Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 21:1-46

21  Eye esi wogogo Yerusalem heva ɖo Betfage le Amitoa dzi la, Yesu dɔ nusrɔ̃la eve  hegblɔ na wo be: “Miyi kɔƒe si kpɔm miele le mia ŋgɔ la me, eye enumake miakpɔ tedzi aɖe le ka me, eye tedzivi aɖe le egbɔ; miɖe ka wo, eye miakplɔ wo vae nam.  Eye ne ame aɖe gblɔ nya aɖe na mi la, migblɔ be, ‘Aƒetɔ la le wo hiãm.’ Eye enumake aɖo wo ɖa.”  Nu sia dzɔ nenema, bene nya si wogblɔ ɖi to nyagblɔɖilaa dzi la nava eme, be:  “Migblɔ na Zion vinyɔnuvi la be: ‘Kpɔ ɖa! Wò Fia gbɔna gbɔwò, ame fafa wònye, eye wòbɔbɔ nɔ tedzi dzi, ɛ̃, ebɔbɔ nɔ tedzivi, si nye agbatsɔlã ƒe vi dzi.’”  Eya ta nusrɔ̃lawo dze mɔ yi, eye wowɔe pɛpɛpɛ abe ale si Yesu de se na wo ene.  Eye wokplɔ tedzi la kple via vae, eye wotsɔ woƒe awudziwuiwo ɖo ɖe wo dzi, eye wòbɔbɔ nɔ wo dzi.  Ameha la me tɔ akpa gãtɔ ɖo woƒe awudziwuiwo ɖe mɔa dzi, eye bubuwo te atiwo ƒe alɔwo ŋeŋe, eye woda wo ɖe mɔa dzi keŋ.  Ke ameha siwo dze ŋgɔ kple esiwo le megbe la nɔ ɣlidodo dzi be: “Míeɖe kuku, David Vi, xɔ na mí! Woayra ame si gbɔna le Yehowa ƒe ŋkɔ me! Míeɖe kuku, xɔ nɛ, wò ame si le dziƒo ʋĩi!” 10  Ke esi wòva ɖo Yerusalem la, zi tɔ le du blibo la katã me, eye amewo nɔ biabiam be: “Ame kae nye esia?” 11  Amehaawo yi edzi nɔ gbɔgblɔm be: “Nyagblɔɖila Yesu, si tso Nazaret le Galilea lae!” 12  Eye Yesu ge ɖe gbedoxɔa me, eye wònya ame siwo le nu dzram kple ame siwo le nu ƒlem le gbedoxɔa me la katã do goe, eye wòmu gaɖɔlilawo ƒe kplɔ̃wo kple ahɔnɛdzralawo ƒe bentsiwo ƒu anyi. 13  Eye wògblɔ na wo be: “Woŋlɔe ɖi be, ‘Woayɔ nye aƒe la be gbedoɖaƒe,’ ke miawo ya miele ewɔm adzodalawo ƒe doe.” 14  Ŋkuagbãtɔwo kple atatututɔwo hã va egbɔ le gbedoxɔa me, eye wòda gbe le wo ŋu. 15  Esi nunɔlawo ƒe tatɔwo kple agbalẽfialawo kpɔ nu wɔnuku siwo wòwɔ, kple ŋutsuvi siwo nɔ ɣli dom le gbedoxɔa me nɔ gbɔgblɔm be: “Míeɖe kuku, David Vi, xɔ na mí!” la, dɔme ve wo, 16  eye wobiae be: “Èle nya si gblɔm wole la sema?” Yesu ɖo eŋu na wo be: “Ɛ̃. Ðe miexlẽ nya sia kpɔ be, ‘Vidzĩwo kple vi nonowo ƒe nu me nèdzra kafukafu ɖo’ oa?” 17  Eye esi wògblẽ wo ɖi la, edo go le dua me yi Betania hetsi afi ma dɔ. 18  Esi wòtrɔ yina dua me le ŋdikanya la, dɔ wui. 19  Eye eƒe ŋku kli gboti aɖe le mɔ to, eye wòte ɖe eŋu, gake mekpɔ naneke le edzi o, negbe aŋgbawo ko, eye wògblɔ nɛ be: “Màgatse akpɔ gbeɖegbeɖe o.” Eye gboti la yrɔ enumake. 20  Gake esi nusrɔ̃lawo kpɔ esia la, ewɔ nuku na wo, eye wogblɔ be: “Aleke wɔ gboti la yrɔ enumake?” 21  Yesu ɖo eŋu na wo be: “Vavã mele egblɔm na mi be: Ne xɔse le mia si, eye mieke ɖi o ko la, menye nu si mewɔ na gboti la ɖeɖe koe miawɔ o, ke boŋ ne miegblɔ na to sia be, ‘Ho nàyi aɖadze atsiaƒu me’ la, ava eme. 22  Eye nu sia nu si miebiana le gbedodoɖa me la, ne xɔse le mia si la, miaxɔ wo.” 23  Eye esi wòyi gbedoxɔa me la, nunɔlawo ƒe tatɔwo kple dukɔa ƒe amegãwo va egbɔ esime wònɔ nu fiam, eye wobiae be: “Ŋusẽ kae nètsɔna wɔa nu siawo? Eye