Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 27:1-66

27  Esi ŋu ke la, nunɔlawo ƒe tatɔwo katã kple dumegãwo de adaŋu ɖe Yesu ŋu, ne woawui.  Eye esi woblae vɔ la, wokplɔe yi ɖade asi na nutomefia Pilato.  Eye esi Yuda, ame si dee asi la, kpɔ be wotso kufia nɛ la, evee, eye wòtrɔ klosalo blaetɔ̃ la yi na nunɔlawo ƒe tatɔwo kple amegãwo,  gblɔ be: “Mewɔ nu vɔ̃ be mede ʋu dzɔdzɔe asi.” Wogblɔ be: “Afi kae nya ma ka na mí? Wò ŋutɔ kpɔ egbɔ!”  Eya ta etsɔ klosaloawo ƒu gbe ɖe gbedoxɔa me, eye wòdzo yi ɖade ka ve na eɖokui.  Gake nunɔlawo ƒe tatɔwo fɔ klosaloawo hegblɔ be: “Se meɖe mɔ be míatsɔ wo ade nudzɔɖaka kɔkɔeawo me o, elabena ʋuƒlega wonye.”  Esi wolée kpɔ le wo nɔewo dome vɔ la, wotsɔ wo ƒle zemela ƒe anyigba, be wòanye amedzrowo ɖiƒe.  Eya ta woyɔa anyigba ma be “Ʋunyigba” va se ɖe egbegbe.  Ale nya si wogblɔ ɖi to nyagblɔɖila Yeremiya* dzi la va eme, be: “Eye wotsɔ klosalo blaetɔ̃, si woxe ɖe ame si ŋu wodo asi ɖo, ame si ŋu Israel viwo dometɔ aɖewo do asi ɖo, la ta, 10  eye wotsɔe na ɖe zemela ƒe anyigba ta, abe ale si Yehowa de se nam ene.” 11  Ke Yesu nɔ tsitre ɖe nutomefia la ŋkume; eye nutomefia la biae be: “Wòe nye Yudatɔwo ƒe fia laa?” Yesu ɖo eŋu be: “Wò ŋutɔe le egblɔm.” 12  Gake esi nunɔlawo ƒe tatɔwo kple amegãwo nɔ enu tsom la, meɖo nya aɖeke ŋu o. 13  Azɔ Pilato gblɔ nɛ be: “Mèle nya gbogbo siwo tsɔm wole ɖe ŋuwò la sem oa?” 14  Gake meɖo eŋu nɛ o, ao, meɖo nya ɖeka pɛ hã ŋu o, ale be nutomefia la ƒe mo wɔ yaa ŋutɔ. 15  Ke le ŋkekenyui ɖe sia ɖe dzi la, nutomefia la ɖea asi le gamenɔla ɖeka si ameha la di ŋu na wo. 16  Ɣemaɣi tututu la, ŋutsu aɖe si ŋu ŋkɔ nyui aɖeke mele o, si woyɔna be Baraba, la nɔ ga me. 17  Eya ta esi woƒo ƒu la, Pilato gblɔ na wo be: “Ame ka ŋue miedi be maɖe asi le na mi, Baraba loo alo Yesu si woyɔna be Kristo laa?” 18  Elabena enya be ŋuʋaʋã tae wodee asi ɖo. 19  Gawu la, esi wòbɔbɔ nɔ ʋɔnudrɔ̃zikpuia dzi la, srɔ̃a ɖo ame ɖee gblɔ be: “Mègawɔ naneke ame dzɔdzɔe ma o, elabena mekpe fu geɖe le drɔ̃e me egbea le eyama ta.” 20  Gake nunɔlawo ƒe tatɔwo kple amegãwo ƒoe ɖe amehaawo nu be woabia be woaɖe asi le Baraba ŋu, gake be woawu Yesu ya. 21  Eya ta nutomefia la ɖo eŋu na wo gblɔ be: “Ame eve siawo dometɔ ka ŋue miedi be maɖe asi le na mi?” Wogblɔ be: “Baraba.” 