Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Luka 9:1-62

9  Eye wòyɔ ame wuieveawo ƒo ƒu, eye wòna ŋusẽ wo be woaɖu gbɔgbɔ vɔ̃wo katã dzi, eye be woada dɔlélewo.  Eye wòdɔ wo be woaɖe gbeƒã Mawu fiaɖuƒe la ahada dɔ na amewo,  eye wògblɔ na wo be: “Migatsɔ naneke ɖe asi hena mɔzɔzɔa o, eɖanye atizɔti, alo nuɖuɖukotoku, alo abolo alo klosaloga o; eye migatsɔ awutewui eve o.  Gake afi sia afi si miage ɖe aƒe aɖe me le la, minɔ afi ma, eye migadze mɔ tso afi ma.  Eye le teƒe sia teƒe si amewo mexɔ mi le o la, ne miele dzodzom le du ma me la, miʋuʋu ke si le miaƒe afɔ ŋu la ɖe anyi wòanye ɖaseɖiɖi na wo.”  Eye wodze mɔ yi ɖato nutoa katã me tso kɔƒe me yi kɔƒe me, nɔ gbeƒã ɖem nya nyui la henɔ dɔ dam le afi sia afi.  Ke Herodes nutomedziɖula la se nu siwo katã nɔ dzɔdzɔm, eye wòtɔtɔ ŋutɔ, elabena ame aɖewo nɔ gbɔgblɔm be wofɔ Yohanes tso ame kukuwo dome,  ke bubuwo ya be Eliya ye va do, ke bubu aɖewo hã be blema nyagblɔɖilawo dometɔ ɖekae tsi tsitre.  Herodes gblɔ be: “Yohanes ya la, metso ta le enu. Ke ame kae nye ame sia si ŋuti mele nya siawo sem le?” Eya ta enɔ didim be yeakpɔe. 10  Eye esi apostoloawo trɔ gbɔ la, wogblɔ nu siwo wowɔ la nɛ. Ale wòkplɔ wo, eye woawo ɖeɖe woyi du aɖe si woyɔna be Betsaida la me. 11  Gake esi amehaawo nya la, wodze eyome. Eye exɔ wo nyuie, eye wòte nuƒoƒo na wo tso Mawu fiaɖuƒe la ŋu, eye wòda dɔ na ame siwo katã hiã dɔyɔyɔ. 12  Azɔ ŋkekea nɔ enu wum. Eye ame wuieveawo va egbɔ gblɔ nɛ be: “Ðe asi le ameha la ŋu, ne woayi kɔƒewo me kple agbleta siwo ƒo xlã mí la, be woadi dzeƒe kple nuɖuɖu, elabena teƒe tsoaboe nye afi sia si míele.” 13  Gake egblɔ na wo be: “Mia ŋutɔwo mina nu wo woaɖu.” Wogblɔ be: “Naneke mele mía si wu abolo atɔ̃ kple tɔmelã eve o, negbe ɖeko mía ŋutɔwo míayi aɖaƒle nuɖuɖu na ame siawo katã.” 14  Le nyateƒe me la, woanɔ ŋutsu akpe atɔ̃. Gake egblɔ na eƒe nusrɔ̃lawo be: “Mina woabɔbɔ anɔ anyi abe ale si wonɔa anyi ɖua nui ene, hatsotso hatsotso, ɖe sia ɖe nanɔ abe ame blaatɔ̃ ene.” 15  Eye wowɔe nenema, eye wona wo katã wonɔ anyi. 16  Azɔ esi wòtsɔ abolo atɔ̃awo kple tɔmelã eveawo la, efɔ mo dzi kpɔ dziƒo, yra ɖe wo dzi, eye wòŋe wo me hete wo tsɔtsɔ na eƒe nusrɔ̃lawo, be woatsɔ wo aɖo ameha la kɔme. 17  Ale wo katã woɖu nu ɖi ƒo, eye woƒo esiwo susɔ la nu ƒu, wode kakɛ kusi wuieve nu. 18  Emegbe esi eya ɖeka nɔ gbe dom ɖa la, nusrɔ̃lawo va egbɔ, eye wòbia wo be: “Ame kae amehaawo le gbɔgblɔm be menye?” 19  Woɖo eŋu nɛ be: “Yohanes Amenyrɔɖetsimela; bubuwo be Eliya, bubuwo hã be blema nyagblɔɖilawo dometɔ ɖekae tsi tsitre.” 