Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 19:1-30

19  Azɔ esi Yesu wu nya siawo nu la, edzo le Galilea, eye wòva Yudea ƒe liƒowo dzi le Yordan godo.  Ameha geɖewo hã dze eyome, eye wòda gbe le wo ŋu le afi ma.  Eye Farisitɔwo va egbɔ kple susu be yewoatee kpɔ, eye wobiae be: “Ðe se ɖe mɔ na ŋutsu be wòagbe srɔ̃a le nya sia nya taa?”  Eɖo eŋu gblɔ be: “Ðe miexlẽe kpɔ be ame si wɔ ame tso gɔmedzedzea me la, atsu kple asi wòwɔ woe,  eye wògblɔ be, ‘Le esia ta ŋutsu agblẽ fofoa kple dadaa ɖi, eye wòalé ɖe srɔ̃a ŋu, eye woa kple eve la woazu ŋutilã ɖeka’ oa?  Eya ta womeganye eve o, ke boŋ ŋutilã ɖeka. Eya ŋuti nu si Mawu bla ɖekae la, ame aɖeke negama eme o.”  Wogblɔ nɛ be: “Ke nu ka tae Mose de se be woate ŋu ana srɔ̃gbegbalẽ nyɔnua ahagbee?”  Egblɔ na wo be: “Miaƒe dzimesesẽ tae Mose ɖe mɔ na mi be miagbe mia srɔ̃wo ɖo, gake menye nenemae wònɔ tso gɔmedzedzea me o.  Mele egblɔm na mi be ame sia ame si gbe srɔ̃a, ne menye le agbe gbegblẽ nɔnɔ ta o, eye wòɖe bubu la, ewɔ ahasi.” 10  Nusrɔ̃lawo gblɔ nɛ be: “Ne aleae ŋutsu kple srɔ̃a dome nya le la, ekema manyo be woaɖe srɔ̃ o ɖe!” 11  Egblɔ na wo be: “Menye amewo katãe tea ŋu wɔna ɖe nya sia dzi o, negbe ame siwo si nunana ma le la ko. 12  Elabena ame tata aɖewo li, siwo wodzi nenema tso wo dada ƒe dɔ me ke, eye ame tata aɖewo li, siwo amewoe ta wo, eye ame tata aɖewo li, siwo wɔ wo ɖokuiwo ame tatawoe le dziƒofiaɖuƒe la ta. Ame si ate ŋui la, newɔe.” 13  Azɔ wokplɔ ɖevi suewo va egbɔ, be wòada asi ɖe wo dzi ahado gbe ɖa ɖe wo ta, ke nusrɔ̃lawo blu ɖe wo ta. 14  Gake Yesu gblɔ be: “Migaɖe fu na ɖevi sueawo o, eye midzudzɔ mɔxexe na wo be woagava gbɔnye o, elabena ame siawo ƒomevi tɔe nye dziƒofiaɖuƒe la.” 15  Eye wòda eƒe asiwo ɖe wo dzi, eye wòdzo le afi ma. 16  Eye kpɔ ɖa! Ame aɖe va egbɔ gblɔ be: “Nufiala, nu nyui kae wòle be mawɔ be manyi agbe mavɔ dome?” 17  Egblɔ nɛ be: “Nu ka tae nèle nya biamem tso nu si nye nyui ŋu? Ame nyui ɖeka koe li. Gake ne èdi be yeage ɖe agbe la me la, yi edzi nànɔ seawo dzi wɔm.” 18  Ebiae be: “Kawo?” Yesu ɖo eŋu nɛ be: “Woawoe nye: Mele be nàwu ame o, Mele be nàwɔ ahasi o, Mele be nàfi fi o, Mele be nàɖi aʋatsoɖase o, 19  Bu fofowò kple dawò, eye, Ele be nàlɔ̃ hawòvi abe wò ŋutɔ ɖokuiwò ene.” 20  Ðekakpui la gblɔ nɛ be: “Mewɔa nu siawo katã; nu kae gasusɔ mawɔ?” 21  Yesu gblɔ nɛ be: “Ne èdi be yeanɔ blibo la, yi nàdzra nu siwo le asiwò, eye nàtsɔ wo ana ame dahewo, eye nu xɔasiwo anɔ asiwò le dziƒo, eye va dze yonyeme.” 22  Esi ɖekakpui la se nya sia la, edzo kple nuxaxa, elabena nu geɖe le esi. 23  Eye Yesu gblɔ na eƒe nusrɔ̃lawo be: “Vavã mele egblɔm na mi be, asesẽ na kesinɔtɔ be wòage ɖe dziƒofiaɖuƒe la me. 24  Megale egblɔm na mi ake be: Ele bɔbɔe na kposɔ be wòato tɔnui ƒe do me, wu be kesinɔtɔ nage ɖe Mawu fiaɖuƒe la me.” 25  Esi nusrɔ̃lawo se nya ma la, ewɔ nuku na wo ŋutɔ, eye wogblɔ be: “Ekema ame ka gɔ̃e ate ŋu akpɔ ɖeɖe?” 26  Yesu kpɔ woƒe ŋkume dũu, eye wògblɔ na wo be: “Amegbetɔwo gbɔ la, womate ŋu awɔ esia o; ke Mawu gbɔ la, woate ŋu awɔ nu sia nu.” 27  Eye Petro ɖo eŋu gblɔ nɛ be: “Kpɔ ɖa! Míegblẽ nuwo katã ɖi, eye míedze yowòme; nu ka tututue ava nye mía tɔ gome?” 28  Yesu gblɔ na wo be: “Vavã mele egblɔm na mi be: Le nuwo gbugbɔgawɔ me, ne Amegbetɔvi la bɔbɔ nɔ anyi ɖe eƒe ŋutikɔkɔefiazikpui dzi la, mi ame siwo dze yonyeme hã miabɔbɔ anɔ anyi ɖe fiazikpui wuieve dzi adrɔ̃ ʋɔnu Israel to wuieveawo. 29  Eye ame sia ame si gblẽ aƒewo alo nɔviŋutsuwo alo nɔvinyɔnuwo alo fofo alo dada alo viwo alo agblewo ɖi le nye ŋkɔ ta la, akpɔ wo ɖe eteƒe zi gbɔ zi geɖe, eye wòanyi agbe mavɔ dome. 30  “Gake ame geɖe siwo nye gbãtɔwo la azu mlɔetɔwo, eye mlɔetɔwo azu gbãtɔwo.

Etenuŋɔŋlɔ