Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Mateo 10:1-42

10  Eye wòyɔ eƒe nusrɔ̃la wuieveawo, eye wòna ŋusẽ wo ɖe gbɔgbɔ makɔmakɔwo dzi, bene woanya wo, eye woada dɔléle kple lãmegbegblẽ ɖe sia ɖe ƒomevi.  Apostolo wuieveawo ƒe ŋkɔwoe nye esiawo: Gbã la, Simon si woyɔna be Petro, kple nɔvia Andrea; Yakobo, Zebedeo vi, kple nɔvia Yohanes;  Filipo kple Bartolomeo; Toma kple Mateo, nudzɔla la; Yakobo, Alfeo vi, kple Tadeo;  Simon Veviedonula la, kple Yuda Iskariot, ame si va dee asi emegbe.  Ame wuieve siawoe Yesu dɔ hede se siawo na wo be: “Migayi ɖato dukɔwo ƒe mɔ dzi o, eye migage ɖe Samariatɔwo ƒe du aɖeke me o;  ke boŋ minɔ Israel ƒe aƒe me alẽ siwo bu la ko gbɔ yim.  Ne miele yiyim la, miɖe gbeƒã gblɔ be: ‘Dziƒofiaɖuƒe la gogo.’  Mida gbe le dɔnɔwo ŋu, mifɔ ame kukuwo ɖe tsitre, mina kpodɔlélawo ŋu nakɔ, minya gbɔgbɔ vɔ̃wo do goe. Faa miexɔe, faa minae.  Migadi sika alo klosalo alo akɔbli de miaƒe gabutuawo me o, 10  alo nuɖuɖukotoku na mɔzɔzɔa o, alo awutewui eve, alo afɔkpawo, alo atizɔti o; elabena dɔwɔla dze na eƒe nuɖuɖu. 11  “Du sia du alo kɔƒe sia kɔƒe si me mieyi la, midi ame si dze le eme la, eye minɔ afi ma va se ɖe esime miadzo. 12  Ne miele gegem ɖe aƒea me la, mido gbe na aƒea me tɔwo; 13  eye ne aƒea dze la, ŋutifafa si miedi nɛ la nava edzi; gake ne medze o la, miaƒe ŋutifafa natrɔ ava mia dzi. 14  Afi sia afi si ame aɖe mexɔ mi alo ɖo to miaƒe nyawo le o la, ne miele dzodzom le aƒe ma alo du ma me la, miʋuʋu ke le miaƒe afɔwo ŋu ɖe anyi. 15  Vavã mele egblɔm na mi be: Anɔ bɔbɔe na Sodom kple Gomora nyigba le Ʋɔnudrɔ̃ŋkeke la dzi wu ale si wòanɔ na du ma. 16  “Kpɔ ɖa! Mele mia dɔm abe alẽwo ene ɖe amegãxiwo dome; eya ta midze aye abe dawo ene, gake mianye fɔmaɖilawo abe ahɔnɛwo ene. 17  Mikpɔ mia ɖokui dzi nyuie le amewo ŋu; elabena woade mi asi na nutoa me ʋɔnudrɔ̃ƒewo, eye woaƒo mi kple atam le woƒe ƒuƒoƒewo. 18  Ɛ̃, woakplɔ mi ayi nutomefiawo kple dufiawo ŋkume le tanye, ne wòanye ɖaseɖiɖi na woa kple dukɔwo. 19  Gake ne wode mi asi la, migatsi dzimaɖi le ale si miaƒo nui alo nya si miagblɔ ŋuti o; elabena woatsɔ nya si miagblɔ la ana mi le gaƒoƒo ma me; 20  elabena menye miawo koe le nu ƒom o, ke boŋ mia Fofo ƒe gbɔgbɔ lae le nu ƒom to mia dzi. 21  Gawu la, nɔvi ade nɔvi asi be woawu, eye fofo ade via asi, eye ɖeviwo atsi tsitre ɖe dzilawo ŋu ahana woawu wo. 22  Eye amewo katã alé fu mi le nye ŋkɔ la