Dzo kpo yi emenuwo dzi

Dzo kpo yi emenuawo dzi

Marko 14:1-72

14  Azɔ esusɔ ŋkeke eve ne ŋutitoto kple abolo maʋãmaʋã ƒe ŋkekenyuia naɖo. Eye nunɔlawo ƒe tatɔwo kple agbalẽfialawo nɔ ayemɔ si dzi woato alée ahawui la dim;  elabena wonɔ gbɔgblɔm enuenu be: “Menye le ŋkekenyuia ɖuɣi o; ɖewohĩ zi ava tɔ le dukɔ la me.”  Eye esi wònɔ Betania le Simon kpodɔlélaa ƒe aƒe me, eye wònɔ kplɔ̃ ŋu la, nyɔnu aɖe si si alabastrogoe, si me ami ʋeʋĩ aɖe le, si nye nardomi akuakua, si xɔ asi ŋutɔ la, va do. Esi wòʋu alabastrogoea nu la, ete ekɔkɔ ɖe eƒe tame.  Ke ameawo dometɔ aɖewo nɔ nu ƒom dzikutɔe kple wo nɔewo le nu sia ta gblɔ be: “Nu ka tae wogblẽ ami ʋeʋĩ sia dome alea?  Elabena woate ŋu adzra ami ʋeʋĩ sia wòawu denario alafa etɔ̃ sɔŋ, eye woatsɔe ana ame dahewo ɖe!” Eye eƒe nu ku dzi na wo vevie ŋutɔ.  Gake Yesu gblɔ be: “Miɖe asi le eŋu. Nu ka tae miebe yewoaɖe fu nɛ? Nu nyui aɖee wòwɔ nam.  Elabena ame dahewo le mia gbɔ ɣesiaɣi, eye ɣesiaɣi si mielɔ̃ la, miate ŋu awɔ dɔmenyo na wo faa, ke nye ya nyemanɔ mia gbɔ ɣesiaɣi o.  Ewɔ nu si wòate ŋui; edo ŋgɔ si ami ʋeʋĩ na nye ŋutilã hena ɖiɖi.  Vavã mele egblɔm na mi be: Afi sia afi si woaɖe gbeƒã nya nyui la le le xexe blibo la katã me la, woagblɔ nu si nyɔnu sia wɔ la hã, atsɔ anɔ ŋku ɖom edzi.” 10  Eye Yuda Iskariot, si nye ame wuieveawo dometɔ ɖeka, yi nunɔlawo ƒe tatɔwo gbɔ, be yeadee asi na wo. 11  Esi wosee la, dzi dzɔ wo ŋutɔ, eye wodo ŋugbe be yewoana klosalogae. Eya ta ete mɔnudidi le ale si wòawɔ adee asi bɔbɔe ŋu. 12  Ke le abolo maʋãmaʋã ƒe ŋkeke gbãtɔ, si dzi wotsɔa ŋutitotolãa saa vɔe le dzi la, eƒe nusrɔ̃lawo gblɔ nɛ be: “Afi kae nèdi be míava dzra ɖo na wò, be nàɖu ŋutitoto la le?” 13  Ale wòdɔ eƒe nusrɔ̃lawo dometɔ eve gblɔ na wo be: “Miyi ɖe dua me, eye ŋutsu aɖe si tsɔ tsize si wotsɔ anyi wɔe la ado go mi. Mikplɔe ɖo, 14  eye afi sia afi si wòage ɖe eme le la, migblɔ na aƒea tɔ be, ‘Nufiala be: “Afi kae amedzroxɔ si me mía kple nye nusrɔ̃lawo míaɖu ŋutitotoa le la le?”’ 15  Eye afia xɔ gã aɖe si le dziƒoxɔ dzi, si me woɖo nuwo ɖo xoxo la mi; midzra afi ma ɖo na mí.” 16  Eya ta nusrɔ̃laawo do go, eye woyi dua me, eye wokpɔe abe ale si tututu wògblɔe na wo ene; eye wodzra ɖo ɖe ŋutitoto la ŋu. 17  Esi fiẽsi ɖo la, eya kple ame wuieveawo va. 18  Eye esi wonɔ kplɔ̃ ŋu nɔ nu ɖum la, Yesu gblɔ be: “Vavã mele egblɔm na mi be: Mia dometɔ ɖeka si le nu ɖum kplim la adem asi.” 19  Wote nuxaxa hebiae ɖekaɖeka be: “Menye nyee o ɖe, alo?” 20  Egblɔ na wo be: “Ame wuieveawo dometɔ ɖekae, ame si le asi dem agba ɖeka me kplim. 21  Nyateƒee, Amegbetɔvi la dzo yina, abe ale si woŋlɔe ɖi le eŋuti ene, gake baba na ame ma, si dzi woto de Amegbetɔvi la asi! Anyo na ame ma wu ne ɖe womegaxae dzi o.” 22  Eye esi wonɔ nua ɖum la, etsɔ abolo, yra ɖe edzi, ŋe eme, eye wòtsɔe na wo hegblɔ be: “Mixɔe, esia tsi tsitre ɖi na nye ŋutilã.” 