Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Marko 12:1-44

12  Azɔ hã, ete nuƒoƒo na wo to kpɔɖeŋuwo me be: “Ame aɖe de waingble, eye wòtɔ kpɔ ƒo xlãe, ewɔ wainfiãƒe ɖe eme, eye wòtu xɔ kɔkɔ aɖe ɖe eme, eye wòtsɔe de asi na agbledela aɖewo, eye wòzɔ mɔ yi duta.  Ke esi nuŋeɣi ɖo la, edɔ eƒe kluvi ɖeka ɖe agbledelaawo gbɔ, be wòaxɔ waingble la me kutsetse aɖewo tso agbledelaawo gbɔ avae.  Ke wolée, ƒoe, eye wogbugbɔe ɖo ɖa asi ƒuƒlui.  Eye wògadɔ kluvi bubu ɖe wo gbɔ; eye woxlã nu ɖe ta na eya hedo vloe.  Eye wògadɔ kluvi bubu, ke wowu eya; egadɔ bubu geɖewo, gake woƒo wo dometɔ aɖewo, eye wowu wo dometɔ aɖewo hã.  Ame ɖeka ganɔ esi, si nye via si gbɔ melɔ̃a nu le o. Mlɔeba la, edɔe ɖe wo gbɔ gblɔ be, ‘Woabu vinyea ya.’  Gake agbledela mawo gblɔ le wo nɔewo dome be: ‘Ame siae nye domenyila la. Miva ne míawui, ne domenyinu la nazu mía tɔ.’  Ale wolée hewui, eye wokɔe ƒu gbe ɖe waingble la godo.  Nu kae waingbletɔa awɔ? Ava, eye wòatsrɔ̃ agbledelaawo, eye wòatsɔ waingble la ade asi na ame bubuwo. 10  Ðe miexlẽ ŋɔŋlɔ sia kpɔ oa, be, ‘Kpe si xɔtulawo gbe la, esiae va zu dzogoedzikpe vevitɔ. 11  Yehowa gbɔe esia tso va eme, eye wònye nukunu le míaƒe ŋkuwo me’?” 12  Ale wote mɔnudidi le ale si woawɔ alée ŋu, gake wonɔ vɔvɔ̃m na ameha la, elabena wokpɔe dze sii be yewo tae wòwɔ kpɔɖeŋua ɖo. Eya ta wogblẽe ɖi hedzo. 13  Emegbe wodɔ Farisitɔwo kple Herodes habɔbɔ me nɔlawo dometɔ aɖewo ɖe egbɔ, be woalée le eƒe nuƒo me. 14  Esi ame siawo va la, wogblɔ nɛ be: “Nufiala, míenyae be ètoa nyateƒe, eye mèdea ame dzi o, elabena mèwɔa nu ɖe ame ƒe gotagome dzedzeme nu o, ke boŋ èfiaa Mawu ƒe mɔ la le nyateƒea nu: Ðe se ɖe mɔ be míaxe adzɔ na Kaisaroa, alo se meɖe mɔ o? 15  Ðe wòle be míaxee loo alo mele be míaxee o?” Esi wòkpɔ woƒe alakpanuwɔwɔa la, egblɔ na wo be: “Nu ka tae miele teyem kpɔ? Mitsɔ denario ɖeka vae nam makpɔ.” 16  Wotsɔ ɖeka vae. Eye wògblɔ na wo be: “Ame ka ƒe nɔnɔmetata kple nuŋɔŋlɔ ye nye esia?” Wogblɔ nɛ be: “Kaisaro tɔe.” 17  Eya ta Yesu gblɔ be: “Mitsɔ nu siwo nye Kaisaro tɔ la na Kaisaro, gake nu siwo nye Mawu tɔ la, na Mawu.” Eye eƒe nu wɔ nuku na wo. 18  Azɔ Zadukitɔwo va egbɔ, ame siwo gblɔna be tsitretsitsi aɖeke meli o, eye wotsɔ nyabiase sia ɖo eŋkume be: 19  “Nufiala, Mose ŋlɔ ɖi na mí be ne ame aɖe nɔviŋutsu ku, eye wògblẽ srɔ̃ ɖi, gake megblẽ vi aɖeke ya ɖi o la, ele be nɔvia naxɔ nyɔnua aɖe, eye wòado ƒome ɖi na nɔvia. 20  Nɔviŋutsu adre aɖewo nɔ anyi; eye gbãtɔa ɖe srɔ̃, gake esi wòku la, megblẽ vi aɖeke ɖi o. 21  Eye evelia ɖe nyɔnua, gake eya hã ku esi megblẽ vi aɖeke ɖi o, eye etɔ̃lia hã nenema ke. 22  Eye wo ame adre la dometɔ aɖeke megblẽ vi aɖeke ɖi o. Mlɔeba la, nyɔnu la hã va ku. 23  Le tsitretsitsia me ɖe, wo dometɔ ka srɔ̃ wòanye? Elabena wo ame adre la katã ɖee kpɔ.” 24  Yesu gblɔ na wo be: “Ðe menye esia tae mieda ƒu, elabena