Dzo kpo yi emenuwo dzi

Dzo kpo yi emenuawo dzi

Marko 8:1-38

8  Le ŋkeke mawo me, esi ameha gã aɖe gava, eye naneke menɔ anyi woaɖu o la, eyɔ nusrɔ̃lawo hegblɔ na wo be:  “Ameha la ƒe nu le nublanui wɔm nam, elabena ŋkeke etɔ̃ sɔŋ ye nye esia wole gbɔnye, eye naneke mele wo si woaɖu o;  eye ne meɖe asi le wo ŋu be woayi woƒe aƒewo me dɔme ɣeɣi la, akpo ava tso wo le mɔ dzi. Evɔ wo dometɔ aɖewo hã tso didiƒe.”  Gake eƒe nusrɔ̃lawo ɖo eŋu nɛ be: “Afi kae ame aɖe ate ŋu akpɔ abolo tsoe le teƒe tsoabo sia na ame siawo woaɖu aɖi ƒo?”  Ke hã, egabia wo be: “Abolo nenie le mia si?” Woɖo eŋu be: “Wo ame adre.”  Eye wògblɔ na ameha la be woabɔbɔ anɔ anyigba, eye wòtsɔ abolo adreawo, da akpe, ŋe wo me, eye wòte wo tsɔtsɔ na eƒe nusrɔ̃lawo be woatsɔe ana ameawo, eye wotsɔ wo na ameha la.  Tɔmelã suesue ʋɛ aɖewo hã nɔ wo si; eye esi wòyra ɖe wo dzi vɔ la, egblɔ na wo be woatsɔ woawo hã ana ameawo.  Ale woɖu nu, eye woɖi ƒo, eye wofɔ kakɛ siwo susɔ la, wode kusi gã adre.  Evɔ ŋutsu siwo nɔ afi ma ƒe xexlẽme anɔ akpe ene. Mlɔeba la, edo mɔ wo. 10  Eye enumake wòɖo tɔdziʋu la kple eƒe nusrɔ̃lawo, eye wova Dalmanuta nutoa me. 11  Le afi sia la, Farisitɔwo va, eye wote nyahehe kplii, hele dzesi dim le egbɔ tso dziƒo, be yewoatsɔ atee kpɔ. 12  Eya ta eɖe hũ sesĩe le eƒe gbɔgbɔ la me, eye wògblɔ be: “Nu ka tae dzidzime sia le dzesi dim? Vavã mele egblɔm be: Womele dzesi aɖeke na ge dzidzime sia o.” 13  Tete wòdzo le wo gbɔ, gaɖo tɔdziʋua ake, eye wòdzo yi ƒua ƒe go kemɛ dzi. 14  Ke woŋlɔ be wometsɔ abolo ɖe asi o, eye naneke menɔ wo si le ʋua me o, negbe abolo ɖeka ko. 15  Eye wòte sedede na wo vevie gblɔ be: “Mina miaƒe ŋkuwo nanɔ ʋuʋu, minɔ ŋudzɔ ɖe Farisitɔwo ƒe amɔwɔʋãnu kple Herodes ƒe amɔwɔʋãnu la ŋu.” 16  Eya ta wonɔ nya ʋlim kple wo nɔewo le esi abolo aɖeke menɔ wo si o ta. 17  Esi wòde dzesi esia la, egblɔ na wo be: “Nu ka tae miele nya ʋlim le esi abolo aɖeke mele mia si o ta? Ðe miekpɔ dze si nu, alo se egɔme haɖe oa? Ðe wògale sesẽm na mi kokoko be miase nu gɔmea? 18  ‘Togbɔ be ŋku le mia si hã, ɖe miekpɔa nu oa; eye togbɔ be to le mia si hã, ɖe miesea nu oa?’ Eye ɖe mieɖo ŋku edzi oa, 19  esi meŋe abolo atɔ̃awo me na ŋutsu akpe atɔ̃awo ɖe, kusi nenie kakɛ siwo miefɔ la de?” Wogblɔ nɛ be: “Wo ame wuieve.” 