Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Marko 13:1-37

13  Esi wònɔ dodom le gbedoxɔa me la, eƒe nusrɔ̃lawo dometɔ ɖeka gblɔ nɛ be: “Nufiala, kpɔ ɖa! Kpe kawo gbegbee nye esi, eye xɔ kawo gbegbee nye esi!”  Gake Yesu gblɔ nɛ be: “Èle xɔtutu gã siawo kpɔma? Womele kpe aɖeke gblẽ ge ɖe kpe dzi le afi sia, si womamu aƒu anyi o.”  Eye esi wòbɔbɔ nɔ anyi ɖe Amitoa dzi dze ŋgɔ gbedoxɔa la, Petro kple Yakobo kple Yohanes kpakple Andrea ɖeɖe va biae be:  “Gblɔe na mí: Ɣekaɣie nu siawo adzɔ, eye nu kae anye dzesi na ɣeyiɣi si me nu siawo katã ƒe nuwuɣi aɖo?”  Eye Yesu de asi gbɔgblɔ me na wo be: “Mikpɔ nyuie be ame aɖeke nagakplɔ mi atrae o.  Ame geɖewo ava le nye ŋkɔ me agblɔ be, ‘Nyee nye ame ma,’ eye woakplɔ ame geɖewo atrae.  Eye ne miese aʋawɔwɔwo kple aʋawɔwɔwo ŋuti nyawo la, dzika negatso mia ƒo o; ele be nu siawo nava eme, gake nuwuwu la meɖo haɖe o.  “Elabena dukɔ atsi tsitre ɖe dukɔ ŋu, eye fiaɖuƒe ɖe fiaɖuƒe ŋu, anyigba aʋuʋu le teƒeteƒewo, nuɖuɖu ave. Nu siawo nye fuɖuame ƒe gɔmedzedze.  “Ke miawo la, mikpɔ mia ɖokui dzi nyuie; amewo ade mi asi na nutoa me ʋɔnudrɔ̃ƒewo, eye woaƒo mi le ƒuƒoƒewo, eye woana miaɖe mia ɖokui nu le nutomefiawo kple dufiawo ŋkume le tanye, be wòanye ɖaseɖiɖi na wo. 10  Eye ele be woaɖe gbeƒã nya nyui la le dukɔwo katã me gbã. 11  Gake ne wokplɔ mi yina asi de ge la, migatsi dzimaɖi do ŋgɔ le nya si miagblɔ ŋu o; ke boŋ nya sia nya si woana mi le gaƒoƒo ma me la, migblɔe, elabena menye miawoe le nu ƒom o, ke boŋ gbɔgbɔ kɔkɔe lae. 12  Gawu la, nɔvi ade nɔvi asi be woawu, eye fofo ade vi asi, eye ɖeviwo atsi tsitre ɖe wo dzilawo ŋu ahana woawu wo; 13  eye amewo katã alé fu mi le nye ŋkɔ la ta. Gake ame si do dzi va se ɖe nuwuwu la, eyae akpɔ ɖeɖe. 14  “Gake ne miaƒe ŋku kli ŋunyɔnu si ahe aƒedozuzu avae la wòtsi tsitre ɖe afi si mele be wòanɔ o la, (nuxlẽla nebu eŋu ne wòase egɔme) ekema ame siwo le Yudea nate sisi ayi towo dzi. 15  Ame si le xɔ ta la nagaɖi, alo ayi eme be yeatsɔ nane tso yeƒe aƒe me o; 16  eye ame si le agble la nagatrɔ agbɔ va nu siwo le megbe gbɔ, be yeatsɔ yeƒe awudziwui o. 17  Baba na nyɔnu funɔwo kple ame siwo le no nam vidzĩ le ŋkeke mawo me! 18  Miyi edzi mianɔ gbe dom ɖa, be wòagadzɔ le vuvɔŋɔli o; 19  elabena ŋkeke mawo anye xaxa, si tɔgbi meva kpɔ tso nuwɔwɔ siwo Mawu wɔ la ƒe gɔmedzedze va se ɖe ɣemaɣi o la, ƒe ŋkeke, eye magava ake