Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Marko 9:1-50

9  Gawu la, egagblɔ na wo be: “Vavãe mele egblɔm na mi be: Ame aɖewo le ame siwo tsi tsitre ɖe afi sia dome, siwo maɖɔ ku kpɔ o, va se ɖe esime wokpɔ Mawu fiaɖuƒe la wòva le ŋusẽ me hafi.”  Eya ta le ŋkeke ade megbe la, Yesu kplɔ Petro kple Yakobo kpakple Yohanes ɖe asi, eye woawo ɖeɖe woyi to kɔkɔ aɖe dzi. Eye eƒe nɔnɔme trɔ le wo ŋkume,  eye eƒe awudziwuiwo nɔ dzo dam hefu tititi ale gbegbe be, nunyala aɖeke mele anyigba dzi si ate ŋu anya wo woafu nenema gbegbe o.  Azɔ hã, Eliya kple Mose dze wokpɔ, eye wonɔ dze ɖom kple Yesu.  Esia na Petro gblɔ na Yesu be: “Rabi, enyo na mí be míanɔ afi sia, eya ta na míatu agbadɔ etɔ̃, ɖeka na wò, ɖeka na Mose, eye ɖeka na Eliya.”  Le nyateƒe me la, menya nya si wòagblɔ o, elabena vɔvɔ̃ lé wo ŋutɔ.  Eye alilikpo aɖe va do vɔvɔli ɖe wo dzi, eye gbe aɖe ɖi tso alilikpoa me be: “Ame siae nye Vinye, si gbɔ nyemelɔ̃a nu le o; miɖo toe.”  Enumake wotsa ŋku godoo, gake womegakpɔ ame aɖeke le wo gbɔ o, negbe Yesu ɖeka ko.  Eye esi wonɔ ɖiɖim tso toa dzi gbɔna la, ede se na wo vevie be woagagblɔ nu si wokpɔ la na ame aɖeke o, va se ɖe esime Amegbetɔvi la fɔ tso ame kukuwo dome megbe hafi. 10  Eye wodzra nya la ɖo ɖe woƒe dzi me, gake wonɔ dze ɖom tso nu si eƒe fɔfɔ tso ame kukuwo dome sia fia ŋu le wo nɔewo dome. 11  Eye wode asi ebiabia me gblɔ be: “Nu ka tae agbalẽfialawo gblɔna be ele be Eliya nava gbã?” 12  Egblɔ na wo be: “Nyateƒee, Eliya va gbã heɖɔ nuwo katã ɖo; gake nu ka tae woŋlɔ ɖi le Amegbetɔvi la ŋu be, ele be wòato fukpekpe geɖe me, eye womabui ɖe naneke me o? 13  Gake mele egblɔm na mi be Eliya va vavã, eye wowɔ nu geɖe siwo wodi la ɖe eŋu, abe ale si tututu woŋlɔe ɖi le eŋu ene.” 14  Azɔ esi wotrɔ gbɔna nusrɔ̃la bubuawo gbɔ la, wokpɔ be ameha gã aɖe ƒo ƒu ɖe wo gbɔ, eye agbalẽfialawo nɔ nya hem kpli wo. 15  Gake esi ameha blibo la ƒe ŋku klii la, woɖi vo ŋutɔ, eye esi woƒu du yi egbɔ la, wote gbedodo nɛ. 16  Eye wòbia wo be: “Nya ka hem miele kpli wo?” 17  Eye ame ɖeka tso ameha la dome ɖo eŋu nɛ be: “Nufiala, mekplɔ vinyeŋutsu va gbɔwò, elabena gbɔgbɔ maƒonu aɖe le eme; 18  eye afi sia afi si wòlée le la, etsonɛ ɖe anyi, eye futukpɔ dona le enu, eye wòɖua aɖukli, eye ŋusẽ vɔna le eŋu. Eye megblɔ na wò nusrɔ̃lawo be woanyae ado goe, gake womete ŋui o.” 19  Eɖo eŋu gblɔ na wo be: “Oo, dzidzime maxɔse, ɣeyiɣi didi kae wòle be manɔ mia gbɔ ase ɖo? Ɣeyiɣi didi kae wòle be mado dzi le mia ta ase ɖo? Mikplɔe va gbɔnye.” 20  Eya ta wokplɔe va egbɔ. Gake esi gbɔgbɔa kpɔe la, ena ɖevi la ƒo tititi, eye esi wòdze anyi la, enɔ mimlim, eye futukpɔ nɔ dodom le enu. 21  Eye wòbia fofoa be: “Tso ɣekaɣie nu sia dzɔna ɖe edzi?” Egblɔ be: “Tso eƒe ɖevime ke; 22  eye enuenu la, etsɔnɛ xlãna ɖe dzo kple tsi me, be yeawui. Gake ne àte ŋu awɔ nane la, kpɔ nublanui na mí, eye nàkpe ɖe mía ŋu dzro.” 23  Yesu gblɔ nɛ be: “Ðe nèbe: ‘Ne àte ŋuia’? Tsoo, nu sia nu le bɔbɔe na ame ne xɔse le esi ɖe!” 24  Enumake ɖevia fofo do ɣli nɔ gbɔgblɔm be: “Xɔse le asinye! Kpe ɖe ŋunye le afi si xɔse hiãm le!” 25  Esi Yesu kpɔ be ameha aɖe ƒu du gbɔna la, eka mo na gbɔgbɔ makɔmakɔ la gblɔ nɛ be: “Wò, gbɔgbɔ maƒonu kple tokunɔ, mele se dem na wò be, do le eme, eye mègage ɖe eme azɔ o.” 26  Eye esi wòdo ɣli hena wòƒo tititi ɣeyiɣi aɖe vɔ la, edo le eme; eye ewɔ abe ɖe ɖevia ku ene, eya ta wo dometɔ geɖewo nɔ gbɔgblɔm be: “Eku!” 27  Gake Yesu lé eƒe alɔnu hefɔe ɖe te, eye wòtsi tsitre. 