Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Luka 8:1-56

8  Le esia megbe kpuie la, eyi tso du me yi du me kple kɔƒe yi kɔƒe nɔ gbeƒã ɖem henɔ Mawu fiaɖuƒea ŋuti nya nyui la gblɔm. Eye ame wuieveawo nɔ eŋu,  kple nyɔnu aɖewo siwo me wònya gbɔgbɔ vɔ̃wo do goe le heda dɔ na: Maria si woyɔna be Magdalatɔ, ame si me gbɔgbɔ vɔ̃ adre do go le,  kple Yohana, si nye Kuza, Herodes ƒe nuwo dzi kpɔla la, srɔ̃, kple Susana kpakple nyɔnu bubu geɖewo, siwo tsɔ woƒe nunɔamesiwo nɔ wo subɔm.  Ke esi ameha gã aɖe va ƒo ƒu kple ame siwo tso du sia du me va egbɔ la, eƒo nu na wo to kpɔɖeŋu aɖe dzi be:  “Nukuwula aɖe do go yi eƒe nuku wu ge. Eye esi wònɔ nukua wum la, eƒe ɖe ge ɖe mɔ to, eye woɖo afɔ edzi, eye dziƒoxewo va fɔe mi.  Bubu hã ge ɖe kpenyigba dzi, eye esi wòmie vɔ la, eyrɔ, elabena mekpɔ tsi o.  Bubu hã ge ɖe ŋuwo me, eye ŋu siwo mie hetsi kplii la vu tsyɔ edzi.  Bubu hã ge ɖe anyigba nyui dzi, eye esi wòmie vɔ la, etse teƒe alafa ɖeka.” Esi wònɔ nya siawo gblɔm la, edo ɣli gblɔ be: “Ame si to li na be wòasee la, nesee.”  Gake eƒe nusrɔ̃lawo te nyabiabiae tso nu si kpɔɖeŋu sia ate ŋu afia ŋu. 10  Egblɔ be: “Miawo la, wona mi be miase Mawu fiaɖuƒe la ƒe nya ɣaɣla kɔkɔeawo gɔme, gake le ame susɔewo gome la, kpɔɖeŋuwo koe wonye na wo, ale be, togbɔ be wole nu kpɔm hã la, woakpɔ nu dzodzro, eye togbɔ be wole nu sem hã la, womase egɔme o. 11  Azɔ nu si kpɔɖeŋu la fia ye nye esi: Nuku lae nye Mawu ƒe nya la. 12  Esiwo le mɔ to la, woawoe nye ame siwo see, gake Abosam vana, eye wòɖea nya la dzonɛ le woƒe dziwo me, bene woagaxɔe ase, ne woakpɔ ɖeɖe o. 13  Esiwo ge ɖe kpenyigba dzi la, woawoe nye ame siwo, ne wose nyaa la, woxɔnɛ kple dzidzɔ, gake ke meli na wo o; woxɔna sena hena ɣeyiɣi aɖe ko, ke le dodokpɔ ƒe ɣeyiɣi me la, wodea megbe. 14  Ke esiwo ge ɖe ŋuwo me la, esiawoe nye ame siwo see, gake esi agbe sia me dzimaɖitsitsiwo kple kesinɔnuwo kpakple dzidzɔdonamenuwo he wo dzoe ta la, wovu tsyɔ wo dzi keŋkeŋ, eye wometsena ɖina o. 15  Ke esiwo ge ɖe anyigba nyui dzi la, woawoe nye ame siwo sea nya la kple dzi nyui, si nyo, eye woléa eme ɖe asi, eye wotsea ku le dzidodo me. 16  “Ame aɖeke mesia akaɖi tsɔa nu tsyɔa edzi alo tsɔnɛ dana ɖe abati te o, ke boŋ etsɔnɛ dana ɖe akaɖiti dzi, be ame siwo vaa eme la nakpɔ kekeli la. 17  Elabena womeɣlaa naneke, si womava ɖe ɖe go o, eye wometsyɔa nu naneke dzi nyuie, si mava dze gaglãa woakpɔ o. 18  Eya ta milé ŋku ɖe ale si mieɖoa toe ŋu