Dzo kpo yi emenuwo dzi

Dzo kpo yi emenuawo dzi

Luka 4:1-44

4  Ke Yesu si yɔ fũu kple gbɔgbɔ kɔkɔe la trɔ tso Yordan nu, eye gbɔgbɔ la kplɔe yi teƒeteƒewo le gbedadaƒo  hena ŋkeke blaene, esime Abosam nɔ etem kpɔ. Gawu la, meɖu naneke le ŋkeke mawo me o, eye le esia ta esi ŋkekeawo wu enu la, dɔ wui.  Ale Abosam gblɔ nɛ be: “Ne Mawu ƒe vie nènye la, ekema gblɔ na kpe sia be wòatrɔ azu abolo.”  Gake Yesu ɖo eŋu nɛ be: “Woŋlɔ ɖi be, ‘Mele be ame nanɔ agbe ɖe abolo ɖeɖe ko ŋu o.’”  Eya ta ekplɔe yi teƒe kɔkɔ aɖe, eye wòtsɔ anyigba dzi nɔlawo ƒe fiaɖuƒewo katã fiae le ɣeyiɣi kpui aɖe ko me;  eye Abosam gblɔ nɛ be: “Matsɔ ŋusẽ sia katã kple woƒe ŋutikɔkɔe ana wò, elabena nyee wotsɔe de asi na, eye matsɔe ana ame sia ame si medi be matsɔe ana.  Eya ta wò la, ne ède ta agu nam la, wo katã anye tɔwò.”  Yesu ɖo eŋu nɛ gblɔ be: “Woŋlɔ ɖi be, ‘Yehowa wò Mawu ye wòle be nàde ta agu na, eye eya ɖeka koe wòle be nàwɔ subɔsubɔdɔ kɔkɔe na.’”  Azɔ ekplɔe yi Yerusalem hetsɔe ɖo gbedoxɔa tame, eye wògblɔ nɛ be: “Ne Mawu ƒe vie nènye la, ekema ti kpo tso afi sia nàdze anyigba; 10  elabena woŋlɔ ɖi be, ‘Ade se na eƒe dɔlawo le ŋutiwò, be woakpɔ tawò,’ 11  eye: ‘Woakɔ wò ɖe woƒe asiwo me, bene nàgatsɔ wò afɔ axlã ɖe kpe gbeɖe o.’” 12  Yesu ɖo eŋu nɛ gblɔ be: “Wogblɔ be, ‘Mele be nàte Yehowa wò Mawu kpɔ o.’” 13  Eya ta esi Abosam wu tetekpɔ la katã nu la, edzo le egbɔ hena ɣeyiɣi bubu si agasɔ nɛ. 14  Eye Yesu gbugbɔ yi Galilea le gbɔgbɔ la ƒe ŋusẽ me. Eye eŋu nya nyui ɖi hoo le afi ma nuto bliboa katã me. 15  Eye wòde asi nufiafia me le woƒe ƒuƒoƒewo, eye amewo katã nɔ bubu dem eŋu. 16  Eye wòva Nazaret, afi si wonyii le; eye abe ale si wòlɔ̃a wɔwɔ le sabat ŋkeke dzi ene la, eyi ƒuƒoƒe la, eye wòtsi tsitre be yeaxlẽ nu. 17  Eya ta wotsɔ nyagblɔɖila Yesaya ƒe agbalẽ xatsaxatsa la nɛ, eye wòʋu agbalẽ xatsaxatsa la hekpɔ teƒe si woŋlɔ ɖo bena: 18  “Yehowa ƒe gbɔgbɔ le dzinye, elabena esi ami nam be magblɔ nya nyui na ame dahewo, edɔm ɖa be maɖe gbeƒã ablɔɖe na aboyomewo kple nukpɔkpɔ ake na ŋkuagbãtɔwo, be mana ablɔɖe ame siwo wote ɖe anyi ne woadzo, 19  be maɖe gbeƒã Yehowa ƒe amenuveƒe la.” 20  Azɔ eŋlɔ agbalẽ xatsaxatsa la, tsɔe de asi na subɔvi la, eye wòbɔbɔ nɔ anyi; eye ame siwo katã nɔ ƒuƒoƒe la fɔ ŋku ɖe edzi dzoɣlii. 21  Tete wòde asi gbɔgblɔ me na wo be: “Ŋɔŋlɔ sia si miese fifi laa la va eme egbea.” 