23  Eye esi wòtsɔ kplu ɖe asi la, eda akpe ɖe eta, eye wòtsɔe na wo, eye wo katã wonoe le enu. 24  Eye wògblɔ na wo be: “Esia tsi tsitre ɖi na nye ‘nubabla ƒe ʋu,’ si woakɔ ɖe anyi le ame geɖewo ta. 25  Vavã mele egblɔm na mi be, nyemegale waintsetse me tsi no ge akpɔ o va se ɖe ŋkeke ma dzi, esime manoe yeyee le Mawu fiaɖuƒe la me.” 26  Mlɔeba esi wodzi kafukafuhawo vɔ la, wodo go yi Amito la dzi. 27  Eye Yesu gblɔ na wo be: “Mi katã miakli nu, elabena woŋlɔe ɖi be, ‘Mada nu alẽkplɔla la, eye alẽawo aka ahlẽ.’ 28  Gake ne wofɔm ɖe tsitre megbe la, madze mia ŋgɔ ayi Galilea.” 29  Ke Petro gblɔ nɛ be: “Ne ame susɔeawo katã kli nu kura gɔ̃ hã, nye ya nyemakli nu o.” 30  Eya ta Yesu gblɔ nɛ be: “Vavã mele egblɔm na wò be: Egbea, ɛ̃, zã sia me, hafi koklo naku atɔ zi eve la, àgbe nu le gbɔnye zi etɔ̃.” 31  Gake ete gbɔgblɔ tɔteteɖedzitɔe be: “Ne anɔ nam be maku kpli wò hã la, nyemagbe nu le gbɔwò akpɔ o.” Eye ame susɔeawo hã te gbɔgblɔ nenema ke. 32  Eye wova ɖo teƒe aɖe si woyɔna be Getsemane, eye wògblɔ na eƒe nusrɔ̃lawo be: “Minɔ anyi ɖe afi sia, ne mayi aɖado gbe ɖa.” 33  Eye wòkplɔ Petro kple Yakobo kpakple Yohanes ɖe ŋuti, eye dzidzi ƒoe wòte dzodzo nyanyanya. 34  Eye wògblɔ na wo be: “Nye luʋɔ le nu xam vevie, va se ɖe keke ku me ke. Minɔ afi sia, eye minɔ ŋudzɔ.” 35  Eye esi wòte yi ŋgɔ vie la, edze klo tsyɔ mo anyi hete gbedodoɖa be, ne anya wɔ la, gaƒoƒo la nato ye ŋu ayi. 36  Eye wòyi edzi gblɔ be: “Abba,* Fofo, nuwo katã le bɔbɔe na wò; ɖe kplu sia ɖa le gbɔnye. Ke hã, menye nu si medi o, ke boŋ nu si nèdi.” 37  Eye wòva hekpɔ be wonɔ alɔ̃ dɔm, eye wògblɔ na Petro bena: “Simon, alɔ̃ dɔm nèlea? Màte ŋu ayi edzi anɔ ŋudzɔ gaƒoƒo ɖeka oa? 38  Minɔ ŋudzɔ, eye minɔ gbedodoɖa dzi, be miagadze tetekpɔ me o. Nyateƒee, gbɔgbɔ la le lɔlɔ̃m, gake ŋutilãa ya gbɔdzɔ.” 39  Eye wògadzo yi ɖado gbe ɖa, hegblɔ nya ma ke. 40  Eye wògatrɔ va hekpɔ wo wonɔ alɔ̃ dɔm, elabena alɔ̃ bla ŋku na wo, eya ta womenya nya si woagblɔ nɛ o. 41  Eye wògava zi etɔ̃lia, eye wògblɔ na wo be: “Ɣeyiɣi sia mee mianɔ alɔ̃ dɔm ahanɔ ɖiɖim ɖe emea? Esɔ gbɔ! Gaƒoƒo la de! Kpɔ ɖa! Wotsɔ Amegbetɔvi la de asi na nu vɔ̃ wɔlawo. 42  Mitso, mina mídzo. Kpɔ ɖa! Ame si dem asi la gogo.” 43  Eye enumake esi wòganɔ nuƒoƒo dzi la, Yuda, ame wuieveawo dometɔ ɖeka, va ɖo, eye ameha siwo lé yiwo kple kpowo ɖe asi la tso nunɔlawo ƒe tatɔwo kple agbalẽfialawo kpakple amegãwo gbɔ kplɔe ɖo. 44  Ke ame si dee asi la ɖo dzesi aɖe ɖi na wo be: “Ame si magbugbɔ nu na la, eyae; milée, eye mikplɔe yii dedie.” 45  Eye wòzɔ tẽe te ɖe eŋu gblɔ be: “Rabi!” eye wògbugbɔ nu nɛ. 46  Eya ta wodze edzi, eye wolée. 