20  “Esi meŋe adreawo me na ŋutsu akpe eneawo ɖe, kusi gã nenie kakɛ siwo miefɔ la de?” Wogblɔ nɛ be: “Adre.” 21  Eye wògblɔ na wo be: “Ðe miekpɔ se egɔme haɖe oa?” 22  Azɔ wova ɖo Betsaida. Le afi sia la, amewo kplɔ ŋkuagbãtɔ aɖe va egbɔ, eye woɖe kuku nɛ vevie be wòaka asi eŋu. 23  Eye wòlé ŋkuagbãtɔ la ƒe alɔnu, kplɔe do goe le kɔƒea me, eye esi wòɖe ta ɖe ŋku dzi nɛ vɔ la, eda eƒe asiwo ɖe eyama dzi hebiae be: “Èle nane kpɔma?” 24  Eye ŋutsua fɔ kɔ dzi hete gbɔgblɔ be: “Mele amewo kpɔm, elabena mele nu siwo le abe atiwo ene la kpɔm, gake wole zɔzɔm.” 25  Azɔ egatsɔ eƒe asiwo ɖo ŋutsua ƒe ŋkuwo dzi, eye ŋutsua kpɔ nu nyuie, eye wòhaya, eye wònɔ nu sia nu kpɔm nyuie. 26  Eya ta eɖe asi le eŋu be wòayi aƒe me, hegblɔ nɛ be: “Gake mègayi kɔƒea me o.” 27  Azɔ Yesu kple eƒe nusrɔ̃lawo ɖo ta Kaisarea Filipi ƒe kɔƒewo me, eye le mɔa dzi la, ete nyabiabia eƒe nusrɔ̃lawo, gblɔ na wo be: “Ame kae amewo le gbɔgblɔm be menye?” 28  Wogblɔ nɛ be: “Yohanes Amenyrɔɖetsimela, bubuwo be Eliya, bubuwo hã be, Nyagblɔɖilawo dometɔ ɖekae.” 29  Eye wòbia wo be: “Ke miawo ya ɖe, ame kae miegblɔna be menye?” Petro ɖo eŋu nɛ gblɔ be: “Wòe nye Kristo la.” 30  Eye wòde se na wo vevie be woagagblɔ ye ŋuti nya na ame aɖeke o. 31  Azɔ hã, ete nufiafia wo be, ele na Amegbetɔvi la be wòakpe fu geɖe, eye amegãwo kple nunɔlawo ƒe tatɔwo kple agbalẽfialawo agbee, eye woawui, eye wòafɔ le ŋkeke etɔ̃ megbe. 32  Le nyateƒe me la, egblɔ nya sia naneke maɣlamaɣlae. Gake Petro ɖe kpɔe, hete mokaka nɛ. 33  Etrɔ, kpɔ eƒe nusrɔ̃lawo, eye wòka mo na Petro gblɔ be: “Te ɖa le gbɔnye, Satana, elabena menye Mawu ƒe susuwo ŋu bum nèle o, ke boŋ amegbetɔwo tɔ.” 34  Azɔ eyɔ ameha la kple eƒe nusrɔ̃lawo va eɖokui gbɔ, eye wògblɔ na wo be: “Ne ame aɖe di be yeadze yonyeme la, negbe nu le eɖokui gbɔ, eye wòatsɔ eƒe fuwɔameti la, eye wòadze yonyeme ɖaa. 35  Elabena ame sia ame si dina be yeaɖe yeƒe luʋɔ la abui; gake ame sia ame si abu eƒe luʋɔ le nye kple nya nyui la ta la, aɖee. 36  Le nyateƒe me la, viɖe kae wòanye na ame, be xexe blibo la katã nazu etɔ, gake wòabu eƒe luʋɔ? 37  Nu ka koŋ ye ame atsɔ ana ɖe eƒe luʋɔ ta? 38  Elabena ame sia ame si nye kple nye nyawo akpe ŋu na le dzidzime wɔahasi sia si wɔa nu vɔ̃ me la, eƒe nu akpe ŋu na Amegbetɔvi la hã ne eva ɖo le Fofoa ƒe ŋutikɔkɔe me kple mawudɔla kɔkɔeawo.”

Etenuŋɔŋlɔ