Luka 6:1-49

6  Ke eva eme be le sabat aɖe dzi la, enɔ zɔzɔm to nukugblewo me, eye eƒe nusrɔ̃lawo nɔ nukuawo ŋem, tsɔ asi nɔ wo tugum henɔ ɖuɖum.  Eya ta Farisitɔwo dometɔ aɖewo gblɔ be: “Nu ka tae miele nu si mele se nu o wɔm le sabat dzi?”  Ke Yesu ɖo eŋu na wo gblɔ be: “Ðe miexlẽ nu si David wɔ, esime dɔ nɔ eya kple eŋutimewo wum, la kpɔ oa?  Ale si wòge ɖe Mawu ƒe aƒe la me, xɔ abolo siwo wotsɔ ɖoa Mawu ŋkume la heɖu, eye wòna ɖe eŋutimewo hã, evɔ se meɖe mɔ le wo ŋu na ame aɖeke be wòaɖui o, negbe nunɔlawo ko, la oa?”  Eye wòyi edzi gblɔ na wo be: “Sabat ƒe Aƒetɔe Amegbetɔvi la nye.”  Le sabat bubu dzi la, eyi ƒuƒoƒe la, eye wòte nufiafia. Eye ŋutsu aɖe nɔ afi ma si titi lé nuɖusi na.  Eya ta agbalẽfialawo kple Farisitɔwo nɔ ŋku lém ɖe eŋu tututu be yewoakpɔe ɖa be ada dɔ le sabat dzi hã, ne woato mɔ aɖe dzi atso enu.  Togbɔ be enya nu si ŋu bum wonɔ hã la, egblɔ na ŋutsu si titi lé asi na la be: “Tso nàva tɔ ɖe titina.” Eye wòtso yi.  Azɔ Yesu gblɔ na wo be: “Mabia mi lo: Ðe se ɖe mɔ be woawɔ nu nyui alo awɔ nu vɔ̃ɖi le sabat dzi, be woaɖe luʋɔ aɖe loo alo atsrɔ̃ea?” 10  Eye esi wòtsa ŋku le wo dzi godoo vɔ la, egblɔ na ŋutsu la be: “Mlo asi.” Emloe, eye eƒe asi la ɖɔ ɖo. 11  Ke woawo ya wodo dziku helĩhelĩ, eye wote adaŋudede kple wo nɔewo le nu si woate ŋu awɔ Yesu la ŋuti. 12  Le ŋkeke mawo me la, eyi to la dzi be yeado gbe ɖa, eye wòdo gbe ɖa na Mawu zã blibo la katã. 13  Ke esi ŋu ke la, eyɔ eƒe nusrɔ̃lawo va eɖokui gbɔ, eye wòtia ame wuieve le wo dome, siwo wògana ŋkɔe be “apostolowo”: 14  Simon si wògana ŋkɔe be Petro, kple nɔvia Andrea, Yakobo kple Yohanes, Filipo kple Bartolomeo, 15  Mateo kple Toma kpakple Yakobo, Alfeo vi, kple Simon si woyɔna be “veviedonula la,” 16  Yuda, Yakobo vi, kple Yuda Iskariot, ame si va zu yomemɔfiala. 17  Eye wòɖi kpli wo, eye wòbɔbɔ nɔ anyi ɖe sɔsɔeƒe aɖe, eye eƒe nusrɔ̃lawo ƒe ha gã aɖe, kple ameha gã aɖe si tso Yudea katã kple Yerusalem kpakple ƒutanuto siwo nye Tiro kple Zidon me, siwo va be yewoaɖo toe, eye be wòada yewoƒe dɔlélewo na yewo la, nɔ eŋu. 18  Eda dɔ na ame siwo gbɔgbɔ makɔmakɔwo nɔ fu ɖem na la kura gɔ̃ hã. 19  Eye ameha blibo la nɔ didim be yewoaka asi eŋu, elabena ŋusẽ nɔ go dom le eme nɔ dɔ dam na wo katã. 20  Eye wòfɔ kɔ dzi kpɔ eƒe nusrɔ̃lawo, eye wòde asi gbɔgblɔ me be: “Dzidzɔtɔwoe nye mi ame dahewo, elabena mia tɔe Mawu fiaɖuƒe la nye. 21  “Dzidzɔtɔwoe nye mi ame siwo dɔ le wuwum fifia, elabena miava ɖi ƒo. “Dzidzɔtɔwoe nye mi ame siwo le avi fam fifia, elabena miava ko nu. 22  “Dzidzɔtɔwoe mianye ne amewo lé fu mi, eye woɖe mi le ha me, eye wodo vlo mi heƒo ɖi miaƒe ŋkɔ be mienye ame vɔ̃ɖiwo, le Amegbetɔvi la ta. 23  Dzi nadzɔ mi gbe ma gbe, eye miati kpo, elabena kpɔ ɖa! Miaƒe fetu lolo le dziƒo, elabena nu mawo kee wo tɔgbuiwo wɔ ɖe nyagblɔɖilawo ŋu. 24  “Gake baba na mi kesinɔtɔwo, elabena miele miaƒe akɔfafa katã kpɔm xoxo. 25  “Baba na mi ame siwo ɖi ƒo fifia, elabena dɔ ava wu mi. “Baba na mi ame siwo le nu kom fifia, elabena miava fa konyi ahafa avi. 26  “Baba na mi, ne amewo katã ƒoa nu nyui le mia ŋu, elabena nu siawo tɔgbi ye wo tɔgbuiwo wɔ na aʋatsonyagblɔɖilawo. 