Dzo kpo yi emenuwo dzi

Dzo kpo yi emenuawo dzi

Marko 16:1-20

16  Eya ta esi sabat la va yi vɔ la, Maria Magdalatɔ kple Maria, si nye Yakobo dada, kpakple Salome woƒle atike ʋeʋĩwo be woayi aɖasi nɛ.  Eye le kwasiɖaa ƒe ŋkeke gbãtɔ ƒe ŋdikanya, esi ɣe dze la, wova ŋkuɖodziyɔdo la gbɔ.  Eye wonɔ gbɔgblɔm na wo nɔewo be: “Ame kae amli kpe la ɖa le ŋkuɖodziyɔdoa nu na mí?”  Gake esi wofɔ kɔ dzi la, wokpɔe be womli kpe la ɖa xoxo, togbɔ be elolo ŋutɔ hã.  Esi woge ɖe ŋkuɖodziyɔdoa me la, wokpɔ ɖekakpui aɖe wòbɔbɔ nɔ anyi ɖe ɖusi me le awu ʋlaya ɣi aɖe me, eye dzidzi ƒo wo.  Egblɔ na wo be: “Dzidzi negaƒo mi o. Yesu Nazaretetɔ si wohe ɖe ati ŋu la dimee miele. Wofɔe ɖe tsitre, mele afi sia o. Kpɔ ɖa! Afi si wotsɔe mlɔe nye esi.  Ke miyi ɖagblɔ na eƒe nusrɔ̃lawo kple Petro be, ‘Edze mia ŋgɔ yina Galilea; afi mae miakpɔe le, abe ale si wògblɔe na mi la ene.’”  Eye esi wodo go la, wosi tso ŋkuɖodziyɔdo la gbɔ, elabena wonɔ dzodzom nyanyanya, eye ŋɔdzi lé wo. Eye womegblɔ nya aɖeke na ame aɖeke o, elabena vɔvɔ̃ lé wo. NYATAƑONYA KPUITƆ Nyataƒonya kpui aɖe dze le asinuŋɔŋlɔgbalẽ kple gɔmeɖeɖe siwo wova ŋlɔ emegbe la dometɔ aɖewo me le Marko 16:8 ale: Ke wogblɔ nu siwo katã ƒe se wòde la na ame siwo Petro ŋu la kpuie. Eye le nu siawo megbe la, Yesu ŋutɔ to wo dzi ɖo ɖeɖe mavɔ la ƒe gbeƒãɖeɖe kɔkɔe magblẽmagblẽ la ɖe ɣedzeƒe va se ɖe ɣetoɖoƒe. NYATAƑONYA LEGBETƆ Blema asinuŋɔŋlɔgbalẽ xoxotɔ aɖewo (Codex Alexandrinus, Codex Ephraemi, Codex Bezae) kple gɔmeɖeɖe xoxotɔ aɖewo (Latingbe me Vulgate, Cureton ƒe Siriagbe me tɔ, Siriagbe me Peshitta) tsɔ nyataƒonya legbe sia kpee, gake medze le Codex Sinaiticus, Codex Vaticanus, Siriagbe me Asinuŋɔŋlɔgbalẽ si wofɔ le Sinai, kple Armeniagbe me Gɔmeɖeɖea me o:  Esi wòfɔ le kwasiɖaa ƒe ŋkeke gbãtɔ ƒe ŋdikanya la, eɖe eɖokui fia Maria Magdalatɔ la gbã; eyae nye ame si me wònya gbɔgbɔ vɔ̃ adre do goe le. 10  Eyi ɖaka eta na ame siwo anyi kpakplii tsã la, elabena wonɔ nu xam henɔ avi fam. 11  Gake woawo la, esi wose be egbɔ agbe, eye be Maria kpɔe la, womexɔe se o. 12  Eye le nu siawo megbe la, edze le nɔnɔme bubu me na wo dometɔ eve, siwo dzi yina kɔƒe aɖe me; 13  eye wotrɔ gbɔ va ka eta na ame susɔeawo. Womexɔ ame siawo dzi se o. 14  Gake emegbe eɖe eɖokui fia ame wuiɖekɛawo ŋutɔ esime wonɔ kplɔ̃ ŋu, eye wòhe nya ɖe wo ŋu le woƒe dzimaxɔse kple dzimesesẽ ta, elabena womexɔ ame siwo kpɔe be efɔ azɔ tso ame kukuwo dome la dzi se o. 15  Eye wògblɔ na wo be: “Miyi xexe blibo la katã me, eye miaɖe gbeƒã nya nyui la na nuwɔwɔwo katã. 16  Ame si xɔe se, eye wonyrɔe la, akpɔ ɖeɖe, gake ame si mexɔe se o la, woabu fɔe. 17  Eye dzesi siwo akplɔ ame siwo xɔe se ɖo lae nye esi: Le nye ŋkɔ me la, woanya gbɔgbɔ vɔ̃wo ado goe, woado gbe bubuwo, 18  eye woatsɔ woƒe asiwo alé dawo, eye ne wono nu wuame ɖe sia ɖe la, mawɔ nuvevi aɖeke wo kura o. Woada woƒe asiwo ɖe dɔnɔwo dzi, eye woƒe lãme asẽ.” 19  Ale, esi Aƒetɔ Yesu ƒo nu kpli wo la, wokɔe yi dziƒo, eye wòva bɔbɔ anyi ɖe Mawu ƒe nuɖusi me. 20  Eya ta woyi ɖaɖe gbeƒã le afi sia afi, eye Aƒetɔ la wɔm kpli wo henɔ megbe na gbedeasi la to dzesi siwo kpe ɖe eŋu la dzi.

Etenuŋɔŋlɔ