22  Eye wo katã wote ɖase nyui ɖiɖi tso eŋu, eye woƒe mo wɔ yaa le nya vivi wɔdɔɖeamedzi siwo do tso eƒe nu me la ta, eye wonɔ gbɔgblɔm be: “Menye Yosef ƒe vi lae nye esia oa?” 23  Eye wògblɔ na wo be: “Ðikeke aɖeke mele eme o be miado lo sia ɖe ŋunye be, ‘Atikewɔla, da dɔ na ɖokuiwò; nu siwo míese be wole dzɔdzɔm le Kapernaum la, wɔ wo le mia de afi sia hã.’” 24  Gake egblɔ be: “Vavã mele egblɔm na mi be, womexɔa nyagblɔɖila aɖeke le wo de o. 25  Le kpɔɖeŋu me, mele egblɔm na mi le nyateƒe me be: Ahosi geɖewo nɔ Israel le Eliya ƒe ŋkekeawo me, esime wotu dziƒo nu ƒe etɔ̃ kple ɣleti ade, si na dɔ gã aɖe to le anyigba la katã dzi, 26  ke hã, womedɔ Eliya ɖe nyɔnu mawo dometɔ aɖeke gbɔ o, negbe ɖe Zarpat le Zidon nyigba dzi ko, ɖe ahosi aɖe gbɔ. 27  Nenema kee kpodɔléla geɖewo nɔ Israel le nyagblɔɖila Elisa ƒe ɣeyiɣia me, ke hã, womekɔ wo dometɔ aɖeke ŋuti o, negbe Naeman, Siria ŋutsu la ko.” 28  Ke ame siwo katã nɔ nu siawo sem le ƒuƒoƒea la do dziku helĩhelĩ; 29  eye wotso hetutui kabakaba do goe le dua me, eye wokplɔe va ɖo to si dzi wotu woƒe dua ɖo la tame, be yewoatu asi ʋume nɛ aɖo ɖa. 30  Gake eto wo dome hedzo. 31  Eye wòɖi va Kapernaum, si nye Galilea du aɖe me. Eye wònɔ nu fiam wo le sabat la dzi; 32  eye wolulu le ale si wòfia nui ta, elabena eƒo nu kple ŋusẽ. 33  Ke gbɔgbɔ aɖe, si nye gbɔgbɔ vɔ̃ makɔmakɔ, nɔ ŋutsu aɖe me le ƒuƒoƒe la, eye wòdo ɣli kple gbe sesẽ be: 34  “Aa! Nya kae le mía kpli wò dome, wò Yesu Nazaretetɔ? Ðe nèva be yeatsrɔ̃ mía? Menya ame si tututu nènye: Mawu ƒe Kɔkɔetɔ lae nènye.” 35  Gake Yesu ka mo nɛ gblɔ be: “Zi ɖoɖoe, eye nàdo go le eme.” Eya ta esi gbɔgbɔ vɔ̃ la tsɔ amea xlã ɖe anyi le wo dome vɔ la, edo go le eme, eye mewɔ nuvevi aɖekee o. 36  Esia wɔ mo yaa na wo katã, eye wote dzeɖoɖo le wo nɔewo dome nɔ gbɔgblɔm be: “Mikpɔ ale si wòƒoa nui ɖa, elabena eɖea gbe na gbɔgbɔ makɔmakɔwo kple ŋusẽ, eye wodoa go!” 37  Ale eŋu nya nɔ kakam le afi ma nutoa ƒe akpa sia akpa. 38  Esi wòtso dzo le ƒuƒoƒea la, eva Simon ƒe aƒe me. Ke asrã sesẽ aɖe nɔ fu ɖem na Simon lɔ̃xo, eye woɖe kuku nɛ ɖe eta. 39  Eye wòtsi tsitre hebi ɖe edzi, eye wòblu ɖe asrã la ta, eye asrã la dzo le edzi. Enumake nyɔnua fɔ hede asi amedzrowɔwɔ me na wo. 40  Ke esi ɣe nɔ to ɖom la, ame siwo si dɔ vovovo lélawo le la kplɔ wo va egbɔ. Eda eƒe asiwo ɖe wo dometɔ ɖe sia ɖe dzi heda dɔa na wo. 41  Gbɔgbɔ vɔ̃wo hã doa go le ame geɖewo me, henɔa ɣli dom be: “Wòe nye Mawu ƒe Vi la.” Gake ekaa mo na wo, eye meɖea mɔ na wo be woaƒo nu o, elabena wonya be eyae nye Kristo la. 42  Ke esi ŋu ke la, edo go yi teƒe aɖe si ame aɖeke mele o. Gake amehaawo te edidi, eye wova keke afi si wòle, eye wodze agbagba be yewoasikae ɖi, be wòagadzo le yewo gbɔ o. 43  Gake egblɔ na wo be: “Ele be magblɔ Mawu fiaɖuƒe ŋuti nya nyui la na du bubuwo hã, elabena esia tae wodɔm ɖo.” 44  Eya ta eyi edzi ɖe gbeƒã le ƒuƒoƒewo le Yudea.

Etenuŋɔŋlɔ