nyuie; elabena ame si si nu le la, woatsɔ geɖe akpee nɛ, gake ame si si nu mele o la, woaxɔ nu si wòsusu be ele ye si la kura gɔ̃ hã le esi.” 19  Ke dadaa kple nɔviawo va egbɔ, gake womete ŋu kpɔ eŋuti o le ameha la ta. 20  Ke wogblɔ nɛ be: “Dawò kple nɔviwòwo le tsitre ɖe xexe le didim be yewoakpɔ wò.” 21  Eɖo eŋu na wo gblɔ be: “Danye kple nɔvinyewoe nye ame siawo, siwo sea Mawu ƒe nya la, eye wowɔa edzi.” 22  Le ŋkeke mawo dometɔ ɖeka dzi la, woa kple eƒe nusrɔ̃lawo ge ɖe tɔdziʋu aɖe me, eye wògblɔ na wo be: “Mina míayi ta la ƒe go kemɛ dzi.” Ale wodze mɔ. 23  Ke esi wonɔ tɔa dzi yina la, edɔ alɔ̃. Azɔ ya sesẽ aɖe te ƒoƒo le ta la dzi, eye tsi de asi tɔdziʋu la yɔyɔ me, eye woɖo afɔku me. 24  Mlɔeba woyi egbɔ henyɔe gblɔ bena: “Nufiala, Nufiala, míetsrɔ̃ vɔ!” Etso, eye wòblu ɖe ya la kple tsi dzeagbo la ta, eye wodze akɔ anyi, eye ɖoɖoe zi. 25  Azɔ egblɔ na wo be: “Afi kae miaƒe xɔse le?” Gake wovɔ̃ ale gbegbe, eye woƒe nu ku, eye wogblɔ na wo nɔewo be: “Ame ka gɔ̃e nye esia, elabena eɖea gbe na yawo kple tsi kura gɔ̃ hã, eye woɖoa toe?” 26  Emegbe wova ɖi go ɖe Gerasatɔwo ƒe anyigba, si dze ŋgɔ Galilea la dzi. 27  Ke esi wòdo go le tɔdziʋua me la, ŋutsu aɖe si me gbɔgbɔ vɔ̃wo le la tso dua me va do goe. Ɣeyiɣi didi aɖee nye ema si megado awu kpɔ o, eye menɔa aƒe me o, ke boŋ yɔdowo dome. 28  Esi wòkpɔ Yesu la, edo ɣli sesĩe hebɔbɔ ɖe eŋkume, eye wògblɔ kple gbe sesẽ be: “Nya kae le mía kpli wò dome, Yesu, Dziƒoʋĩtɔ la ƒe Vi? Meɖe kuku na wò, mègawɔ funyafunyam o.” 29  (Elabena enɔ se dem na gbɔgbɔ makɔmakɔ la be wòado go le amea me. Elabena ɣeyiɣi didi aɖee nye ema wòkpɔ ŋusẽ ɖe edzi, eye enuenu wodea kɔsɔkɔsɔ kple kunyowui hedzɔa eŋu, gake etsoa kɔsɔkɔsɔawo heŋea kunyowuawo, eye gbɔgbɔ vɔ̃ la nyanɛ ɖona ɖe teƒe siwo ame aɖeke mele o.) 30  Yesu biae be: “Ŋkɔwò ɖe?” Egblɔ be: “Aʋakɔ,” elabena gbɔgbɔ vɔ̃ geɖewo ge ɖe eme. 31  Eye wonɔ kukuɖeɖe dzi nɛ vevie be wòaganya yewo aɖo ɖe aʋli la me o. 32  Ke hawo ƒe ha gã aɖe nɔ nu ɖum le afi ma le toa dzi; eya ta woɖe kuku nɛ vevie be wòaɖe mɔ na yewo yewoayi ɖe wo me. Eye wòɖe mɔ na wo. 33  Ale gbɔgbɔ vɔ̃awo do go le amea me, eye woyi ɖe haawo me, eye lãha la si du sesĩe to to la kɔgo ge ɖe ta la me doo, eye wono tsi ku. 34  Gake esi wo kplɔlawo kpɔ nu si dzɔ la, wosi, eye wova ka eta le dua me kple agbletawo. 