Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Marko 6:1-56

6  Eye wòdzo le afi ma heva wo de, eye eƒe nusrɔ̃lawo kplɔe ɖo.  Esi sabat ɖo la, ete nufiafia le ƒuƒoƒe la; eye ame siwo nɔ to ɖomee la dometɔ akpa gãtɔ lulu hegblɔ be: “Afi kae ŋutsu sia kpɔ nu siawo tsoe? Eye nu ka tae wòle be woatsɔ nunya sia gbegbe ana ŋutsu sia, eye woanɔ ŋusẽdɔ siawo gbegbe wɔm to eƒe asi dzi?  Alo menye Maria ƒe vi si nye atikpala lae nye esia, eye wònye Yakobo kple Yosef kple Yuda kpakple Simon nɔviŋutsu oa? Eye menye nɔvianyɔnuwoe nye esiawo le mía dome oa?” Eye wòzu nukikli na wo.  Gake Yesu yi edzi gblɔ na wo be: “Wodea bubu nyagblɔɖila ŋu le afi sia afi, negbe le wo de, eƒe ƒometɔwo kple ye ŋutɔ ƒemetɔwo dome koe womebunɛ le o.”  Eya ta mete ŋu wɔ ŋusẽdɔ aɖeke le afi ma o, negbe dɔnɔ ʋɛ aɖewo dzi ko wòda asi ɖo, heda gbe le wo ŋu.  Le nyateƒe me la, woƒe dzimaxɔse la wɔ mo yaa nɛ. Eye wòyi ɖato kɔƒe siwo le nuto ma me godoo va kpe la me, hele nu fiam.  Azɔ eyɔ ame wuieveawo, eye wòte wo dɔdɔ eveveve, eye wòte ŋusẽnana wo ɖe gbɔgbɔ makɔmakɔwo dzi.  Azɔ hã, ede se na wo be woagatsɔ naneke ɖe asi hena mɔzɔzɔa o, negbe atizɔti ko, woagatsɔ abolo alo nuɖuɖukotoku o, eye akɔbliga aɖeke naganɔ woƒe gabutuwo me hã o,  ke boŋ be woado afɔkpa, eye woagado awu eve ɖe woƒe awuwo te o. 10  Egagblɔ na wo hã be: “Afi sia afi si miage ɖe aƒe aɖe me le la, minɔ afi ma, va se ɖe esime miadzo le teƒe ma. 11  Eye ne miele dzodzom le afi sia afi si womexɔ mi alo ɖo to mi le o la, miʋuʋu ke le miaƒe afɔwo ŋuti ɖe anyi wòanye ɖaseɖiɖi na wo.” 12  Eya ta wodze mɔ yi ɖaɖe gbeƒã, bene amewo natrɔ dzi me; 13  eye wonɔ gbɔgbɔ vɔ̃ geɖewo nyam nɔ go dom, eye wonɔ ami sim na dɔnɔ geɖewo henɔ gbe dam le wo ŋu. 14  Ke eva ɖo Fia Herodes ƒe to me, elabena Yesu ƒe ŋkɔ ɖi hoo, eye amewo nɔ gbɔgblɔm be: “Wofɔ Yohanes amenyrɔɖetsimela tso ame kukuwo dome, eye ema tae ŋusẽdɔwo le eme vam to edzi ɖo.” 15  Gake ame bubuwo nɔ gbɔgblɔm be: “Eliya ye.” Bubuwo hã be: “Nyagblɔɖilae wònye abe nyagblɔɖilawo dometɔ ɖeka ene.” 16  Gake esi Herodes see la, ete gbɔgblɔ be: “Yohanes si nu metso ta le la, eyae nye esia wofɔ ɖe tsitre.” 