Luka 5:1-39

5  Gbeɖeka enɔ tsitre ɖe Genezaret ta la nu nɔ Mawu ƒe Nya la fiam, eye amewo nɔ nya la sem, eye wonɔ emimim ɖo.  Eye wòkpɔ tɔdziʋu eve le ta la to, gake ɖɔkplɔlaawo menɔ wo me o, ke wonɔ woƒe ɖɔwo kpalam.  Esi wòge ɖe tɔdziʋuawo dometɔ ɖeka, si nye Simon tɔ me la, ebia tso esi be wòakui ate ɖa le goa ŋu vie. Azɔ enɔ anyi ɖe tɔdziʋua me, eye wòde asi nufiafia amehaawo me.  Esi wòdzudzɔ nuƒoƒo la, egblɔ na Simon be: “Ku ʋua yi afi si goglo, eye miɖi miaƒe ɖɔawo, ne miaɖe lã.”  Gake Simon ɖo eŋu gblɔ be: “Nufiala, míeku kutri zã blibo la katã, gake míeɖe naneke o, gake le wò nya nu la, maɖi ɖɔawo.”  Eye esi wowɔ esia la, woɖe lã geɖe. Le nyateƒe me la, woƒe ɖɔawo te vuvu.  Eya ta womia asi wo tɔ siwo nɔ tɔdziʋu kemɛa me be woava kpe ɖe yewo ŋu; eye wova, eye woɖe lãwo de ʋu eveawo siaa me, ale be wode asi toyiyi me.  Esi Simon Petro kpɔ esia la, ebɔbɔ ɖe Yesu ƒe klo nu gblɔ be: “Aƒetɔ, dzo le gbɔnye, elabena nu vɔ̃ wɔla menye.”  Elabena lã siwo woɖe la wɔ nuku na eya kple ame siwo katã le egbɔ, 10  nenema kee wòwɔ nuku na Yakobo kple Yohanes, Zebedeo vi, siwo nye Simon ƒe hadɔwɔlawo hã. Gake Yesu gblɔ na Simon be: “Dzudzɔ vɔvɔ̃. Tso fifia dzi la, ànɔ amewo ɖem agbagbee.” 11  Ale woku tɔdziʋuawo va ɖi go, eye wogblẽ nu sia nu ɖi hedze eyome. 12  Ɣebubuɣi esi wònɔ duawo dometɔ ɖeka me la, kpɔ ɖa, ŋutsu aɖe si kpodɔ xɔ ŋuti katã na lae nye esi! Esi eƒe ŋku kli Yesu la, edze klo ɖe eŋkume heɖe kuku nɛ gblɔ be: “Aƒetɔ, ne èlɔ̃ ko la, àte ŋu ana ŋutinye nakɔ.” 13  Eye esi wòdo eƒe asi ɖa la, eka asi eŋu gblɔ be: “Melɔ̃. Ŋutiwò nekɔ.” Eye enumake kpodɔ la vɔ nɛ. 14  Eye wòde se na ŋutsua be wòagagblɔe na ame aɖeke o: “Ke boŋ yi nàtsɔ ɖokuiwò afia nunɔla, eye nàna ŋuwò kɔkɔ ŋu nuwo, abe ale si Mose de see ene, be wòanye ɖaseɖiɖi na wo.” 15  Gake eŋuti nya nɔ kakam ɖe edzi geɖe wu, eye ameha geɖewo va ƒoa ƒu be yewoaɖo toe, eye wòada yewoƒe dɔwo na yewo. 16  Ke hã, ekpɔtɔ ɖe aga yi gbedadaƒo henɔ gbe dom ɖa. 17  Le ŋkeke mawo dometɔ ɖeka dzi la, enɔ nu fiam, eye Farisitɔwo kple sefiala siwo tso Galilea kple Yudea kpakple Yerusalem du ɖe sia ɖe me la bɔbɔ nɔ anyi ɖe afi ma; eye Yehowa ƒe ŋusẽ nɔ afi ma be wòada dɔ na amewo. 