20  Azɔ egblɔ na wo be: “Ke miawo ya ɖe, ame kae miegblɔna be menye?” Petro ɖo eŋu be: “Mawu ƒe Kristo la.” 21  Ke eƒo nu na wo vevie gblɔ be woaganɔ nya sia gblɔm na ame aɖeke o, 22  gake egblɔ be: “Ele na Amegbetɔvi la be wòakpe fu geɖe, eye amegãwo kple nunɔlawo ƒe tatɔwo kple agbalẽfialawo agbee, eye woawui, eye woafɔe ɖe tsitre le ŋkeke etɔ̃agbe.” 23  Eye wòyi edzi gblɔ na wo katã be: “Ne ame aɖe di be yeadze yonyeme la, negbe nu le eɖokui gbɔ, eye wòatsɔ eƒe fuwɔameti la gbe sia gbe, eye wòadze yonyeme ɖaa. 24  Elabena ame sia ame si dina be yeaɖe yeƒe luʋɔ la abui; gake ame sia ame si abu eƒe luʋɔ le tanye la, eyae aɖee. 25  Le nyateƒe me la, viɖe kae wòanye na ame, ne xexe blibo la katã zu etɔ, gake wòbu ye ŋutɔ ɖokui alo nu sia nu? 26  Elabena ame sia ame si nye kple nye nyawo kpea ŋu na la, eƒe nu akpe ŋu na Amegbetɔvi la hã ne eva ɖo le ye ŋutɔ kple Fofoa kpakple mawudɔla kɔkɔeawo ƒe ŋutikɔkɔe me. 27  Gake vavã mele egblɔm na mi be: Ame aɖewo le ame siwo tsi tsitre ɖe afi sia dome, siwo maɖɔ ku kpɔ o, va se ɖe esime wokpɔ Mawu fiaɖuƒe la hafi.” 28  Eva eme hã vavã be, ŋkeke enyi kloe le nya siawo megbe la, ekplɔ Petro kple Yohanes kpakple Yakobo ɖe asi, eye wòlia to la, be yeado gbe ɖa. 29  Eye esi wònɔ gbe dom ɖa la, eƒe mo ƒe dzedzeme trɔ, eye eƒe awu fu tititi henɔ dzo dam. 30  Eye kpɔ ɖa! Ŋutsu eve nɔ dze ɖom kplii, siwo nye Mose kple Eliya. 31  Ame siawo dze le ŋutikɔkɔe me, eye wote nuƒoƒo le eƒe dzodzo si ava eme le Yerusalem la ŋu. 32  Ke alɔ̃ bla ŋku na Petro kple ame siwo kpe ɖe eŋu la ŋutɔ; gake esi wonyɔ keŋkeŋ la, wokpɔ eƒe ŋutikɔkɔe kple ame eveawo wonɔ tsitre ɖe egbɔ. 33  Eye esi ame siawo nɔ dzodzom le egbɔ la, Petro gblɔ na Yesu be: “Nufiala, enyo na mí be míanɔ afi sia, eya ta na míatu agbadɔ etɔ̃, ɖeka na wò, ɖeka na Mose, eye ɖeka na Eliya,” evɔ eya ŋutɔ menya nya si gblɔm wònɔ o. 34  Gake esi wònɔ nya siawo gblɔm la, alilikpo aɖe te vɔvɔlidodo ɖe wo dzi. Esi woɖo alilikpoa me la, vɔvɔ̃ ɖo wo. 35  Eye gbe aɖe ɖi tso alilikpoa me gblɔ be: “Ame siae nye Vinye, si metia. Miɖo toe.” 36  Eye esi gbea ɖi la, Yesu ɖeka koe wokpɔ. Gake womia nu ɖe nya la dzi, eye womeka nu siwo wokpɔ la dometɔ aɖeke ta na ame aɖeke le ŋkeke mawo me o. 37  Esi ŋu ke, eye woɖi tso toa dzi la, ameha gã aɖe va kpee. 38  Eye kpɔ ɖa! Ŋutsu aɖe tso ameha la dome do ɣli be: “Nufiala, meɖe kuku na wò, va kpɔ vinyeŋutsuvi nam ɖa, elabena viɖekɛ wònye nam, 39  eye kpɔ ɖa! Gbɔgbɔ aɖe dzea edzi, eye kasia edoa ɣli, eye wònana wòƒona tititi, eye futukpɔ dona le enu, eye ne ewɔ nuvevii vɔ hã la, bebli