ̃ ʋɔnu mi o;  elabena ʋɔnu si drɔ̃m miele la kee woatsɔ adrɔ̃ ʋɔnu mi; eye dzidzenu si mietsɔ le nu dzidzem la kee woatsɔ adzidzee na mi.  Ekema nu ka tae nèkpɔa ati fefee si le nɔviwò ƒe ŋku dzi, gake mèbua atikpo si le wò ŋutɔ wò ŋku dzi ya ŋu o?  Alo aleke wɔ nàgblɔ na nɔviwò be, ‘Na maɖe ati fefee la ɖa le ŋku dzi na wò,’ evɔ kpɔ ɖa, atikpo le wò ŋutɔ wò ŋku dzi?  Alakpanuwɔla! Ðe atikpo la ɖa le wò ŋutɔ wò ŋku dzi gbã, ekema àte ŋu akpɔ nu nyuie aɖe ati fefee si le nɔviwò ƒe ŋku dzi la.  “Migatsɔ nu si le kɔkɔe la ana avuwo, alo atsɔ miaƒe dzonu xɔasiwo aƒu gbe ɖe hawo ŋkume o, bene woagatu afɔ wo dzi, eye emegbe woatrɔ avuvu mi o.  “Minɔ ebiabia dzi, eye woana mi; minɔ edidi dzi, eye miakpɔe; minɔ ʋɔƒoƒo dzi, eye woaʋui na mi.  Elabena ame sia ame, si le nu biam la, exɔnɛ; eye ame sia ame si le nu dim la, ekpɔnɛ; eye ame sia ame si le ʋɔ ƒom la, woaʋui nɛ.  Le nyateƒe me la, ame kae le mia dome, si via le abolo biamee . . . matsɔ kpe ade esi o ɖe, menye nenemae oa? 10  Alo ɖewohĩ abia tɔmelã . . . matsɔ da ade esi o ɖe, alo awɔea? 11  Eya ta ne mi ame vɔ̃ɖiwo kura gɔ̃ hã, mienya ale si miana nunana nyuiwo mia viwo la, ɖe mia Fofo si le dziƒo la mana nu nyuiwo ame siwo bianɛ la geɖe wu oa? 12  “Eya ta nu sia nu si miedina be amewo nawɔ na mi la, ele be miawo hã miawɔ nenema ke na wo; le nyateƒe me la, nu siae Se la kple Nyagblɔɖilawo ƒe nyawo fia. 13  “Miyi ɖe eme to agbo bii la nu; elabena mɔ si kplɔa ame yia tsɔtsrɔ̃ me la keke hele gbadzaa, eye ame geɖewoe nye ame siwo le edzi yina ɖe eme; 14  gake agbo la le biie, eye mɔ si kplɔa ame yia agbe me la xaxa, eye ame ʋɛ aɖewo koe nye ame siwo kpɔnɛ. 15  “Mikpɔ nyuie le aʋatsonyagblɔɖila siwo vaa mia gbɔ le alẽgbalẽ me, evɔ le ememe la, wonye amegãxi nyanyrawo la ŋuti. 16  Woƒe kutsetsewoe miatsɔ adze si woe. Womegbea waintsetsewo le aŋɔkawo dzi, alo gbowo le srẽwo dzi gbeɖe o, alo menye nenemae oa? 17  Nenema kee ati nyui sia ati nyui tsea ku nyui, gake ati vóvo ɖe sia ɖe tsea ku si menyo na naneke o; 18  ati nyui mate ŋu atse ku si menyo na naneke o, eye ati vóvo hã mate ŋu atse ku nyui o. 19  Ati sia ati si metsea ku nyui o la, wolãnɛ, eye wotsɔnɛ ƒua gbe ɖe dzo me. 20  Eya ta ame mawo ƒe tsetsewo ye miatsɔ adze si wo vavã. 21  “Menye ame sia ame si le gbɔgblɔm nam be, ‘Aƒetɔ, Aƒetɔ,’ ye ayi ɖe dziƒofiaɖuƒe la me o, ke ame si le Fofonye si le dziƒowo ƒe lɔlɔ̃nu wɔm lae ayi ɖe eme. 22  Ame geɖewo agblɔ nam le ŋkeke ma dzi be, ‘Aƒetɔ, Aƒetɔ, ɖe míegblɔ nya ɖi le wò ŋkɔ me, eye míenya gbɔgbɔ vɔ̃wo do goe le wò ŋkɔ me, eye míewɔ ŋusẽdɔ geɖewo le wò ŋkɔ me oa?’ 23  Gake maʋu eme na wo be: Nyemenya mi kpɔ o! Mite ɖa le gbɔnye, mi sedzimawɔlawo. 24  “Eya ta ame sia ame si sea nye nya siawo, eye wòwɔa wo dzi la, woatsɔe asɔ kple ŋutsu dzeaɖaŋu, si tu eƒe xɔ ɖe agakpe dzi. 25  Eye tsi gã aɖe dza, eye tɔwo ɖɔ, eye ya ƒo va lɔ xɔ ma, gake memu o, elabena woɖo egɔme anyi ɖe agakpe dzi. 26  Eye ame sia ame si sea nye nya siawo, eye mewɔa wo dzi o la, woatsɔe asɔ kple ŋutsu tsibome, si tu eƒe xɔ ɖe ke dzi. 27  Eye tsi gã aɖe dza, eye tɔwo ɖɔ, eye ya ƒo va lɔ xɔ ma, eye wòmu hegbã gudugudu.” 28  Ke esi Yesu wu nya siawo nu la, dɔ si wòwɔ ɖe amehaawo dzie nye be, wolulu le ale si wòfia nui ta, 29  elabena enɔ nu fiam wo abe ame si si ŋusẽ le ene, ke menye abe woƒe agbalẽfialawo ene o.

Etenuŋɔŋlɔ