ta; ke ame si do dzi va se ɖe nuwuwu la, eyae akpɔ ɖeɖe. 23  Ne woti mia yome le du aɖe me la, misi yi bubu me; elabena vavã mele egblɔm na mi be: Miele Israel duawo katã kpe ge ɖo gbeɖe hafi Amegbetɔvi la nava ɖo o. 24  “Nusrɔ̃la mewua eƒe nufiala o, eye kluvi hã mewua eƒe aƒetɔ o. 25  Esɔ gbɔ na nusrɔ̃la be wòava zu abe eƒe nufiala ene, eye na kluvi be wòava zu abe eƒe aƒetɔ ene. Ne amewo yɔa aƒetɔ la be Beelzebul la, ɖe womayɔ eƒe aƒea me tɔwo ya nenema geɖe wu oa? 26  Eya ta migavɔ̃ wo o; elabena wometsyɔ nu naneke dzi, si dzi womaɖe nu le o, eye naneke mele ɣaɣla, si womava nya o. 27  Nya siwo gblɔm mele na mi le viviti me la, migblɔe le kekeli me; eye nya si wodo dalĩ gblɔ miese la, minɔ xɔwo tame miaɖe gbeƒãe. 28  Eye migavɔ̃ ame siwo wua ŋutilã, gake womate ŋu awu luʋɔ o la o; ke boŋ mivɔ̃ ame si ate ŋu atsrɔ̃ luʋɔ kple ŋutilã siaa le Gehena.* 29  Ðe womedzraa atsutsrɔe eve xɔa gaku ɖeka, si ƒe home le sue oa? Ke hã, wo dometɔ ɖeka pɛ hã mage adze anyigba le mia Fofo ƒe manyamanya me o. 30  Ke woxlẽ miaƒe taɖawo katã kura gɔ̃ hã. 31  Eya ta migavɔ̃ o: Miexɔ asi sãsãsã wu atsutsrɔe geɖewo. 32  “Eya ta ame sia ame si ʋua eme le amewo ŋkume be tɔnyee yenye la, nye hã maʋu eme le Fofonye si le dziƒowo la ŋkume be tɔnyee wònye; 33  gake ame sia ame si agbe nu le gbɔnye le amewo ŋkume la, nye hã magbe nu le egbɔ le Fofonye si le dziƒowo la ŋkume. 34  Migasusu be meva ŋutifafa na ge le anyigba dzi o; nyemeva ŋutifafa na ge o, ke yi boŋ. 35  Elabena meva be made mama amewo dome: ŋutsu ɖe fofoa ŋu, vinyɔnu ɖe dadaa ŋu, eye srɔ̃nyɔnu ɖe lɔ̃xoa ŋu. 36  Ɛ̃, ame ƒe futɔwo anye ye ŋutɔ ƒemetɔwo. 37  Ame si lɔ̃a fofoa alo dadaa wum la, eya medzem o; eye ame si lɔ̃a viaŋutsu alo vianyɔnu wum la, eya medzem o. 38  Eye ame sia ame si melɔ̃ xɔ eƒe fuwɔameti la hedze yonyeme o la, eya medzem o. 39  Ame si ɖe eƒe luʋɔ la abui, eye ame si bu eƒe luʋɔ le tanye la, eya akpɔe. 40  “Ame si xɔa mi la xɔa nye hã, eye ame si xɔam la xɔa ame si dɔm ɖa la hã. 41  Ame si xɔa nyagblɔɖila le esi wònye nyagblɔɖila ta la, axɔ nyagblɔɖila ƒe fetu, eye ame si xɔa ame dzɔdzɔe le esi wònye ame dzɔdzɔe ta la, axɔ ame dzɔdzɔe ƒe fetu. 42  Eye ame sia ame si ana tsi fafɛ kplu ɖeka pɛ ame tsɛ siawo dometɔ ɖeka be wòano, le esi wònye nusrɔ̃la ta la, vavã mele egblɔm na mi be, eƒe fetu la mele eŋu tsi ge akpɔ o.”

Etenuŋɔŋlɔ

Afi si wotɔa dzo gbeɖuɖɔwo ɖo le Yerusalem dua godo.