Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Marko 1:1-45

1  Nya nyui si ku ɖe Yesu Kristo ŋu ƒe gɔmedzedze:  Abe ale si woŋlɔe ɖe Yesaya nyagblɔɖila la ƒe agbalẽ mee ene: “(Kpɔ ɖa! Mele nye dɔla dɔm ɖe ŋgɔwò, ame si adzra wò mɔ dzi ɖo;)  se ɖa! Ame aɖe le ɣli dom le gbedadaƒo be, ‘Midzra Yehowa ƒe mɔ dzi ɖo, mina eƒe mɔwo nadzɔ;’”  Yohanes amenyrɔɖetsimela va do le gbedadaƒo henɔ gbeƒã ɖem nyɔnyrɔxɔxɔ, si nye dzesi na dzimetɔtrɔ hena nu vɔ̃wo ƒe tsɔtsɔke.  Eya ta Yudea nyigba blibo la kple Yerusalem nɔlawo katã dze mɔ yi egbɔ, eye wònyrɔ wo ɖe Yordan Tɔsisia me, eye wonɔ woƒe nu vɔ̃wo me ʋum faa.  Ke Yohanes do kposɔfuwu, eye lãgbalẽlidziblanu le eƒe ali, eye wòɖua ʋetsuviwo henoa gbemenyitsi.  Eye wònɔ gbeƒã ɖem be: “Ame aɖe le megbenye gbɔna, si tri akɔ wum; nyemedze abɔbɔ atu eƒe afɔkpakawo o.  Metsɔ tsi nyrɔ mi, gake eya atsɔ gbɔgbɔ kɔkɔe anyrɔ mi.”  Le ŋkeke mawo me la, Yesu tso Nazaret le Galilea va, eye Yohanes nyrɔe ɖe Yordan me. 10  Eye enumake esi wònɔ fɔfɔm tso tsia te la, ekpɔ be dziƒowo nu nɔ ʋuʋum, eye gbɔgbɔ la nɔ ɖiɖim ɖe edzi abe ahɔnɛ ene; 11  eye gbe aɖe ɖi tso dziƒo be: “Wòe nye Vinye, si gbɔ nyemelɔ̃a nu le o; mekpɔ ŋudzedze ɖe ŋuwò.” 12  Eye enumake gbɔgbɔ la ƒoe ɖe enu wòyi gbedadaƒo. 13  Eye wònɔ gbedadaƒo ŋkeke blaene, eye wònɔ anyi kple gbemelãwo, eye Satana nɔ etem kpɔ, gake mawudɔlawo nɔ kpekpeɖeŋu namee. 14  Ke esi wolé Yohanes megbe la, Yesu yi Galilea henɔ gbeƒã ɖem Mawu ƒe nya nyui la, 15  eye wònɔ gbɔgblɔm be: “Ɣeyiɣi ɖoɖi la de, eye Mawu fiaɖuƒe la gogo. Mitrɔ dzi me, eye mixɔ nya nyui la dzi se.” 16  Esi wònɔ Galilea ƒua nu tom yina la, ekpɔ Simon kple Andrea, si nye Simon nɔvi, wonɔ woƒe ɖɔwo dam ɖe ƒua me, elabena tɔƒodelawo wonye. 17  Eye Yesu gblɔ na wo be: “Miva dze yonyeme, eye mawɔ mi miazu ameɖelawo.” 18  Eye enumake wogblẽ woƒe ɖɔawo ɖi, eye wodze eyome. 19  Eye esi wòyi ŋgɔ vie la, ekpɔ Yakobo, Zebedeo vi, kple nɔvia Yohanes esime wonɔ woƒe tɔdziʋu me nɔ woƒe ɖɔwo sam; 20  eye wòyɔ wo enumake. Ale wogblẽ wo fofo Zebedeo kple ɖɔkplɔviawo ɖi, eye wodze eyome. 21  Eye wodzo yi Kapernaum. Esi sabat ŋkekea nya ɖo ko la, eyi ƒuƒoƒe la, eye wòte nufiafia. 22  Eye wolulu le ale si wòfia nui ta, elabena enɔ nu fiam wo abe ame si si ŋusẽ le ene, ke menye abe agbalẽfialawo ene o. 23  Eye le ɣeyiɣi ma tututu me la, ŋutsu aɖe si dzi gbɔgbɔ makɔmakɔ aɖe kpɔ ŋusẽ ɖo la nɔ woƒe ƒuƒoƒe la, eye wòdo ɣli 24  gblɔ be: “Nya kae le mía kpli wò dome, Yesu Nazaretetɔ? Ðe nèva be yeatsrɔ̃ mía? Menya ame si tututu nènye, Mawu ƒe Kɔkɔetɔ lae nènye.” 