17  Elabena Herodes ŋutɔ dɔ ame wova lé Yohanes, eye woblae de gaxɔ me le nɔvia Filipo srɔ̃ Herodia ta, elabena exɔe ɖe. 18  Elabena Yohanes gblɔ na Herodes enuenu be: “Se meɖe mɔ na wò be nàxɔ nɔviwò srɔ̃ aɖe o.” 19  Ke Herodia lée ɖe dɔ me, eye wònɔ didim be yeawui, gake mete ŋui o. 20  Elabena Herodes nɔ vɔvɔ̃m na Yohanes, le esi wònya be ame dzɔdzɔe kple ame kɔkɔe wònye ta; eye wòkpɔa eta dedie. Eye ne eɖo to se eƒe nyawo vɔ la, menyaa nu si wòawɔ o, ke hã eyi edzi nɔ eƒe nyawo sem dzidzɔtɔe. 21  Gake mɔnukpɔkpɔa va gbeɖeka, esi Herodes ɖo fiẽnuɖukplɔ̃ aɖe le eƒe dzigbeŋkeke dzi na eƒe amegãwo kple aʋafiagãwo, kple Galilea me ŋkutawo. 22  Eye Herodia sia vinyɔnuvi va ɖu ɣe wòdze Herodes kple ame siwo nɔ kplɔ̃ ŋu kplii la ŋu. Fia la gblɔ na nyɔnuvi la be: “Bia nu sia nu si nèdi lam, eye mana wò.” 23  Ɛ̃, eka atam nɛ gblɔ be: “Nu sia nu si nàbiam la, mana wò, va se ɖe nye fiaɖuƒea ƒe afã dzi.” 24  Eye wòdo go yi ɖagblɔ na dadaa be: “Nu kae wòle be mabia?” Egblɔ nɛ be: “Yohanes amenyrɔɖetsimela ƒe ta.” 25  Enumake wòɖe abla va fia la gbɔ hebia nu si wòdi, gblɔ be: “Medi be nàtsɔ Yohanes Amenyrɔɖetsimela ƒe ta de agba me nam fifi laa.” 26  Togbɔ be ete ɖe fia la dzi vevie hã la, medi be yeagbe enana o, le atam siwo wòka, kple ame siwo nɔ kplɔ̃a ŋu kplii, la ta. 27  Eya ta fia la dɔ eŋudzɔsrafo ɖeka ɖa enumake, hede se nɛ be wòatsɔ eƒe ta avae. Eye wòyi ɖatso ta le enu le gaxɔa me, 28  eye wòtsɔ eƒe ta ɖe agba me vae, eye wòtsɔe na nyɔnuvia, eye nyɔnuvia tsɔe yi na dadaa. 29  Esi eƒe nusrɔ̃lawo see la, wova tsɔ eƒe kukua, eye woɖii ɖe ŋkuɖodziyɔdo aɖe me. 30  Eye apostoloawo ƒo ƒu ɖe Yesu gbɔ, eye wogblɔ nu siwo katã wowɔ eye wofia la nɛ. 31  Eye wògblɔ na wo be: “Miva, ne míawo ɖeɖe míayi teƒe aɖe si ame aɖeke mele o, ne míaɖi ɖe eme vie.” Elabena ame geɖewo nɔ vavam henɔ dzodzom, eye womekpɔ vovo aɖu nu teti gɔ̃ hã o. 32  Eya ta woɖo tɔdziʋua, eye woawo ɖeɖe wodze mɔ yina teƒe aɖe si ame aɖeke mele o. 33  Gake amewo kpɔ wo esime wodzo yina, eye ame geɖewo see, eye woto afɔ ƒu du tso duawo katã me yi afi ma, eye woɖo do ŋgɔ na wo. 34  Eye esi wòɖi go la, ekpɔ ameha gã aɖe, gake woƒe nu wɔ nublanui nɛ, elabena wonɔ abe alẽ siwo nu kplɔla aɖeke mele o la ene. Eye wòte nu geɖewo fiafia wo. 35  Ke zã nɔ dodom azɔ, eye eƒe nusrɔ̃lawo va egbɔ hede asi gbɔgblɔ me nɛ be: “Teƒe tsoaboe afi sia nye, eye zã hã le dodom. 