Luka 7:1-50

7  Esi wòwu eƒe nyawo katã nu le ameawo ƒe to me vɔ la, eyi Kapernaum.  Ke asrafomegã aɖe ƒe kluvi, si nye ame vevi nɛ la, nɔ dɔ lém ɖo kudo nu.  Esi wòse Yesu ŋkɔ la, edɔ Yudatɔwo ƒe amegãwo ɖe egbɔ, be woaɖe kuku nɛ be wòava da dɔ na yeƒe kluvia.  Eye ame siwo va Yesu gbɔ la te kukuɖeɖe nɛ vevie be: “Edze be nàwɔ nu sia nɛ,  elabena elɔ̃ míaƒe dukɔ la, eye eya ŋutɔe tu míaƒe ƒuƒoƒea na mí.”  Eya ta woawo kpakple Yesu wodze mɔ. Gake esi eya kple aƒe la dome megadidi o la, asrafomegã la dɔ exɔlɔ̃wo ɖa xoxo be woagblɔ nɛ be: “Aƒetɔ, mègaɖe fu na ɖokuiwò o, elabena nyemedze ana nàva nye xɔ te o.  Esia tae nyemebu ɖokuinye be medze ava gbɔwò o. Ke boŋ ɖe gbe, eye nàna nye dɔla la nahaya.  Elabena nye hã ame aɖe ƒe ŋusẽ tee mele, eye asrafowo le nye hã tenye, eye megblɔna na ame sia be: ‘Heyi!’ eye wòyina, eye na ame bubu be: ‘Va!’ eye wòvana, eye na nye kluvi be: ‘Wɔ esia!’ eye wòwɔnɛ.”  Esi Yesu se nya siawo la, eƒe mo wɔ yaa le eŋuti, eye wòtrɔ ɖe ameha si kplɔe ɖo la ŋu gblɔ be: “Mele egblɔm na mi be: Nyemekpɔ xɔse gã sia tɔgbi le Israel kura gɔ̃ hã o.” 10  Eye esi ame siwo wodɔ la trɔ yi aƒea me la, wokpɔe be kluvi la ƒe lãme sẽ. 11  Le esia megbe kpuie la, eyi du aɖe si woyɔna be Nain me, eye eƒe nusrɔ̃lawo kple ameha gã aɖe nɔ mɔa zɔm kplii. 12  Esi wògogo dua ƒe agbo nu la, kpɔ ɖa! Wokɔ ame kuku aɖe si nye dadaa ƒe tenuvi la va yina. Ahosi hãe dadaa nye. Ameha gã aɖe hã tso dua me kplɔ nyɔnua ɖo. 13  Eye esi Aƒetɔ la ƒe ŋku kli nyɔnua la, eƒe nu wɔ nublanui nɛ, eye wògblɔ nɛ be: “Dzudzɔ avia.” 14  Tete wòte ɖe amekukutsɔnu la ŋu heka asi eŋu, eye etsɔlawo tɔ, eye wògblɔ be: “Ðekakpui, mele egblɔm na wò be: Fɔ!” 15  Eye ame kuku la fɔ bɔbɔ nɔ anyi hete nuƒoƒo, eye wòtsɔe na dadaa. 16  Ke vɔvɔ̃ lé wo katã, eye wode asi Mawu dodo ɖe dzi me gblɔ be: “Wona nyagblɔɖila gã aɖe do le mía dome,” eye “Mawu trɔ susu ɖe eƒe dukɔ la ŋu.” 17  Eye eŋuti nya sia kaka ɖe Yudea blibo la katã kple nuto ma katã me. 18  Ke Yohanes ƒe nusrɔ̃lawo ka nu siawo katã ta nɛ. 19  Eya ta Yohanes yɔ eƒe nusrɔ̃lawo dometɔ eve hedɔ wo ɖe Aƒetɔ la gbɔ be woabiae be: “Wòe nye Ame Si Gbɔna laa, alo ɖe wòle be míakpɔ mɔ na ame bubua?” 20  Esi ŋutsuawo va egbɔ la, wogblɔ be: “Yohanes Amenyrɔɖetsimela dɔ mí ɖe gbɔwò be míabia be, ‘Wòe nye Ame Si Gbɔna laa, alo ɖe wòle be míakpɔ mɔ na ame bubua?’” 21  Le gaƒoƒo ma dzi la, eda dɔ geɖewo, eda dɔléle vɔ̃ɖiwo, nya gbɔgbɔ vɔ̃wo do goe, eye wòve ŋkuagbãtɔ geɖewo nu wokpɔ nu. 22  Eya ta eɖo eŋu na ame eveawo be: “Miheyi ɖagblɔ nu siwo miekpɔ kple nu siwo miese la na Yohanes: ŋkuagbãtɔwo le nu kpɔm, atatututɔwo le zɔzɔm, kpodɔlélawo ŋuti le kɔkɔm, eye tokunɔwo le nu sem, wole ame kukuwo fɔm ɖe tsitre, wole nya nyui la gblɔm na ame dahewo. 23  Eye dzidzɔtɔe nye ame si nyemezu nukikli na o.” 24  Esi Yohanes ƒe ame dɔdɔawo dzo la, ete gbɔgblɔ na amehaawo tso Yohanes ŋu be: “Nu kae miedo go yi gbedadaƒo be yewoakpɔ? Aƒla si le ya ƒom ye loo? 25  Ekema nu kae miedo go yi be yewoakpɔ? Ame si do awudziwui bɔbɔewo yea? Mienyae ɖe, ame siwo le awu xɔasiwo me heɖua agbe la le fiasãwo mee. 26  Ekema nu ka tututue miedo go be yewoakpɔ? Nyagblɔɖilaa? Ɛ̃, mele egblɔm na mi be ewu nyagblɔɖila kura gɔ̃ hã. 27  Eya ŋue woŋlɔ ɖi le be: ‘Kpɔ ɖa! mele nye dɔla dɔm ɖe ŋgɔwò, ame si adzra wò mɔ dzi ɖo le ŋgɔwò.’ 