ame kae na ŋusẽ sia wò?” 24  Yesu ɖo eŋu gblɔ na wo be: “Nye hã mabia nya ɖeka mi. Ne miegblɔe nam la, ekema nye hã magblɔ ŋusẽ si metsɔna wɔa nu siawoe la na mi: 25  Yohanes ƒe nyɔnyrɔnana la ɖe, afi kae wòtso? Dziƒo loo alo amegbetɔwo gbɔ?” Gake wote nyaa léle kpɔ le wo nɔewo dome, gblɔ be: “Ne míegblɔ be, ‘Dziƒoe wòtso’ la, agblɔ na mí be, ‘Ekema nu ka tae miexɔ eyama dzi se o?’ 26  Gake ne míegblɔ be, ‘Etso amewo gbɔ la,’ ele be míakpɔ nyuie le ameha la ŋuti, elabena wo katã wobua Yohanes nyagblɔɖilae.” 27  Eya ta woɖo eŋu na Yesu be: “Míenya o.” Eya hã gblɔ na wo be: “Nye hã nyemagblɔ ŋusẽ si metsɔna wɔa nu siawoe la na mi o. 28  “Nu kae nye miaƒe susu? Vi eve nɔ ŋutsu aɖe si. Esi wòyi gbãtɔ gbɔ la, egblɔ nɛ be: ‘Vinye, yi ɖawɔ dɔ egbea le waingble la me.’ 29  Eɖo eŋu gblɔ be, ‘Aƒetɔ, mayi,’ gake meyi o. 30  Esi wòva evelia gbɔ la, egblɔ na eya hã nenema ke. Eya gblɔ be: ‘Nyemayi o.’ Emegbe evee, eye wòyi. 31  Ame eve siawo dometɔ kae wɔ fofoa ƒe lɔlɔ̃nu?” Woɖo eŋu be: “Evelia ye.” Yesu gblɔ na wo be: “Vavã mele egblɔm na mi be, nudzɔlawo kple gbolowo tre Mawu fiaɖuƒe la me yiyi na mi. 32  Elabena Yohanes va mia gbɔ le dzɔdzɔenyenye ƒe mɔ dzi, ke miexɔ edzi se o. Gake nudzɔlawo kple gbolowo ya xɔ edzi se, eye togbɔ be miekpɔ esia hã la, meve mi emegbe, ne miaxɔ edzi ase o. 33  “Mise kpɔɖeŋu bubu ɖa: Ame aɖe si nye aƒetɔ aɖe nɔ anyi, si de waingble, eye wòtɔ kpɔ ƒo xlãe, eye wòwɔ wainfiãƒe ɖe eme, eye wòtu xɔ kɔkɔ aɖe ɖe eme, eye wòtsɔe de asi na agbledela aɖewo, eye wòzɔ mɔ yi duta. 34  Esi nuŋeɣi ɖo la, edɔ eƒe kluviwo ɖe agbledelaawo gbɔ, be woaxɔ yeƒe kutsetsewo avae. 35  Ke agbledelaawo lé eƒe kluviawo, woƒo ɖeka, wowu ɖeka, eye woƒu kpe bubu. 36  Eye wògadɔ kluvi bubu siwo sɔ gbɔ wu gbãtɔawo ɖa, gake wowɔ nu siawo ke ɖe woawo hã ŋu. 37  Mlɔeba la, edɔ via ɖe wo gbɔ gblɔ be, ‘Woabu vinyea ya.’ 38  Ke esi agbledelaawo kpɔ via la, wogblɔ le wo nɔewo dome be, ‘Ame siae nye domenyila la; miva ne míawui, ne míaxɔ eƒe domenyinu la!’ 39  Ale wolée, eye wotsɔe ƒu gbe ɖe waingble la godo hewui. 40  Eya ta ne waingbletɔ la va ɖe, nu kae wòawɔ agbledela mawo?” 41  Woɖo eŋu nɛ be: “Esi wonye ame vɔ̃ɖiwo ta la, ahe tsɔtsrɔ̃ dziŋɔ ava wo dzi, eye wòatsɔ waingble la ade asi na agbledela bubu, siwo atsɔ kutsetsewo anae ne nuŋeɣi ɖo.” 42  Yesu gblɔ na wo be: “Ðe miexlẽe le Ŋɔŋlɔawo me kpɔ oa, be, ‘Kpe si xɔtulawo gbe la, eyae va zu dzogoedzikpe vevitɔ. Yehowa gbɔe esia tso va eme, eye wònye nukunu le míaƒe ŋkume’? 43  Esia tae mele egblɔm na mi be: Woaxɔ Mawu fiaɖuƒe la le mia si, eye woatsɔe ana dukɔ si tsea eƒe ku la. 44  Eye ame si adze kpe sia dzi la, agbã gudugudu. Eye ame sia ame si dzi wòage adze la, atui memie.” 45  Ke esi nunɔlawo ƒe tatɔwo kple Farisitɔwo se eƒe kpɔɖeŋuawo la, wokpɔe dze sii be yewo ŋue wònɔ nu ƒom tsoe. 46  Gake togbɔ be wonɔ didim be yewoalée hã la, wonɔ vɔvɔ̃m na amehaawo, elabena ame siawo bunɛ be enye nyagblɔɖila.

Etenuŋɔŋlɔ