Dzo kpo yi emenuwo dzi

Dzo kpo yi emenuawo dzi

Marko 3:1-35

3  Eye wògayi ƒuƒoƒe aɖe, eye ame aɖe le afi ma si titi lé asi na.  Eya ta wonɔ ŋku lém ɖe eŋu tututu, be woakpɔe ɖa be ada dɔ na amea le sabat dzi hã, bene woatso enu.  Eye wògblɔ na ame si titi lé asi na la be: “Tso, eye nàva titina.”  Azɔ egblɔ na wo be: “Ðe se ɖe mɔ be woawɔ nu nyui alo nu vɔ̃ɖi le sabat dzi, be woaɖe luʋɔ aɖe loo alo awuia?” Ke wozi kpi.  Eye esi wòtsa ŋku le wo dzi godoo kple dziku, eye wòxa nu vevie le woƒe dzimesesẽ la ŋuti vɔ la, egblɔ na ame la be: “Mlo asi.” Eye wòmloe, eye eƒe asi la ɖɔ ɖo.  Tete Farisitɔwo do go, eye enumake wote adaŋudede kple Herodes habɔbɔ me nɔlawo ɖe eŋu, ne woawui.  Gake Yesu trɔ dzo le afi ma yi ƒua nu kple eƒe nusrɔ̃lawo; eye ameha gã aɖe tso Galilea kple Yudea dze eyome.  Ameha gã aɖe si tso keke Yerusalem kple Idumea kple Yordan godo kpakple Tiro kple Zidon nutowo me kura gɔ̃ hã, esi wose nu geɖe siwo wɔm wònɔ la, wova egbɔ.  Eye wògblɔ na eƒe nusrɔ̃lawo be woadi tɔdziʋu sue aɖe ada ɖi na ye koŋ, ale be ameha la nagamimi ye ɖo o. 10  Elabena eda dɔ na ame geɖewo, si wɔe be ame siwo katã ŋu dɔléle sesẽwo le la nyẽa zi ɖe edzi, be yewoaka asi eŋu. 11  Gbɔgbɔ makɔmakɔwo kura gɔ̃ hã, ɣesiaɣi si wokpɔe la, wodzea anyi ɖe eŋkume, eye wodoa ɣli gblɔna be: “Wòe nye Mawu ƒe Vi la.” 12  Gake zi geɖe la, edea se na wo vevie be woagana woanya ye o. 13  Eye wòyi to aɖe dzi, eye wòyɔ ame siwo wòdi, eye wova egbɔ. 14  Eye wòɖo ƒuƒoƒo si me ame wuieve le, siwo wògana ŋkɔe be “apostolowo,” be woanɔ ye ŋu ɣesiaɣi, eye be yeadɔ wo aɖo ɖa woaɖaɖe gbeƒã, 15  eye be ŋusẽ nanɔ wo si woanya gbɔgbɔ vɔ̃wo ado goe. 16  Eye ame wuieve siwo le ƒuƒoƒo si wòɖo la mee nye Simon si wògana ŋkɔ hã be Petro, 17  kple Yakobo, si nye Zebedeo vi, kpakple Yohanes, si nye Yakobo nɔvi, (egana ŋkɔ ame siawo be Boanerges hã, si gɔmee nye Dziɖegbeviwo), 18  kple Andrea kple Filipo kple Bartolomeo kple Mateo kple Toma kple Yakobo, si nye Alfeo vi, kple Tadeo kple Simon Veviedonula la, 19  kpakple Yuda Iskariot, ame si va dee asi emegbe. Eye wòyi aƒe aɖe me. 20  Eye ameha la gaƒo ƒu ake, ale be womete ŋu ɖu nu kura gɔ̃ hã o. 21  Ke esi eƒe ƒometɔwo see la, wodo go yi elé ge, elabena wonɔ gbɔgblɔm be: “Eƒe tagbɔ le gbegblẽm.” 22  Eye agbalẽfiala siwo tso Yerusalem va hã nɔ gbɔgblɔm be: “Beelzebul le eme, eye gbɔgbɔ vɔ̃wo ƒe fia dzie wòtona nyaa gbɔgbɔ vɔ̃wo.” 23  Eya ta esi wòyɔ wo va eɖokui gbɔ la, ete gbɔgblɔ na wo to kpɔɖeŋuwo me be: “Aleke Satana ate ŋu anya Satana ado goe? 24  Nya lae nye be, ne fiaɖuƒe aɖe ma ɖe eɖokui ŋu la, fiaɖuƒe ma mate ŋu anɔ te o; 25  eye ne aƒe aɖe ma ɖe eɖokui ŋu la, aƒe ma mate ŋu anɔ te o. 26  Nenema kee ne Satana tsi tsitre ɖe eɖokui ŋu hema la, ekema mate ŋu anɔ te o, ke boŋ ele eƒe nuwuwu gogom. 27  Le nyateƒe me la, ame aɖe si ge ɖe ame sesẽ aɖe ƒe aƒe me la, mate ŋu aha eƒe nuwo o, negbe ɖeko wòabla ame sesẽ la gbã hafi, eye emegbe wòaha eƒe aƒea. 28  Vavãe, mele egblɔm na mi be, woatsɔ nu sia nu ake amegbetɔviwo, eɖanye nu vɔ̃ ka kee woɖawɔ busutɔe alo busunya ka kee woɖagblɔ o. 29  Ke hã, ame sia ame si gblɔa busunya ɖe gbɔgbɔ kɔkɔea ŋu la, womatsɔe akee akpɔ gbeɖe o, ke boŋ eɖi nu vɔ̃ mavɔmavɔ ƒe fɔ.” 30  Egblɔ esia, elabena wonɔ gbɔgblɔm be: “Gbɔgbɔ makɔmakɔ aɖe le eme.” 31  Eye dadaa kple nɔviawo va, eye esi wonɔ tsitre ɖe xexe la, wodɔ ame ɖe egbɔ be woayɔe avae. 32  Ameha aɖe bɔbɔ nɔ anyi ƒo xlãe, eye wogblɔ nɛ be: “Kpɔ ɖa! Dawò kple nɔviwòwo le xexe le diwòm.” 33  Ke eɖo ŋu na wo be: “Ame kawoe nye danye kple nɔvinyewo?” 34  Eye esi wòkpɔ ame siwo le anyinɔƒe ƒo xlãe godoo la, egblɔ be: “Kpɔ ɖa, danye kple nɔvinyewoe nye esi! 35  Ame sia ame si wɔa Mawu ƒe lɔlɔ̃nu la, ame siae nye nɔvinyeŋutsu kple nɔvinyenyɔnu kple danye.”

Etenuŋɔŋlɔ