28  Mele egblɔm na mi be: Le ame siwo nyɔnuwo dzi dome la, ɖeke menye gã wu Yohanes o; gake ame si le sue le Mawu fiaɖuƒea me la nye gã wui.” 29  (Eye esi ameawo katã kple nudzɔlawo se esia la, wolɔ̃ ɖe edzi be Mawu le dzɔdzɔe, elabena wona Yohanes nyrɔ wo. 30  Gake Farisitɔwo kple ame siwo bi ɖe Sea me ya mebu aɖaŋu si Mawu ɖo na wo la ɖe naneke me o, elabena menyrɔ woawo ya o.) 31  “Ekema ame kae matsɔ dzidzime sia me tɔwo asɔ kplii, eye ame kae woɖi? 32  Wole abe ɖevi sue siwo bɔbɔ nɔ anyi ɖe asi me ene, siwo nɔ wo nɔewo yɔm kple ɣli nɔ gbɔgblɔm be: ‘Mieku dze na mi, gake mieɖu ɣe o; míedzi konyifaha, gake miefa avi o.’ 33  Nenema kee Yohanes Amenyrɔɖetsimela va; meɖua abolo alo noa wain o, gake miegblɔna be, ‘Gbɔgbɔ vɔ̃ le eme.’ 34  Amegbetɔvi la va; eɖua nu henoa nu, gake miegblɔna be: ‘Kpɔ ɖa! Nu tsu ɖula kple wain tsu nola, nudzɔlawo kple nu vɔ̃ wɔlawo xɔlɔ̃!’ 35  Ke hã, nunya ƒe viwo katã mee eƒe dzɔdzɔenyenye dzena le.” 36  Ke Farisitɔ aɖe nɔ ebiabia dzi be wòava ɖu nu kpli ye. Eya ta eyi Farisitɔa ƒe aƒe me, eye wòbɔbɔ nɔ kplɔ̃ ŋu. 37  Eye kpɔ ɖa! Nyɔnu aɖe si wonya le dua me be enye nu vɔ̃ wɔla la se be enɔ kplɔ̃ ŋu le Farisitɔa ƒe aƒe me nɔ nu ɖum, eye wòtsɔ alabastrogoe, si me ami ʋeʋĩ aɖe le la vae, 38  eye esi wòva di teƒe ɖe emegbe le eƒe afɔ nu la, efa avi, eye wòte aɖatsifafa ɖe eƒe afɔwo dzi, eye wòtsɔ eƒe taɖa tutu afɔawo ŋui. Egbugbɔ eƒe afɔwo hã, eye wòtsɔ ami ʋeʋĩ la si na wo. 39  Esi Farisitɔ si kpee la kpɔ nu sia la, egblɔ le eɖokui me be: “Ne nyagblɔɖilae ame sia nye la, anya ame si kple ame si ƒomevi nyɔnu sia si le asi kam eŋu la nye, be nu vɔ̃ wɔlae wònye.” 40  Gake Yesu ɖo eŋu nɛ be: “Simon, nya aɖe le asinye magblɔ na wò.” Egblɔ be: “Nufiala, gblɔe!” 41  “Ame eve nyi fe le gadola aɖe ŋu; ame ɖeka nyi denario alafa atɔ̃ ƒe fe, gake evelia ya nyi blaatɔ̃ ƒe fe. 42  Esi naneke menɔ wo si be woatsɔ axe fea o ta la, etsɔe ke wo ame evea siaa faa. Ekema wo dometɔ kae alɔ̃e wu?” 43  Simon ɖo eŋu be: “Mesusu be ame si wòtsɔ geɖe ke faa lae.” Egblɔ nɛ be: “Èbui nyuie.” 44  Ale wòtrɔ ɖe nyɔnu la ŋu hegblɔ na Simon be: “Èle nyɔnu sia kpɔma? Meva aƒewò me; mèna tsim be maklɔ afɔe o. Ke nyɔnu sia fa aɖatsi ɖe nye afɔwo dzi, eye wòtsɔ eƒe taɖa tutu wo ŋu. 45  Mègbugbɔ nu nam o; gake tso gaƒoƒo si dzi meva la, nyɔnu sia medzudzɔ nye afɔwo gbugbɔgbugbɔ o. 46  Mèsi ami ɖe ta nam o; gake nyɔnu sia tsɔ ami ʋeʋĩ si ɖe nye afɔwo. 47  Le esia ta la, mele egblɔm na wò be, togbɔ be eƒe nu vɔ̃wo sɔ gbɔ ŋutɔ hã la, wotsɔ wo kee, elabena eɖe lɔlɔ̃ geɖe fia; gake ame si wotsɔ nu vɔ̃ ʋɛ aɖe ko ke la, eɖea lɔlɔ̃ ʋɛ aɖe ko fiana.” 48  Azɔ egblɔ na nyɔnua be: “Wotsɔ wò nu vɔ̃wo ke wò.” 49  Eye ame siwo le kplɔ̃a ŋu kplii la te gbɔgblɔ le wo ɖokuiwo me be: “Ame kae nye ame sia si tsɔa nu vɔ̃wo gɔ̃ hã kena?” 50  Gake egblɔ na nyɔnu la be: “Wò xɔse la ɖe wò, dzo yi le ŋutifafa me.”

Etenuŋɔŋlɔ