mienya Ŋɔŋlɔawo alo Mawu ƒe ŋusẽ la oa? 25  Elabena ne wofɔ tso ame kukuwo dome la, ŋutsuwo meɖea srɔ̃ o, eye wometsɔa nyɔnuwo nana be woaɖe o, ke boŋ wonɔna abe mawudɔla siwo le dziƒo ene. 26  Gake le ame kukuwo ŋuti, be woafɔ ɖe tsitre la, ɖe miexlẽe le Mose ƒe agbalẽa me kpɔ, le ŋuve ŋuti nuŋlɔɖia me, ale si Mawu gblɔ nɛ be: ‘Nyee nye Abraham ƒe Mawu kple Isak ƒe Mawu kple Yakob ƒe Mawu’ oa? 27  Menye ame kukuwo ƒe Mawue wònye o, ke boŋ agbagbeawo tɔe. Mieda ƒu ŋutɔ.” 28  Ke esi agbalẽfialawo dometɔ ɖeka si va hesee wonɔ nya ʋlim la, nyae be eɖo eŋu na wo nyuie la, ebiae be: “Se kae nye gbãtɔ le wo katã dome?” 29  Yesu ɖo eŋu be: “Gbãtɔe nye, ‘Oo Israel, see, Yehowa mía Mawu la, Yehowa ɖeka koe, 30  eye ele be nàlɔ̃ Yehowa wò Mawu, kple wò dzi blibo kple wò luʋɔ blibo kple wò tamesusu blibo kpakple wò ŋusẽ blibo.’ 31  Eveliae nye esi, ‘Ele be nàlɔ̃ hawòvi abe wò ŋutɔ ɖokuiwò ene.’ Se bubu aɖeke meli si lolo wu esiawo o.” 32  Agbalẽfiala la gblɔ nɛ be: “Nufiala, ègblɔe nyuie le nyateƒe la nu be, ‘Ðeka koe wònye, eye bubu aɖeke megali o, negbe Eya ko’; 33  eye be woalɔ̃e kple ame ƒe dzi blibo kple ame ƒe gɔmesese blibo kple ame ƒe ŋusẽ blibo, eye be woalɔ̃ ame havi abe ame ɖokui ene alea la, exɔ asi sãsãsã wu numevɔsawo kple vɔsasawo katã.” 34  Esi Yesu kpɔ be eɖo nyaa ŋu nunyatɔe la, egblɔ nɛ be: “Mèle adzɔge tso Mawu fiaɖuƒe la gbɔ o.” Ke dzi megaɖo ame aɖeke ƒo be wòabia nya bubu aɖekee o. 35  Gake esi Yesu nɔ nyaa ŋu ɖom la, ete gbɔgblɔ, abe ale si wòfia nui le gbedoxɔa me ene be: “Aleke wɔ agbalẽfialawo gblɔna be David vie Kristo la nye? 36  David ŋutɔ gblɔ to gbɔgbɔ kɔkɔe la dzi be: ‘Yehowa gblɔ na nye Aƒetɔ be: “Bɔbɔ nɔ anyi ɖe nye nuɖusi me, va se ɖe esime matsɔ wò futɔwo ade wò afɔ te.”’ 37  David ŋutɔ yɔe be ‘Aƒetɔ,’ ke aleke wòdzɔe be wònye via?” Eye ameha gã la nɔ to ɖomee dzidzɔtɔe. 38  Eye le eƒe nufiafia me la, eyi edzi gblɔ be: “Mikpɔ mia ɖokui dzi nyuie le agbalẽfiala siwo dina be yewoanɔ awu ʋlayawo me anɔ tsatsam, eye wolɔ̃a gbedonamewo le asi me, 39  kple ŋgɔgbezikpuiwo dzi nɔnɔ le ƒuƒoƒewo, kpakple bubunɔƒewo nɔnɔ le fiẽnuɖuƒewo la ŋu. 40  Woawoe nye ame siwo baa ahosiwo hexɔa woƒe aƒewo le wo si, eye wowɔa ameŋkumenu nɔa gbe legbewo dom ɖa; ame siawo ƒe ʋɔnudɔdrɔ̃ le sesẽ ge wu.” 41  Eye wòbɔbɔ nɔ anyi dze ŋgɔ nudzɔɖakawo, eye wòte ŋkuléle ɖe ale si amewo nɔ ga dam ɖe nudzɔɖakawo mee ŋu; eye kesinɔtɔ geɖewo tsɔ gaku geɖe nɔ wo me dem. 42  Azɔ ahosi dahe aɖe va de gaku sue eve, siwo ƒe home le sue ŋutɔ la, eme. 43  Eya ta eyɔ eƒe nusrɔ̃lawo va eɖokui gbɔ gblɔ na wo be: “Vavã mele egblɔm na mi be, nu si ahosi dahe sia tsɔ de eme la sɔ gbɔ wu esi ame mawo katã de nudzɔɖakaawo me; 44  elabena wo katã wotsɔ nu siwo le wo si la ƒe ɖe ko va de eme, gake eya tso eƒe ahedada me tsɔ nu siwo katã le esi, si nu wòanɔ agbe ɖo la, de eme.”

Etenuŋɔŋlɔ