35  Eya ta amewo do go be yewoakpɔ nu si dzɔ, eye wova Yesu gbɔ, eye wokpɔ ŋutsu si me gbɔgbɔ vɔ̃awo do go le la wòdo awu henɔ anyi ɖe Yesu ƒe afɔ nu, eye eƒe mo kɔ nyuie; eye vɔvɔ̃ ɖo wo. 36  Ame siwo kpɔ eteƒe la gblɔ ale si wòyɔ dɔ ŋutsu si me gbɔgbɔ vɔ̃ nɔ la ŋuti nya na wo. 37  Eya ta Gerasa nuto me tɔ gbogboawo gblɔ nɛ be wòadzo le yewoƒe nutoawo me, elabena vɔvɔ̃ lé wo ale gbegbe. Eye wòɖo tɔdziʋu la hetrɔ dzo. 38  Ke ŋutsu si me gbɔgbɔ vɔ̃wo do go le la nɔ kukuɖeɖe dzi nɛ be yeakplɔe ɖo, gake edo mɔe gblɔ be: 39  “Trɔ nàyi aƒe me, eye nànɔ nu siwo katã Mawu wɔ na wò la gblɔm na amewo.” Ale wòdzo henɔ gbeƒã ɖem tso nu siwo Yesu wɔ nɛ la ŋu le du blibo la katã me. 40  Esi Yesu trɔ gbɔ la, ameha la xɔe nyuie, elabena wo katã wonɔ mɔ kpɔm nɛ. 41  Ke kpɔ ɖa! Ŋutsu aɖe si ŋkɔe nye Yairo va, eye ame sia nye ƒuƒoƒea dzi kpɔlawo dometɔ ɖeka. Eye wòbɔbɔ ɖe Yesu ƒe afɔ nu hete kukuɖeɖe nɛ vevie be wòava yeƒe aƒe me, 42  elabena vinyɔnuvi ɖekɛ le esi, si xɔ abe ƒe wuieve ene, eye wòɖo kudo nu. Esi wònɔ yiyim la, amehaawo mimii ɖo le goawo katã me. 43  Eye nyɔnu aɖe si nɔ ʋusisidɔ lém ƒe wuieve sɔŋ, gake mekpɔ ame aɖeke wòdae nɛ o la, 44  zɔ tso emegbe va ka asi eƒe awutoga ŋu, eye enumake ʋu si nɔ dodom le eŋu la tso. 45  Eye Yesu gblɔ be: “Ame kae ka asi ŋunye?” Esi ame aɖeke melɔ̃ be yee o la, Petro gblɔ be: “Nufiala, ameha la ƒo xlã wò hele mimiwòm ɖoe.” 46  Gake Yesu gblɔ be: “Ame aɖe ka asi ŋunye, elabena mede dzesii be ŋusẽ do le menye.” 47  Esi nyɔnu la kpɔe be wonya nu si yewɔ la, enɔ dzodzom nyanyanya va bɔbɔ ɖe ekɔme hegblɔ nu si ta wòka asi eŋu kple ale si dɔa vɔ nɛ enumake la le ameawo katã ŋkume. 48  Ke egblɔ na nyɔnu la be: “Vinyenyɔnu, wò xɔse na nèhaya; dzo yi le ŋutifafa me.” 49  Esi wògale nuƒoƒo dzi la, ƒuƒoƒea dzi kpɔla ƒe ame dɔdɔ va gblɔ be: “Viwònyɔnuvi la ku; mègaxa ɖe fu na nufiala la azɔ o.” 50  Esi Yesu se nya sia la, eɖo eŋu nɛ be: “Mègavɔ̃ o, wò ya xɔ se ko, eye akpɔ ɖeɖe.” 51  Esi wòɖo aƒea me la, meɖe mɔ na ame aɖeke be wòage ɖe xɔa me kpli ye o, negbe Petro, Yohanes, Yakobo, kpakple nyɔnuvi la fofo kple dada ko. 52  Ke ameawo katã nɔ avi fam henɔ akɔta ƒom kple nuxaxa le ɖevi la ta. Eya ta egblɔ be: “Midzudzɔ avia, elabena meku o, ke boŋ alɔ̃ dɔm wòle.” 53  Tete wote ekoko fewuɖuɖutɔe, elabena wonya be eku. 54  Gake elé eƒe alɔnu, eye wòyɔe gblɔ be: “Nyɔnuvi, tsi tsitre!” 55  Eye eƒe gbɔgbɔ la gbugbɔ va, eye enumake wòtsi tsitre, eye wòbe woadi nane nɛ wòaɖu. 56  Nyateƒee, gbɔgblɔ bu ɖe edzilawo; gake ede se na wo be woagagblɔ nu si dzɔ la na ame aɖeke o.

Etenuŋɔŋlɔ