27  “Gake mele egblɔm na mi ame siwo le to ɖom la be: Miyi edzi mialɔ̃ miaƒe futɔwo, miawɔ nyui na ame siwo le fu lém mi, 28  miayra ame siwo ƒoa fi dea mi, miado gbe ɖa ɖe ame siwo le mia dzum la ta. 29  Ame si ƒo to ɖeka me na wò la, trɔ evelia hã nɛ; eye ame si xɔ wò awudziwui la, mègagbe etetɔa hã tsɔtsɔ anae o. 30  Na nu ame sia ame si le nu biam wò, eye ame si tsɔ wò nuwo dzoe la, mègabia be wòatrɔ wo avae na ye o. 31  “Eye ale si ko miedina be amewo nawɔ na mi la, miwɔ nenema ke na wo. 32  “Eye ne ame siwo lɔ̃a mi lae mielɔ̃na ɖe, kafukafu kae wònye na mi? Elabena nu vɔ̃ wɔlawo kura gɔ̃ hã lɔ̃a ame siwo lɔ̃a wo. 33  Eye ne ame siwo wɔa nyui na mi lae miewɔa nyui na ɖe, kafukafu ka kurae wònye na mi? Nu vɔ̃ wɔlawo kura gɔ̃ hã wɔna nenema. 34  Eye ne miedoa nu dememaxɔmaxɔe na ame siwo miekpɔa mɔ be woaxee na mi la, kafukafu kae wònye na mi? Nu vɔ̃ wɔlawo kura gɔ̃ hã doa nu na nu vɔ̃ wɔlawo dememaxɔmaxɔe, ale be woaxɔ nenema ke emegbe. 35  Ke boŋ miyi edzi mialɔ̃ miaƒe futɔwo, eye miawɔ nyui, eye miado nu na ame dememaxɔmaxɔe, esi mianɔ mɔ kpɔm be yewoagbugbɔ axɔ naneke o; ekema miaƒe fetu alolo, eye mianye Dziƒoʋĩtɔ la ƒe viwo, elabena enyoa dɔme na ame madakpewo kple ame vɔ̃ɖiwo. 36  Miyi edzi mianɔ nublanui kpɔm, abe ale si ko mia Fofo kpɔa nublanui ene. 37  “Gawu la, midzudzɔ ʋɔnudɔdrɔ̃, ekema womadrɔ̃ ʋɔnu mi akpɔ o; midzudzɔ fɔbubu amewo, ekema womabu fɔ mi akpɔ o. Minɔ asi ɖem le amewo ƒe nyawo ŋu, eye woaɖe asi le miawo hã mia tɔwo ŋu. 38  Minɔ nu nam amewo, eye amewo ana nu mi. Woadzidze nu nyuie, atee, aʋuʋui wòagbagba, akɔ ɖe avɔ me na mi. Elabena dzidzenu si mietsɔ le nu dzidzem na amewo la kee woatsɔ adzidzee na miawo hã.” 39  Azɔ ewɔ kpɔɖeŋu aɖe hã na wo be: “Ŋkuagbãtɔ mate ŋu afia mɔ ŋkuagbãtɔ o ɖe, alo ate ŋuia? Woa kple evea siaa woadze do me, menye nenemae oa? 40  Nusrɔ̃vi mewua eƒe nufiala o, gake ame sia ame si wofia nui nyuie la anɔ abe eƒe nufiala ene. 41  Ke nu ka tae nèkpɔa ati fefee si le nɔviwò ƒe ŋku dzi, gake mèkpɔa atikpo si le wò ŋutɔ wò ŋku dzi ya o? 42  Aleke wɔ nàgblɔ na nɔviwò be, ‘Nɔvinye, na maɖe ati fefee si le wò ŋku dzi,’ evɔ wò ŋutɔ mèle atikpo si le wò ŋku ma ke dzi la kpɔm o? Alakpanuwɔla! Ðe atikpo la ɖa le wò ŋutɔ wò ŋku dzi gbã, ekema àte ŋu akpɔ nu nyuie aɖe ati fefee si le nɔviwò ƒe ŋku dzi la. 43  “Elabena ati nyui aɖeke meli si tsea ku vóvo o; nenema kee ati vóvo aɖeke meli si tsea ku nyui o. 44  Elabena ati sia ati ŋutɔ ƒe tsetsee wotsɔna dzea sii. Le kpɔɖeŋu me, womegbea gbowo le ŋukawo dzi, alo waintsetsewo le aŋɔka dzi o. 45  Ame nyui hea nu nyui doa goe tso eƒe dzi ƒe nu nyui dzraɖoƒe, gake ame vɔ̃ɖi ɖea nu vɔ̃ɖi doa goe tso eƒe nu vɔ̃ɖi dzraɖoƒe; elabena nya si wu ame ƒe dzi la, eyae eƒe nu gblɔna. 46  “Ke nu ka tae miele yɔyem be ‘Aƒetɔ! Aƒetɔ!’ evɔ miewɔa nya siwo megblɔna ya dzi o? 47  Ame sia ame si vaa gbɔnye, eye wòsea nye nyawo hewɔa wo dzi la, mafia mi ame si wòɖi: 48  Ele abe ame aɖe si le xɔ tum, ame si ku do wòyi to, eye wòɖo egɔme anyi ɖe agakpe dzi ene. Ale, esi tɔ ɖɔ la, tɔsisia va nyẽ zi ɖe xɔ ma ŋu, ke hã, ŋusẽ menɔ eŋu wòte ŋu ʋuʋui o, le esi wotui nyuie ta. 49  Gake ame si senɛ, eye mewɔa edzi o la, ele abe ame si tu xɔ ɖe anyigba, eye meɖo gɔmeɖoanyi nɛ o ene. Tɔsisi va nyẽ zi ɖe eŋu, eye enumake emu, eye xɔ ma gbã gudugudu.”

Etenuŋɔŋlɔ