22  Pilato bia wo be: “Ekema nu kae mawɔ Yesu si woyɔna be Kristo la?” Wo katã wogblɔ be: “Na woahee ɖe ati ŋu!” 23  Egblɔ be: “Nu ka ta, nu vɔ̃ɖi kae wòwɔ?” Ðeko woganɔ ɣli dom sesĩe wu be: “Na woahee ɖe ati ŋu!” 24  Esi Pilato kpɔ be viɖe aɖeke medo tso yeƒe agbagbadzedzea me o, ke boŋ be zi di be yeatɔ ta la, etsɔ tsi klɔ asi le ameha la ŋkume, gblɔ be: “Ŋutsu sia ƒe ʋu ŋuti fɔɖiɖi aɖeke mele dzinye o. Mia ŋutɔwo mikpɔ egbɔ.” 25  Ale ameawo katã ɖo eŋu gblɔ be: “Eƒe ʋu neva mía kple mía viwo dzi.” 26  Eye wòɖe asi le Baraba ŋu na wo, gake ena woƒo Yesu kple atam, eye wòtsɔe de asi be woahee ɖe ati ŋu. 27  Azɔ nutomefia la ƒe asrafowo kplɔ Yesu yi nutomefia la ƒe fiasã me, eye wona asrafoha blibo la katã va ƒo ƒu ɖe eŋu. 28  Eye esi woɖe awu le eŋu vɔ la, wodo awu ʋlaya hɛ̃ aɖe nɛ, 29  eye wotsɔ ŋuka lɔ̃ fiakuku heɖɔ nɛ, eye wotsɔ aƒla de nuɖusi me nɛ. Eye esi wodze klo ɖe eŋkume la, woɖu fewu le eŋu gblɔ be: “Míedo gbe na wò, Yudatɔwo ƒe Fia!” 30  Eye woɖe ta ɖe eŋu, xɔ aƒla la le esi, eye wode asi etsɔtsɔ ƒo tame nɛ me. 31  Mlɔeba esi woɖu fewu le eŋu vɔ la, woɖe awu ʋlaya la le eŋu, eye wodo eƒe awudziwuiwo nɛ, eye wokplɔe yi, be woahee ɖe ati ŋu. 32  Esi wonɔ dodom la, wokpɔ Kirene vidzidzi aɖe si ŋkɔe nye Simon. Wozi ŋutsu sia dzi be wòatsɔ eƒe fuwɔameti la. 33  Eye esi woɖo teƒe si woyɔna be Golgota, si gɔmee nye Ametakoliƒe la, 34  wotsɔ wain si wotsɔ gbe veve aɖe tsakae la nae be wòano; gake esi wòɖɔe kpɔ la, egbe enono. 35  Esi wohee ɖe ati ŋu la, wodzidze nu ɖe eƒe awudziwuiwo dzi, eye woma wo, 36  eye wobɔbɔ nɔ anyi ɖe afi ma nɔ eŋu dzɔm. 37  Woŋlɔ nutsotso si wona ɖe eŋu la hã ɖe eƒe ta gbɔ be: “Yesu, Yudatɔwo ƒe Fia, lae nye esi.” 38  Eye wohe adzodala eve ɖe ati ŋu kpe ɖe eŋu, ɖeka ɖe eƒe ɖusi me, eye ɖeka ɖe eƒe mia me. 39  Eye ame siwo va nɔ eme tsom nɔ yiyim la te edzudzu, henɔ ta ʋuʋum 40  nɔ gbɔgblɔm be: “Oo, wò ame si gblɔ be yeamu gbedoxɔ la aƒu anyi ahagbugbɔe atu le ŋkeke etɔ̃ me, ɖe ɖokuiwòe! Ne Mawu ƒe vie nènye la, ekema ɖi le fuwɔameti la ŋue!” 41  Nenema kee nunɔlawo ƒe tatɔwo kple agbalẽfialawo kpakple amegãwo te fewuɖuɖu le eŋu gblɔ be: 42  “Eɖe ame bubuwo; mate ŋu aɖe eya ŋutɔ ɖokui o! Israel Fia wònyee; neɖi tso fuwɔametia ŋu azɔ, ekema míaxɔ edzi ase. 43  Eɖo ŋu ɖe Mawu ŋu, ne eƒe nu nyoa eŋu la, ekema nexɔ nɛ azɔe, elabena egblɔ be, ‘Mawu ƒe Vie menye.’” 44  Nenema kee adzodala siwo wohe ɖe ati ŋu kpe ɖe eŋuti kura gɔ̃ hã te vlododoe. 45  Tso gaƒoƒo adelia* dzi la, viviti do ɖe anyigba blibo la katã dzi va se ɖe gaƒoƒo asiekelia* dzi. 46  Le gaƒoƒo asiekelia lɔƒo dzi la, Yesu do ɣli kple gbe sesẽ be: “Eli, Eli, lama sabaxtani?” si gɔmee nye, “Nye Mawu, nye Mawu, nu ka ta nègblẽm ɖi?” 47  Esi ame siwo nɔ tsitre ɖe afi ma dometɔ aɖewo see la, wote gbɔgblɔ be: “Ŋutsu sia le Eliya yɔm.” 48  Eye enumake wo dometɔ ɖeka ƒu du tsɔ ƒumekutsa de wain tsitsi me, tsɔe ɖo aƒla nu, eye wòtsɔe nae be wòano. 