o. 20  Le nyateƒe me la, ne Yehowa metso ŋkeke mawo dzi o la, ŋutilã aɖeke makpɔ ɖeɖe o. Gake le ame tiatia siwo wòtia ta la, etso ŋkeke mawo dzi. 21  “Azɔ hã, ne ame aɖe gblɔ na mi be, ‘Kpɔ ɖa! Kristo la le afii,’ ‘Kpɔ ɖa! Eyae nye ema ɖaa’ la, migaxɔe se o. 22  Elabena aʋatsokristowo kple aʋatsonyagblɔɖilawo atsi tsitre, eye woawɔ dzesiwo kple nukunuwo be, ne anya wɔ la, woakplɔ ame tiatiawo atrae. 23  Eya ta minɔ ŋudzɔ; mena toklã mi tso nya sia nya ŋu. 24  “Gake le ŋkeke mawo me, ne xaxa ma va vɔ la, ɣe ado viviti, eye ɣleti mana eƒe kekeli o, 25  eye ɣletiviwo anɔ gegem tso dziƒo, eye woaʋuʋu ŋusẽ siwo le dziƒowo. 26  Eye ekema woakpɔ Amegbetɔvi la le alilikpowo me gbɔna kple ŋusẽ gã kpakple ŋutikɔkɔe. 27  Ekema adɔ mawudɔlawo ɖa, eye aƒo eƒe ame tiatiawo nu ƒu tso ya eneawo dzi, tso anyigba ƒe seƒe ke va se ɖe dziƒo ƒe seƒe ke. 28  “Azɔ misrɔ̃ nu tso gboti ƒe kpɔɖeŋu sia me: Ne eƒe alɔ fẽa tsi, eye wònya to aŋgbawo ko la, mienyana be dzomeŋɔli gogo. 29  Nenema kee miawo hã, ne miekpɔ nu siawo le dzɔdzɔm la, minyae be egogo, le ʋɔtruawo nu. 30  Vavã mele egblɔm na mi be, dzidzime sia nu mele yiyi ge akpɔ o, va se ɖe esime nu siawo katã nadzɔ. 31  Dziƒo kple anyigba nu ava yi, gake nye nyawo ya nu mayi o. 32  “Le ŋkeke ma alo gaƒoƒo la ŋuti la, ame aɖeke menyae o, mawudɔla siwo le dziƒo la menyae o, eye Vi la hã menyae o, negbe Fofo la ko. 33  Minɔ mia ɖokui dzi kpɔm nyuie, minɔ ŋudzɔ, elabena mienya ɣekaɣie nye ɣeyiɣi ɖoɖi la o. 34  Ele abe ŋutsu aɖe si le mɔ zɔm yina duta, eye wògblẽ eƒe aƒea ɖi na eƒe kluviwo hena ŋusẽ wo ɖe edzi la ene; ede dɔ asi na wo dometɔ ɖe sia ɖe, eye wòde se na agbonudzɔla la be wòanɔ ŋudzɔ. 35  Eya ta minɔ ŋudzɔ, elabena mienya ɣekaɣi aƒetɔa le vava ge o, eɖanye fiẽ alo zãtiƒe alo koklo ƒe atɔkuɣi alo ŋdikanya o;* 36  be ne eva ɖo le vo me la, wòagakpɔ mi le alɔ̃ me o. 37  Gake nu si gblɔm mele na mi la, amewo katãe mele egblɔm na be: Minɔ ŋudzɔ.”

Etenuŋɔŋlɔ

“Fiẽ.” Esiae nye Helatɔwo kple Romatɔwo ƒe ŋudzɔɣi gbãtɔ le ale si woma zãe nu, tso ɣeɖoto va se ɖe zã ga 9 lɔƒo. “Zãtiƒe.” Esiae nye Helatɔwo kple Romatɔwo ƒe zã ŋudzɔɣi evelia, tso zã ga 9 lɔƒo va se ɖe zã ga 12. “Koklo ƒe atɔkuɣi.” Helatɔwo kple Romatɔwo ƒe zã ŋudzɔɣi etɔ̃lia, tso zã ga 12 va se ɖe fɔŋli ga 3 lɔƒo. “Ŋdikanya.” Helatɔwo kple Romatɔwo ƒe zã ŋudzɔɣi enelia, tso fɔŋli ga 3 lɔƒo va se ɖe esime agu dze.