Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 5:1-48

5  Esi wòkpɔ amehaawo la, eyi ɖe to la dzi; eye esi wòbɔbɔ nɔ anyi la, eƒe nusrɔ̃lawo va egbɔ;  eye wòke nu hete nufiafia wo be:  “Dzidzɔtɔwoe nye ame siwo nyae be gbɔgbɔmenuwo hiã yewo, elabena woawo tɔe nye dziƒofiaɖuƒe la.  “Dzidzɔtɔwoe nye ame siwo le nu xam, elabena woafa akɔ na wo.  “Dzidzɔtɔwoe nye ame fafawo, elabena woanyi anyigba la dome.  “Dzidzɔtɔwoe nye ame siwo dzɔdzɔenyenye ƒe dɔ kple tsikɔ le wuwum, elabena woana woaɖi ƒo.  “Dzidzɔtɔwoe nye nublanuikpɔlawo, elabena woakpɔ nublanui na wo.  “Dzidzɔtɔwoe nye ame siwo dza le dzi me, elabena woakpɔ Mawu.  “Dzidzɔtɔwoe nye ŋutifafawɔlawo, elabena woayɔ wo be ‘Mawu ƒe viwo.’ 10  “Dzidzɔtɔwoe nye ame siwo yome wotina le dzɔdzɔenyenye ta, elabena woawo tɔe nye dziƒofiaɖuƒe la. 11  “Dzidzɔtɔwoe mianye ne amewo do vlo mi, eye woti mia yome, eye woka aʋatso gblɔ nya vɔ̃ ɖe sia ɖe ƒomevi ɖe mia ŋu le tanye. 12  Dzi nedzɔ mi, eye miti kpo kple dzidzɔ, elabena miaƒe fetu lolo le dziƒowo; elabena nenema kee woti nyagblɔɖila siwo do ŋgɔ na mi hã yome. 13  “Miawoe nye anyigba ƒe dze; ke ne dze bu eƒe ŋusẽ ɖe, nu kae woawɔ nɛ be wòagatrɔ azu dze? Womagate ŋu azãe na naneke o, ɖeko woatsɔe aƒu gbe ɖe xexe be amewo nazɔ edzi. 14  “Miawoe nye xexea ƒe kekeli. Womate ŋu aɣla du si le to dzi la o. 15  Ne wosi akaɖi la, wometsɔnɛ dana ɖe nudokusi te o, ke ɖe akaɖiti dzi boŋ, eye wòklẽna ɖe ame siwo katã le aƒea me la dzi. 16  Nenema kee mina miaƒe kekeli naklẽ le amewo ŋkume, bene woakpɔ miaƒe dɔwɔwɔ nyuiwo, eye woatsɔ ŋutikɔkɔe ana mia Fofo si le dziƒowo. 17  “Migasusu be ɖe meva Se la kple Nyagblɔɖilawo ɖe ge ɖa o. Nyemeva be maɖe wo ɖa o, ke boŋ be mana woava eme; 18  elabena vavã mele egblɔm na mi be, ele bɔbɔe be dziƒo kple anyigba nu nava yi kaba wu be ŋɔŋlɔdzesi suetɔ ɖeka, alo ŋɔŋlɔdzesi aɖe si le Sea me ƒe kakɛ aɖe, nu nayi le mɔ aɖe nu, hafi nu siwo katã woŋlɔ ɖe eme la nava eme. 19  Eya ta ame si dana le se siawo dometɔ suetɔ ɖeka gɔ̃ hã dzi, eye wòfiaa nu amewo nenema la, woayɔe be ‘suetɔ’ le dziƒofiaɖuƒea gome. Gake ame si wɔna ɖe wo dzi, eye wòfiaa wo amewo la, woayɔ ame sia be ‘gã’ le dziƒofiaɖuƒe la gome. 20  Elabena mele egblɔm na mi be, ne miaƒe dzɔdzɔenyenye mewu agbalẽfialawo kple Farisitɔwo tɔ o la, miele yiyi ge ɖe dziƒofiaɖuƒe la me akpɔ gbeɖe o. 21  “Miese be wogblɔ na blematɔwo be, ‘Mele be nàwu ame o; ke ame si wu ame la, adze ʋɔnudɔdrɔ̃.’ 22  Gake nye ya mele egblɔm na mi be, ame si le dɔmedzoe dom ɖe nɔvia ŋu la, woabia akɔntae le ʋɔnudrɔ̃ƒe; eye ame sia ame si agblɔ gbɔɖiamenya aɖe ɖe nɔvia ŋu atsɔ ado ŋukpee la, woabia akɔntae le Ʋɔnudrɔ̃ƒe Kɔkɔtɔ ŋkume; eye ame sia ame si agblɔ be, ‘Èdzɔ lã ŋutɔ!’ la, adze na Gehena* si me dzo le la. 23  “Eya ta ne ètsɔ wò nunana gbɔna vɔsamlekpuia gbɔ, eye nèɖo ŋku edzi le afi ma be nya aɖe le nɔviwò si ɖe ŋuwò la, 24  ekema gblẽ wò nunana la ɖe afi ma le vɔsamlekpuia ŋgɔ, eye dzo nàyi; wɔ ŋutifafa kple nɔviwòa gbã, eye emegbe ne ètrɔ gbɔ la, nàtsɔ wò nunana la ana. 25  “Ne ame aɖe sama wò, eye mia kplii mieyina ʋɔnudrɔ̃ƒe la, dzra mia kplii dome ɖo kaba le mɔa dzi, bene ame si sama wò la nagatsɔ wò ade asi na ʋɔnudrɔ̃la, ne ʋɔnudrɔ̃la hã natsɔ wò ade asi na atikplɔtɔ, ne woatsɔ wò aƒu gbe ɖe gaxɔ me o. 26  Vavã mele egblɔm na wò be: Mèle go do ge le afi ma akpɔ o va se ɖe esime nàxe gaku sue, si meɖi naneke o la, ƒe mamlɛtɔ gɔ̃ hã. 27  “Miese be wogblɔ be, ‘Mele be nàwɔ ahasi o.’ 28  Gake nye ya mele egblɔm na mi be, ame sia ame si yia edzi nɔa ŋku lém ɖe nyɔnu aɖe ŋu, si na wòdzroe la, ewɔ ahasi kplii xoxo le eƒe dzi me. 29  Eya ta ne wò ɖusimeŋku ma le nukikli zum na wò la, hoe, eye nàtsɔe aƒu gbe ɖa le ɖokuiwò ŋu. Elabena ne èbu wò ŋutinuwo dometɔ ɖeka la, aɖe vi geɖe na wò wu, be woatsɔ wò ŋutilã blibo la katã aƒu gbe ɖe Gehena. 30  Nenema kee ne wò nuɖusi le nukikli zum na wò la, lãe, eye nàtsɔe aƒu gbe ɖa le ɖokuiwò ŋu. Elabena ne èbu wò ŋutinuwo dometɔ ɖeka la, aɖe vi geɖe na wò wu, be wò ŋutilã blibo la katã nayi Gehena. 31  “Gawu la, wogblɔ be, ‘Ame si gbe srɔ̃a la, nena srɔ̃gbegbalẽe.’ 32  Ke nye ya mele egblɔm na mi be, ame sia ame si gbe srɔ̃a, ne menye le agbe gbegblẽ nɔnɔ ta o la, de nyɔnua ahasiwɔwɔ ƒe afɔku me, eye ame sia ame si ɖe nyɔnu si wogbe la, ewɔ ahasi. 33  “Miese hã be wogblɔ na blematɔwo be, ‘Mele be nàka atam agbe edziwɔwɔ o, ke boŋ be ele be nàwɔ adzɔgbe siwo nèɖe na Yehowa la dzi.’ 34  Gake nye ya mele egblɔm na mi be: Migata nu kura o, eɖanye dziƒo o, elabena Mawu ƒe fiazikpui wònye; 35  alo anyigba o, elabena eƒe afɔɖodzinue; alo Yerusalem o, elabena Fia gã la ƒe due. 36  Eye mele be nàta wò ta hã o, elabena màte ŋu atrɔ ɖakui ɖeka wòanɔ ɣie alo yibɔ o. 37  Mina miaƒe Ɛ̃ nanye Ɛ̃ ko, eye miaƒe Ao nanye Ao ko, elabena nu si wu esiawo la, vɔ̃ɖitɔ la gbɔe wòtso. 38  “Miese be wogblɔ be, ‘Ŋku ɖe ŋku teƒe, eye aɖu ɖe aɖu teƒe.’ 39  Ke nye ya mele egblɔm na mi be: Migatsi tsitre ɖe ame vɔ̃ɖi la ŋu o; ke boŋ ame sia ame si ƒo wò ɖusi tome la, trɔ ekemɛ hã nɛ. 40  Eye ne ame aɖe di be yeahe wò ayi ʋɔnu ne yeaxɔ wò awutewui la, tsɔ wò awudziwui hã nɛ; 41  eye ne ŋusẽtɔ aɖe zi dziwò be nàwɔ dɔ aɖe na ye ahazɔ kpli ye kilometa ɖeka la, zɔ kilometa eve kplii. 42  Na nu ame si le nu biam wò, eye mègagbe nudodo na ame si di be nàdo nu na ye dememaxɔmaxɔe la o. 43  “Miese be wogblɔ be, ‘Ele be nàlɔ̃ hawòvi, eye nàlé fu wò ketɔ.’ 44  Ke nye ya mele egblɔm na mi be: Miyi edzi mialɔ̃ miaƒe futɔwo, eye mianɔ gbe dom ɖa ɖe ame siwo tia mia yome la ta; 45  bene miaɖee afia be mienye mia Fofo si le dziƒowo la ƒe viwo, elabena enana eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo. 46  Elabena ne ame siwo lɔ̃a mi koe mielɔ̃na ɖe, fetu kae miekpɔna? Ðe nudzɔlawo hã mewɔa nenema ke oa? 47  Eye ne mia nɔviwo koe miedoa gbe na ɖe, nu tɔxɛ kae wònye wɔm miele? Ðe dukɔwo me tɔwo hã mewɔa nenema ke oa? 48  Eya ta ele be mianɔ blibo, abe ale si mia Fofo si le dziƒo la le bliboe ene.

Etenuŋɔŋlɔ

Afi si wotɔa dzo gbeɖuɖɔwo ɖo le Yerusalem dua godo.