18  Eye kpɔ ɖa! Ŋutsuwo kɔ lãmetututɔ aɖe ɖe aba dzi, eye wonɔ mɔnu dim le ale si woawɔ akɔe ava eme ahadae ɖe egbɔe ŋu. 19  Eya ta esi le ameha la ta womete ŋu kpɔ mɔnu aɖeke kɔe ɖo egbɔ o la, wolia xɔ la tame, eye woɖiɖii kple aba sue la to xɔgbakpeawo dome ɖe ame siwo nɔ Yesu ŋkume la dome. 20  Eye esi wòkpɔ woƒe xɔse la, egblɔ be: “Ame, wotsɔ wò nu vɔ̃wo ke wò.” 21  Esia ta agbalẽfialawo kple Farisitɔwo de asi tamebubu me be: “Ame kae nye esi le busunyawo gblɔm ale? Ame kae ate ŋu atsɔ nu vɔ̃ ake, ne menye Mawu ɖeka ko oa?” 22  Gake esi Yesu nya be wonɔ tame bum nenema la, eɖo eŋu na wo gblɔ be: “Nu ka ŋu bum miele le miaƒe dziwo me? 23  Kae bɔbɔ wu, be woagblɔ be, ‘Wotsɔ wò nu vɔ̃wo ke wò’ loo, alo be woagblɔ be, ‘Tso nàzɔ’? 24  Ke hã, ne mianyae be ŋusẽ le Amegbetɔvi la si be wòatsɔ nu vɔ̃wo ake le anyigba dzi . . .” egblɔ na lãmetututɔa be: “Mele egblɔm na wò be, Tso nàtsɔ wò aba sue la, eye dze mɔ nàyi aƒe me.” 25  Eye enumake etso le wo ŋkume, tsɔ nu si dzi wòmlɔna, eye wònɔ Mawu dom ɖe dzi dzo yi eƒe aƒe me. 26  Azɔ gbɔgblɔ bu ɖe wo katã, eye wote Mawu dodo ɖe dzi, eye vɔvɔ̃ ɖo wo vevie, eye wonɔ gbɔgblɔm be: “Míekpɔ nu madzɔkpɔwo egbea lo!” 27  Ke le nu siawo megbe la, edo go, eye wòkpɔ nudzɔla aɖe, si ŋkɔe nye Lewi, wòbɔbɔ nɔ anyi ɖe nudzɔƒe, eye wògblɔ nɛ be: “Dze yonyeme.” 28  Eye wògblẽ nu sia nu ɖi hetso dze eyome. 29  Lewi ɖo kplɔ̃ gã aɖe hã nɛ le eƒe aƒe me; eye nudzɔla gbogbo aɖewo kple ame bubuwo nɔ wo ŋu le kplɔ̃a ŋu le nuɖuƒea. 30  Eya ta Farisitɔwo kple woƒe agbalẽfialawo te liʋiliʋilili le eƒe nusrɔ̃lawo ŋu be: “Nu ka tae mieɖua nu henoa nu kple nudzɔlawo kpakple nu vɔ̃ wɔlawo?” 31  Yesu ɖo eŋu na wo gblɔ be: “Ame siwo le lãmesẽ me la mehiã atikewɔla o, gake ame siwo le dɔ lém la hiãe. 32  Menye ame dzɔdzɔewoe meva be mayɔ o, ke boŋ nu vɔ̃ wɔlawo, hena dzimetɔtrɔ.” 33  Wogblɔ nɛ be: “Yohanes ƒe nusrɔ̃lawo tsia nu dɔna edziedzi henɔa kokoƒoƒowo dzi, eye nenema kee Farisitɔwo ƒe nusrɔ̃lawo hã wɔna, gake tɔwòwo ya ɖua nu noa nu.” 34  Yesu gblɔ na wo be: “Miate ŋu ana ŋugbetɔsrɔ̃ xɔlɔ̃wo natsi nu adɔ esime ŋugbetɔsrɔ̃ le wo gbɔ o ɖe, menye nenemae oa? 35  Ke ŋkekewo li gbɔna, esime woakplɔ ŋugbetɔsrɔ̃ la adzoe le wo gbɔ; ekema woatsi nu adɔ le ŋkeke mawo me.” 36  Egawɔ kpɔɖeŋu aɖe hã na wo be: “Ame aɖeke melãa awudziwui yeye ƒe kakɛ tsɔ tɔna ɖe awudziwui xoxo ƒe vuvu teƒe o; ne ewɔe nenema la, awu yeyea ƒe kakɛa aho ɖa, eye awu yeyea ƒe kakɛa masɔ ɖe awu xoxoa nu o. 37  Eye ame aɖeke mekɔa wain yeye ɖe waingolo xoxowo me o; ne ewɔe nenema la, ekema wain yeye la ana goloawo nawó, eye wòaƒu gbe, eye waingoloawo dome agblẽ. 38  Ke boŋ ele be woakɔ wain yeye ɖe waingolo yeyewo me. 39  Ame aɖeke menoa wain xoxo vɔ gadia yeyea o; elabena egblɔna be: ‘Xoxoa nyo.’”

Etenuŋɔŋlɔ