49  Gake wo dometɔ susɔeawo gblɔ be: “Ðe asi le eŋu! Mina míakpɔe ɖa be Eliya ava ɖee hã.” [[Ame bubu tsɔ akplɔ tɔ eƒe axadame, eye ʋu kple tsi do.]] 50  Yesu gado ɣli kple gbe sesẽ ake, eye wòtsɔ eƒe gbɔgbɔ la na. 51  Eye kpɔ ɖa! Gbedoxɔa ƒe xɔmetsovɔ la dze ɖe eve tso etame va se ɖe egɔme, eye anyigba ʋuʋu, eye agakpe gãwo fe. 52  Eye ŋkuɖodziyɔdowo nu ʋu, eye ame kɔkɔe siwo dɔ alɔ̃ la dometɔ geɖe ƒe ŋutilãwo ho ɖe dzi, 53  eye wodze ame geɖewo kpɔ (eye ame siwo trɔ tso afi si ŋkuɖodziyɔdoawo nɔ le eƒe tsitretsitsi megbe la va du kɔkɔe la me). 54  Gake esi asrafomegã la kple eŋutime siwo nɔ Yesu ŋu dzɔm la kpɔ anyigbaʋuʋu la kple nu siwo nɔ dzɔdzɔm la, wovɔ̃ ŋutɔ, eye wogblɔ be: “Mawu ƒe Vie ame sia nye vavã.” 55  Nyɔnu geɖe siwo kplɔ Yesu ɖo henɔ esubɔm tso Galilea hã nɔ afi ma nɔ nu kpɔm tso adzɔge; 56  wo dometɔ aɖewoe nye Maria Magdalatɔ kple Maria, Yakobo kple Yose dada, kpakple Zebedeo viwo dada. 57  Ke esi fiẽsi nɔ ɖoɖom ta la, kesinɔtɔ aɖe si tso Arimatia, si ŋkɔe nye Yosef la va, ame si ŋutɔ hã va zu Yesu ƒe nusrɔ̃la. 58  Ame sia yi Pilato gbɔ hebia be wòatsɔ Yesu ƒe kukua ana ye. Eye Pilato ɖe gbe be woatsɔe anae. 59  Eye Yosef xɔ ame kukua, eye wòxatsa aklala nyui dzadzɛ aɖe ɖe eŋu, 60  eye wòtsɔe mlɔ eƒe ŋkuɖodziyɔdo yeye, si wòna woɖe ɖe agakpe me la me. Eye esi wòmli kpe gã aɖe tsɔ xe ŋkuɖodziyɔdoa nu vɔ la, edzo. 61  Gake Maria Magdalatɔ kple Maria kemɛ la tsi afi ma, nɔ anyi ɖe yɔdoa ŋgɔ. 62  Le ŋkeke si kplɔe ɖo, si nye Dzadzraɖoŋkeke la megbe la, nunɔlawo ƒe tatɔwo kple Farisitɔwo va ƒo ƒu ɖe Pilato ŋkume, 63  gblɔ be: “Aƒetɔ, míeɖo ŋku edzi be, esime ameblela ma nɔ agbe la, egblɔ be, ‘Le ŋkeke etɔ̃ megbe la, woafɔm ɖe tsitre.’ 64  Eya ta de se be woadzɔ yɔdo la ŋu nyuie va se ɖe ŋkeke etɔ̃agbe, ne eƒe nusrɔ̃lawo nagava fii adzoe ahagblɔ na amewo be, ‘Wofɔe ɖe tsitre tso ame kukuwo dome!’ ne amebeble mamlɛtɔ sia navɔ̃ɖi wu gbãtɔ o.” 65  Pilato gblɔ na wo be: “Dzɔlawo li. Miheyi miadzɔ eŋu ale si miate ŋui.” 66  Eya ta wodzo ɖatre yɔdo la nu nyuie heɖo dzɔlawo afi ma.

Etenuŋɔŋlɔ

Zax 11:12, 13 mee woyɔ nya siawo tsoe. Le Mateo ƒe ɣeyiɣia me la, Yeremiya ƒe agbalẽae nye nyagblɔɖigbalẽawo ƒe gbãtɔ, eye ŋkɔ ‘Yeremiya’ anya tsi tsitre ɖi na nyagblɔɖigbalẽawo katã, siwo dome Zaxariya ƒe agbalẽa hã le. Tsɔe sɔ kple Lk 24:44.
Ŋdɔ ga 12 lɔƒo.
Ŋdɔ ga 3 lɔƒo.