Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 16:1-28

16  Farisitɔwo kple Zadukitɔwo va egbɔ le afi sia, eye be woatee akpɔ la, wobiae be wòawɔ dzesi aɖe tso dziƒo yewoakpɔ.  Eɖo eŋu na wo gblɔ be: “[[Ne fiẽ le ɖoɖom la, miegblɔna be, ‘Xexea me le kɔkɔ ge, elabena dziŋgɔli biã’;  eye le ŋdi la, miegblɔna be, ‘Vuvɔ awɔ, eye tsi adza egbea, elabena dziŋgɔli biã, eye wòxe litii.’ Mienyaa nu si dziŋgɔli ƒe nɔnɔme fiana, gake mienya nu si ɣeyiɣiawo ƒe dzesiwo ya fia o.]]  Dzidzime vɔ̃ɖi wɔahasi aɖe yi edzi le dzesi dim, gake womele dzesi aɖeke na gee o, negbe Yona ƒe dzesi la ko.” Ale wògblẽ wo ɖi hedzo le wo gbɔ.  Ke nusrɔ̃lawo tso ƒua yi go kemɛ dzi, eye woŋlɔ be wometsɔ abolo ɖe asi o.  Yesu gblɔ na wo be: “Mina miaƒe ŋkuwo nanɔ ʋuʋu, eye minɔ ŋudzɔ ɖe Farisitɔwo kple Zadukitɔwo ƒe amɔwɔʋãnu la ŋu.”  Eya ta wode asi elélekpɔ me le wo nɔewo dome gblɔ be: “Míetsɔ abolo aɖeke ɖe asi o.”  Esi Yesu nya esia la, egblɔ be: “Nu ka tae miele nya sia lém kpɔ le mia nɔewo dome, le esi abolo aɖeke mele mia si o ta? Mi xɔse ʋɛ tɔwo!  Ðe miekpɔ dze si nu haɖe oa, alo ɖe mieɖo ŋku abolo atɔ̃ siwo metsɔ nyi ame akpe atɔ̃, kple kusi ale si nu miefɔ la dzi oa? 10  Alo abolo adre siwo metsɔ nyi ame akpe ene, kple kusi gã si nu miefɔ la oa? 11  Aleke wɔ miese egɔme be menye abolo ƒe nya gblɔm menɔ na mi o? Gake mikpɔ nyuie le Farisitɔwo kple Zadukitɔwo ƒe amɔwɔʋãnu la ŋu.” 12  Eya ta wose egɔme be menye aboloʋãnu ŋue wògblɔ be yewoakpɔ nyuie le o, ke boŋ le Farisitɔwo kple Zadukitɔwo ƒe nufiafia ŋuti. 13  Azɔ esi Yesu va ɖo Kaisarea Filipi nutowo me la, ebia eƒe nusrɔ̃lawo be: “Ame kae amewo le gbɔgblɔm be Amegbetɔvi la nye?” 14  Wogblɔ be: “Ame aɖewo be Yohanes Amenyrɔɖetsimela, bubuwo be Eliya, bubuwo hã be Yeremiya alo nyagblɔɖilawo dometɔ ɖeka ye.” 15  Ebia wo be: “Ke miawo ya ɖe, ame kae miegblɔna be menye?” 16  Simon Petro ɖo eŋu gblɔ be: “Wòe nye Kristo la, Mawu gbagbe la ƒe Vi.” 17  Yesu ɖo eŋu nɛ gblɔ be: “Dzidzɔtɔe nènye, Simon, Yona vi, elabena menye ŋutilã kple ʋu ye ɖee fia wò o, ke boŋ Fofonye si le dziƒo lae. 18  Gawu la, mele egblɔm na wò be: Wòe nye Petro, eye nenem kpe gbadza sia dzie matu nye hame la ɖo, eye Hades* ƒe agbowo mate ŋu aɖu edzi o. 19  Matsɔ dziƒofiaɖuƒe la ƒe safuiwo ana wò, eye nu sia nu si nàbla le anyigba dzi la anye nu si le babla xoxo le dziƒowo, eye nu sia nu si nàtu le anyigba dzi la anye nu si le tutu xoxo le dziƒowo.” 20  Eye wòde se na nusrɔ̃lawo vevie be woagagblɔ na ame aɖeke be yee nye Kristo la o. 21  Tso ɣemaɣi la, Yesu Kristo te emeɖeɖe na eƒe nusrɔ̃lawo be ele be yeayi Yerusalem, eye yeakpe fu geɖe tso amegãwo kple nunɔlawo ƒe tatɔwo kpakple agbalẽfialawo si me, eye woawu ye, eye woafɔ ye ɖe tsitre le ŋkeke etɔ̃agbe. 22  Eye Petro ɖe kpɔe, hede asi mokaka nɛ me gblɔ be: “Aƒetɔ, di nyui na ɖokuiwò; esia madzɔ ɖe dziwò gbeɖe o.” 23  Gake etrɔ, eye wògblɔ na Petro be: “Te ɖa le gbɔnye, Satana! Nukikli nènye nam, elabena menye Mawu ƒe susuwo ŋu bum nèle o, ke boŋ amegbetɔwo tɔ.” 24  Eye Yesu gblɔ na eƒe nusrɔ̃lawo be: “Ne ame aɖe di be yeadze yonyeme la, negbe nu le eɖokui gbɔ, eye wòatsɔ eƒe fuwɔameti la, eye wòadze yonyeme ɖaa. 25  Elabena ame sia ame si dina be yeaɖe yeƒe luʋɔ la abui; gake ame sia ame si abu eƒe luʋɔ le tanye la akpɔe. 26  Elabena viɖe kae wòanye na ame, ne xexe blibo la katã zu etɔ, gake wòbu eƒe luʋɔ? Alo nu kae ame atsɔ ana ɖe eƒe luʋɔ ta? 27  Elabena ele be Amegbetɔvi la nava le Fofoa ƒe ŋutikɔkɔe me kple eƒe dɔlawo, eye ekema aɖo eteƒe na ame sia ame ɖe eƒe nuwɔna nu. 28  Vavãe mele egblɔm na mi be, ame aɖewo le ame siwo tsi tsitre ɖe afi sia dome, siwo maɖɔ ku kpɔ o va se ɖe esime wokpɔ Amegbetɔvi la wògbɔna le eƒe fiaɖuƒe la me hafi.”

Etenuŋɔŋlɔ

Kpɔ Nya Bubuwo, Akpa 8 lia.