36  Ðe asi le wo ŋu, ne woadzo ayi agbleta kple kɔƒe siwo ƒo xlã mí la me, ne woaɖadi nane aƒle aɖu.” 37  Ke eɖo eŋu na wo be: “Mia ŋutɔwo mina nu wo woaɖu.” Ke wogblɔ nɛ be: “Ðe míayi aɖaƒle abolo denario alafa eve nu na ameawo be woaɖua?” 38  Egblɔ na wo be: “Abolo nenie le mia si? Miyi miakpɔe ɖa!” Esi woyi gbɔ la, wogblɔ nɛ be: “Wo ame atɔ̃, kple tɔmelã eve.” 39  Eye wògblɔ na ameawo be woanɔ anyi ɖe gbe mumu la dzi le hatsotso hatsotso me. 40  Eye wonɔ anyi hatsotso hatsotso, ɖewo alafa, ɖewo blaatɔ̃. 41  Azɔ esi wòtsɔ abolo atɔ̃awo kple tɔmelã eveawo la, efɔ mo dzi kpɔ dziƒo, yra ɖe wo dzi, eye wòŋe aboloawo me hete wo tsɔtsɔ na eƒe nusrɔ̃lawo, be woatsɔ wo aɖo ameawo kɔme; eye wòma tɔmelã eveawo me na wo katã. 42  Ale wo katã woɖu nu ɖi ƒo; 43  eye woƒo kakɛawo nu ƒu, woyɔ kusi wuieve, tɔmelãawo ya mele eme o. 44  Ke ŋutsu siwo ɖu aboloawo la ƒe xexlẽme nɔ akpe atɔ̃. 45  Eye enumake wòƒoe ɖe eƒe nusrɔ̃lawo nu be woaɖo tɔdziʋua adze ŋgɔ ayi Betsaida, le ƒua ƒe go kemɛ dzi, esime ye ŋutɔ yeaɖe asi le ameha la ŋu. 46  Gake esi wòdo hedenyuie na wo vɔ la, eyi ɖe to aɖe dzi be yeado gbe ɖa. 47  Esi fiẽsi ɖo la, tɔdziʋu la ɖo ƒu la titina, gake eya ɖeka susɔ ɖe godzi. 48  Eye esi wòkpɔ be ʋua kuku nɔ sesẽm na wo, elabena ya ƒo va le wo kpem la, le zã ƒe ŋudzɔɣi enelia* me la, ezɔ to ƒua dzi gbɔna wo gbɔ; gake ewɔ abe ɖe wòdi be yeato wo ŋu ene. 49  Esi woƒe ŋku klii wònɔ ƒua dzi zɔm la, wobia wo ɖokuiwo be: “Drɔ̃e ye loo alo nu ŋutɔŋutɔe?” Eye wodo ɣli sesĩe. 50  Elabena wo katã wokpɔe, eye dzika tso wo ƒo. Gake eƒo nu kpli wo enumake, eye wògblɔ na wo be: “Milé dzi ɖe ƒo, nyee; migavɔ̃ o.” 51  Eye wòge ɖe tɔdziʋua me le wo gbɔ, eye ya la dzudzɔ ƒoƒo. Eye woƒe nu ku ŋutɔ, 52  elabena womese nu si aboloawo fia gɔme o, eye womete ŋu le nuwo gɔme sem o kokoko. 53  Eye esi wova ɖi go la, wova ɖo Genezaret, eye wotɔ ʋua ɖe afi ma lɔƒo. 54  Gake esi wodo go le ʋua me teti ko la, amewo kpɔe dze sii, 55  eye wolé du tsɔ yi nutoa me godoo, eye wote dɔnɔwo kɔkɔ ɖe abawo dzi va afi si wose be ele. 56  Eye afi sia afi si wòayi le kɔƒewo, alo duwo, alo agbletawo la, wokɔa dɔnɔwo va dana ɖe asiwo me,* eye woɖea kuku nɛ be woaka asi eƒe awutoga teti ko ŋu. Eye ame ale si nu kaa asi eŋu la, hayana.

Etenuŋɔŋlɔ

Kpɔ Mr 13:35 ƒe etenuŋɔŋlɔ.
Eganye afi si hã amewo va kpea ta le.