47  Gake ame siwo nɔ tsitre ɖe afi ma la dometɔ ɖeka ɖe eƒe yi, eye wòda nu nunɔlagã ƒe kluvi, eye wòkpa to nɛ. 48  Gake Yesu gblɔ na wo be: “Yiwo kple kpowoe mietsɔ do go be miava lém abe adzodala enea? 49  Menɔa mia gbɔ le gbedoxɔ me tso ŋkeke yi ŋkeke nɔa nu fiam, gake mielém kpɔ o. Ke hã, ele alea, bene Ŋɔŋlɔawo nava eme.” 50  Eye wo katã wogblẽe ɖi hesi dzo. 51  Gake ɖekakpui aɖe si do aklalawu nyui aɖe ɖeɖe ko la kplɔe ɖo; eye wodze agbagba be yewoalée, 52  ke egblẽ eƒe aklalawua ɖi hesi dzo awumadomadoe. 53  Azɔ wokplɔ Yesu yi nunɔlagã gbɔ, eye nunɔlawo ƒe tatɔwo kple amegãwo kpakple agbalẽfialawo katã va ƒo ƒu. 54  Gake Petro nɔ adzɔge ɖaa le eyome, eye wòkplɔe ɖo va keke nunɔlagã ƒe aƒea me ke; eye wònɔ anyi ɖe aƒemesubɔviawo gbɔ nɔ dzo aɖe si lelém nyuie la ƒum. 55  Ɣemaɣi la, nunɔlawo ƒe tatɔwo kple Sanhedrin blibo la nɔ ɖaseɖiɖi dim tso Yesu ŋu, ne woawui, gake womenɔ ɖeke kpɔm o. 56  Le nyateƒe me la, ame geɖewo nɔ aʋatsoɖase ɖim le eŋuti, gake woƒe nutsotsoawo mesɔ kple wo nɔewo tɔ o. 57  Azɔ hã, ame aɖewo tsi tsitre henɔ aʋatsoɖase ɖim ɖe eŋu, nɔ gbɔgblɔm be: 58  “Míesee wògblɔ be, ‘Magbã gbedoxɔ sia si wotsɔ asi wɔ la, eye le ŋkeke etɔ̃ me la, matu bubu si wometsɔ asi wɔ o.’” 59  Ke hã, woƒe nutsotsoawo mesɔ le nya siawo hã me o. 60  Mlɔeba nunɔlagã la tso ɖe tsitrenu le wo dome hebia Yesu be: “Mèle nya aɖeke gblɔ ge atsɔ aɖo eŋu oa? Nutsotso kawoe nye esiawo nam wole ɖe ŋuwò?” 61  Gake ezi kpi, eye meɖo nya aɖeke kura ŋu o. Eye nunɔlagã la gade asi nyabiabiae me gblɔ nɛ be: “Wòe nye Yayratɔ la ƒe Vi Kristo laa?” 62  Azɔ Yesu gblɔ be: “Nyee; eye miakpɔ Amegbetɔvi la wòabɔbɔ anɔ anyi ɖe ŋusẽ ƒe ɖusi me gbɔna kple dziƒolilikpowo.” 63  Tete nunɔlagã la dze eƒe awu etetɔwo hegblɔ be: “Ðe ɖasefo bubuwo gahiã mía? 64  Miese busunya la. Nya kae le mia si?” Wo katã wobu fɔe be edze ku. 65  Eye ame aɖewo de asi taɖeɖe ɖe eŋu me, eye wotsyɔ nu mo nɛ hetu kɔe gblɔ nɛ be: “Ne nyagblɔɖilae nènye la, ekema gblɔ ame si ƒo wò la na mí!” Eye esi ʋɔnudrɔ̃ƒea ƒe dzɔlawo ƒo tome nɛ vɔ la, wokplɔe yii. 66  Ke esi Petro nɔ aƒea me le gɔmea la, nunɔlagã la ƒe dɔlanyɔnuviwo dometɔ ɖeka va, 67  eye esi wòkpɔ Petro wònɔ dzo ƒum la, ekpɔ eƒe ŋkume dũu hegblɔ be: “Wò hã enɔ Yesu sia, Nazaretetɔ la ŋu.” 68  Gake egbe gblɔ be: “Nyemenyae o, eye nyemese nya si gblɔm nèle hã gɔme o,” eye wòdo go yi akpata la me. 69  Esi dɔlanyɔnuvia kpɔe le afi ma la, egate gbɔgblɔ na ame siwo le tsitre ɖe afi ma la be: “Wo dometɔ ɖekae nye esia.” 70  Eganɔ gbegbem ake. Eye le ɣeyiɣi ʋɛ aɖe megbe la, ame siwo le tsitre ɖe afi ma la gate gbɔgblɔ na Petro ake be: “Nyateƒee, wo dometɔ ɖekae nènye, elabena Galileatɔ hãe nènye.” 71  Gake ede asi fiƒodenyawo gbɔgblɔ me heta nu be: “Nyemenya ame sia si ŋuti miele nu ƒom le la o.” 72  Kasia koklo ku atɔ zi evelia; eye Petro ɖo ŋku nya si Yesu gblɔ nɛ la dzi be: “Hafi koklo naku atɔ zi eve la, àgbe nu le gbɔnye zi etɔ̃.” Eye eƒe dzi gbã, eye wòwó avi.

Etenuŋɔŋlɔ

Enye Aramgbe me nya si gɔmee nye “fofo la,” alo, “Oo, Fofo.”