25  Gake Yesu ka mo nɛ gblɔ be: “Zi ɖoɖoe, eye nàdo go le eme!” 26  Eye esi gbɔgbɔ makɔmakɔ la na wòƒo tititi, eye gbɔgbɔ la do ɣli kple eƒe ŋusẽ katã vɔ la, edo go le eme. 27  Eye ewɔ mo yaa na ameawo katã ale gbegbe be wote nuƒoƒo le wo nɔewo dome, nɔ gbɔgblɔm be: “Nu ka gɔ̃e nye esia? Nufiafia yeye! Etsɔa ŋusẽ ɖea gbe na gbɔgbɔ makɔmakɔwo kura gɔ̃ hã, eye woɖoa toe.” 28  Ale eŋuti nya kaka enumake ɖe afi sia afi le Galilea nutoa katã me godoo. 29  Eye enumake wodo go le ƒuƒoƒe la, eye Yakobo kple Yohanes kpe ɖe wo ŋu yi Simon kple Andrea ƒe aƒe me. 30  Ke asrã lé Simon lɔ̃xo wònɔ anyimlɔƒe, eye wogblɔ nyɔnua ŋu nya nɛ enumake. 31  Eye esi wòyi egbɔ la, elé eƒe alɔnu hena wòfɔ; eye asrã la vɔ nɛ, eye wòde asi amedzrowɔwɔ me na wo. 32  Esi fiẽ ɖo vɔ, eye ɣe ɖo to la, amewo te dɔnɔwo kple ame siwo me gbɔgbɔ vɔ̃wo le la kpɔkplɔ va egbɔe; 33  eye du blibo la katã va ƒo ƒu ɖe ʋɔtrua nu tututu. 34  Eye wòda dɔ na ame geɖe siwo ŋu dɔléle vovovowo le, eye wònya gbɔgbɔ vɔ̃ geɖewo do goe, gake meɖea mɔ na gbɔgbɔ vɔ̃awo be woaƒo nu o, elabena wonyae be eyae nye Kristo. 35  Eye le ŋdikanya, esi xexea me mekpɔ kɔ nyuie haɖe o la, efɔ, eye wòdo go yi afi si ame aɖeke mele o, eye wòte gbedodoɖa le afi ma. 36  Ke hã, Simon kple ame siwo kpe ɖe eŋu la dii 37  heke ɖe eŋu, eye wogblɔ nɛ be: “Ame sia ame koe le diwòm.” 38  Gake egblɔ na wo be: “Mina míayi teƒe bubu, le kɔƒedu siwo gogo afi sia la me, be maɖe gbeƒã le teƒe mawo hã, elabena tameɖoɖo sia tae medo go ɖo.” 39  Eye wòyi henɔ gbeƒã ɖem le woƒe ƒuƒoƒewo le Galilea blibo la katã, eye wònɔ gbɔgbɔ vɔ̃wo nyam nɔ do gom. 40  Kpodɔléla aɖe hã va egbɔ, edze klo kura gɔ̃ hã, henɔ kuku ɖem nɛ vevie gblɔ be: “Ne èlɔ̃ ko la, àte ŋu ana ŋutinye nakɔ.” 41  Nya sia na eƒe nu wɔ nublanui nɛ, eye wòdo eƒe asi ɖa heka asi eŋu gblɔ nɛ be: “Melɔ̃. Ŋutiwò nekɔ.” 42  Eye enumake kpodɔ la vɔ nɛ, eye eŋuti kɔ. 43  Ede se hã nɛ vevie, eye wòdo mɔe enumake, 44  gblɔ nɛ be: “Kpɔ egbɔ be nàgagblɔ nya aɖeke na ame aɖeke o, ke boŋ yi nàtsɔ ɖokuiwò afia nunɔla, eye nàna ŋuwò kɔkɔ ƒe nuwo, abe ale si Mose de see ene, be wòanye ɖaseɖiɖi na wo.” 45  Gake esi ŋutsua dzo la, ete gbeƒãɖeɖe lelele tso nya la ŋu hekakae ale gbegbe be, Yesu megate ŋu gena ɖe du aɖeke me gaglãa o, ke boŋ dua godo koe wònɔna le afi si amewo mele o. Ke hã, amewo gatsoa teƒeteƒewo vana egbɔ kokoko.

Etenuŋɔŋlɔ