hafi wòdzona le edzi. 40  Eye meɖe kuku na wò nusrɔ̃lawo be woanyae ado goe, gake womete ŋui o.” 41  Eye Yesu ɖo eŋu gblɔ be: “Oo, dzidzime maxɔse totro kpaɖikpaɖi, ɣeyiɣi didi kae wòle be mado dzi anɔ mia gbɔ ase ɖo? Kplɔ viwòa va afii.” 42  Gake esi ɖevia nɔ egogom la, gbɔgbɔ vɔ̃ la xlãe ɖe anyi hena wòƒo tititi vevie. Gake Yesu ka mo na gbɔgbɔ makɔmakɔ la, eye wòda gbe le ŋutsuvi la ŋu, eye wòtsɔe na fofoa. 43  Ke wo katã wolulu le Mawu ƒe ŋusẽ gã la ŋuti. Ke esi nu siwo katã wɔm wònɔ la na wo katã ƒe mo wɔ yaa la, egblɔ na eƒe nusrɔ̃lawo be: 44  “Mina nya siawo natsi miaƒe towo me, elabena ele be woade Amegbetɔvi la asi na amewo.” 45  Gake womenɔ nya sia gɔme sem o. Le nyateƒe me la, woɣlae ɖe wo be woagase egɔme o, eye wonɔ vɔvɔ̃m be yewoabia nyae tso nya sia ŋu. 46  Ke nyaʋiʋli aɖe ɖo wo dome le wo dometɔ si anye gãtɔ wu la ŋuti. 47  Esi Yesu nya woƒe dzimesusuwo ta la, ekplɔ ɖevi sue aɖe vae, na wòtɔ ɖe egbɔ, 48  eye wògblɔ na wo be: “Ame sia ame si xɔa ɖevi sue sia le nye ŋkɔ ta la, exɔa nye hã, eye ame sia ame si xɔam la, exɔa ame si dɔm ɖa la hã. Elabena ame si wɔa eɖokui ame sue le mi katã dome lae nye gã.” 49  Eye Yohanes gblɔ be: “Nufiala, míekpɔ ŋutsu aɖe wònɔ gbɔgbɔ vɔ̃wo nyam nɔ go dom le wò ŋkɔ me, eye míedze agbagba be míaxe mɔ nɛ, elabena mele yowòme kpe ɖe mía ŋu o.” 50  Gake Yesu gblɔ nɛ be: “Migate kpɔ be yewoaxe mɔ nɛ o, elabena ame si metsia tsitre ɖe mia ŋu o la, mia dzie wòle.” 51  Ke esi ŋkekeawo nɔ dedem nɛ be woakɔe ayi dziƒo la, eƒe mo trɔ ɖe Yerusalem yiyi ŋu vevie. 52  Eya ta edɔ dɔlawo ɖe eŋgɔ. Eye wodze mɔ va ɖo Samariatɔwo ƒe du aɖe me, be woadzra ɖo na eƒe vava; 53  gake womexɔe o, elabena Yerusalem yiyi ŋue eƒe mo trɔ ɖo. 54  Esi nusrɔ̃la Yakobo kple Yohanes kpɔ esia la, wogblɔ be: “Aƒetɔ, èlɔ̃ bena, míagblɔ na dzo be wòage tso dziƒo ava tsrɔ̃ woa?” 55  Gake etrɔ, eye wòka mo na wo. 56  Eya ta wodzo yi du bubu me. 57  Ke esi wonɔ mɔa dzi yina la, ame aɖe gblɔ nɛ be: “Madze yowòme ayi afi sia afi si nàyi.” 58  Eye Yesu gblɔ nɛ be: “Do le abeiwo si, eye atɔ le dziƒoxewo si, gake teƒe aɖeke mele Amegbetɔvi la ya si wòatsɔ ta aziɔ ɖo o.” 59  Eye wògblɔ na ame bubu be: “Dze yonyeme.” Amea gblɔ be: “Ðe mɔ nam be mayi aɖaɖi fofonye gbã.” 60  Gake egblɔ nɛ be: “Na ame kukuwo naɖi woƒe ame kukuwo, ke wò la, yi nàɖe gbeƒã Mawu fiaɖuƒe la.” 61  Eye ame bubu hã gblɔ be: “Aƒetɔ, madze yowòme; gake gbã la, na maklã nye aƒemetɔwo.” 62  Yesu gblɔ nɛ be: “Ame si tsɔ eƒe asi da ɖe kodzi dzi, gake wògale nu siwo le megbe kpɔm la, medze na Mawu fiaɖuƒe la o.”

Etenuŋɔŋlɔ