28  Eye emegbe esi wòyi aƒe aɖe me la, eƒe nusrɔ̃lawo ɖeɖe va biae be: “Aleke wɔ míawo ya míete ŋu nyae do goe o?” 29  Eye wògblɔ na wo be: “Esia tɔgbi ya mate ŋu ado go to naneke me o, negbe to gbedodoɖa me ko.” 30  Eye wodzo le afi ma yi ɖato Galilea, gake medi be ame aɖeke nanya o. 31  Elabena enɔ nu fiam eƒe nusrɔ̃lawo nɔ gbɔgblɔm na wo be: “Ele be woade Amegbetɔvi la asi na amewo, eye woawui, gake togbɔ be woawui hã la, afɔ le ŋkeke etɔ̃ megbe.” 32  Ke hã, womenɔ eƒe nya la gɔme sem o, eye wonɔ vɔvɔ̃m be yewoabiae. 33  Eye wova Kapernaum. Ke esi wònɔ aƒea me la, ebia wo be: “Nya ka ʋlimee mienɔ le mɔa dzi?” 34  Wozi kpi, elabena esime wonɔ mɔa dzi la, woʋli nya le wo nɔewo dome le ame si nye gã wu la ŋuti. 35  Eya ta ebɔbɔ nɔ anyi, eye wòyɔ ame wuieveawo, eye wògblɔ na wo be: “Ne ame aɖe di be yeanye gbãtɔ la, ele be wòanye wo katã ƒe mlɔetɔ kple wo katã ƒe subɔla.” 36  Eye wòkplɔ ɖevi sue aɖe, tsɔe ɖo wo titina, eye wòkpla asi kɔ nɛ gblɔ na wo be: 37  “Ame sia ame si xɔa ɖevi sue siawo dometɔ ɖeka le nye ŋkɔ ta la, exɔa nye hã; eye ame sia ame si xɔam la, menye nye ɖeɖe koe wòxɔna o, ke exɔa ame si dɔm ɖa la hã.” 38  Yohanes gblɔ nɛ be: “Nufiala, míekpɔ ŋutsu aɖe wònɔ gbɔgbɔ vɔ̃wo nyam nɔ go dom le wò ŋkɔ me, eye míedze agbagba be míaxe mɔ nɛ, le esi mele mía yome o ta.” 39  Ke Yesu gblɔ be: “Migate kpɔ be yewoaxe mɔ nɛ o, elabena ame aɖeke meli, si awɔ ŋusẽdɔ le nye ŋkɔ me, eye wòatrɔ enumake agblɔ nya vɔ̃ ɖe ŋunye o; 40  elabena ame si metsia tsitre ɖe mía ŋu o la, mía dzie wòle. 41  Elabena ame sia ame si ana tsi kplu ɖeka mi miano le esi mienye Kristo tɔ ta la, vavã mele egblɔm na mi be, eƒe fetu la mele eŋu tsi ge o. 42  Gake ame sia ame si ƒe nuwɔna zua nukikli na ɖevi sue siawo, siwo xɔ dzinye se la dometɔ ɖeka la, anyo nɛ wu be woatsɔ té, abe esi tedziwo trona ene tɔgbi, atsi ɖe kɔ nɛ, eye woatsɔe aƒu gbe ɖe atsiaƒu me. 43  “Eye ne wò asi zua nukikli na wò la, lãe ɖa; enyo na wò be nàge ɖe agbe la me asikpo, wu be asi eve nanɔe na wò nàtsɔ ayi Gehena,* le dzo si womate ŋu atsi o la me. 44  * —— 45  Eye ne wò afɔ zua nukikli na wò la, lãe ɖa; enyo na wò be nàge ɖe agbe la me afɔkpo, wu be afɔ eve nanɔ asiwò, ke woatsɔ wò aƒu gbe ɖe Gehena. 46  * —— 47  Eye ne wò ŋku zua nukikli na wò la, tsɔe ƒu gbe; enyo na wò be nàge ɖe Mawu fiaɖuƒe la me kple ŋku ɖeka, wu be ŋku eve nanɔ asiwò, ke woatsɔ wò aƒu gbe ɖe Gehena, 48  afi si woƒe nyẽwo mekuna le o, eye wometsia dzoa le o. 49  “Elabena ele be woawu dzo ɖe ame sia ame dzi abe ale si wowua dze ɖe nu dzi ene. 50  Nu nyui aɖee dze nye; gake ne dze bu eƒe ŋusẽ ɖe, nu kae miatsɔ ade eya ŋutɔ? Mina dze nanɔ mia me, eye minɔ ŋutifafa me kple mia nɔewo.”

Etenuŋɔŋlɔ

Afi si wotɔa dzo gbeɖuɖɔwo ɖo le Yerusalem dua godo.