Luka 3:1-38

3  Le Kaisaro Tiberio ƒe fiaɖuɖu ƒe ƒe wuiatɔ̃lia me, esime Pontio Pilato nye nutomefia le Yudea, eye Herodes nye Galilea nutoa dzi ɖula, gake nɔvia Filipo ya nye Iturea kple Traxoniti nutoawo dzi ɖula, eye Lisania nye Abilene nutoa dzi ɖula,  le nunɔlawo ƒe tatɔ Ana kple Kayafa ƒe ŋkekeawo me la, Mawu ƒe nya va na Yohanes, Zaxariya vi, le gbedadaƒo.  Ale wòyi Yordan nuto bliboa katã me nɔ gbeƒã ɖem nyɔnyrɔxɔxɔ, si nye dzesi na dzimetɔtrɔ hena nu vɔ̃wo ƒe tsɔtsɔke,  abe ale si woŋlɔe ɖe Yesaya nyagblɔɖila la ƒe nyawo ƒe agbalẽa me ene, be: “Se ɖa! Ame aɖe le ɣli dom le gbedadaƒo be, ‘Midzra Yehowa ƒe mɔ dzi ɖo, mina eƒe mɔwo nadzɔ.  Ele be woaxe bali me ʋe ɖe sia ɖe, eye woana to sia to kple togbɛ sia togbɛ nazu sɔsɔeƒe, eye mɔ gɔglɔ̃wo nadzɔ, eye teƒe glidzaglidzawo nazu mɔ zɔzrɔ̃ewo;  eye ŋutilãwo katã akpɔ mɔ si dzi Mawu ato aɖe ame.’”  Eya ta ete gbɔgblɔ na ameha siwo vaa egbɔ be wòanyrɔ yewo la be: “Mi dzakpatawo ƒe dzidzimeviwo, ame kae ɖo aɖaŋu na mi be miasi le dziku si gbɔna la nu?  Ekema mitse ku siwo aɖee afia be mietrɔ dzi me. Eye migade asi gbɔgblɔ me le mia ɖokui me be, ‘Abraham ye nye mía fofo o.’ Elabena mele egblɔm na mi be, ŋusẽ le Mawu si be wòana viwo nado tso kpe siawo me na Abraham.  Le nyateƒe me la, wotsɔ fía ɖo atiawo ƒe ke dzi xoxo; eya ta ati sia ati si metsea ku nyui o la, woalãe, eye woatsɔe aƒu gbe ɖe dzo me.” 10  Eye amehaawo bianɛ be: “Ekema, nu kae wòle be míawɔ?” 11  Eɖoa eŋu na wo be: “Ame si si awutewui eve le la nena ɖeka ame si si ɖeke mele o, eye ame si si nuɖuɖu le hã newɔ nenema ke.” 12  Ke nudzɔlawo kura gɔ̃ hã va be wòanyrɔ yewo, eye wogblɔ nɛ be: “Nufiala, nu kae wòle be míawɔ?” 13  Egblɔ na wo be: “Migaxɔ adzɔ wòawu esi woɖo ɖi la o.” 14  Eye ame siwo le asrafodɔ wɔm hã bianɛ be: “Nu kae wòle be míawo hã míawɔ?” Eye wògblɔ na wo be: “Migawɔ ŋlɔmi le ame aɖeke ŋu o, eye migatso ame aɖeke nu alakpatɔe o, ke boŋ nu siwo wonana mi la nadze mia ŋu.” 15  Ke esi ameawo katã nɔ mɔkpɔkpɔ me, eye wonɔ bubum le woƒe dzi me tso Yohanes ŋu be: “Alo eyae nye Kristo laa?” hã la, 16  Yohanes ɖo eŋu gblɔ na wo katã be: “Nye la, metsɔ tsi le mia nyrɔm; gake ame si tri akɔ wum la gbɔna, ame si ƒe afɔkpaka nyemedze atu o. Eya atsɔ gbɔgbɔ kɔkɔe kple dzo anyrɔ mi. 17  Elé eƒe lugbɔnu ɖe asi, be wòakplɔ eƒe lugbɔƒe keŋkeŋ, eye be wòaƒo lu la nu ƒu ɖe eƒe nudzraɖoƒe, ke tsroa ya la, atɔ dzoe, eye womate ŋu atsii o.” 18  Eya ta ena nuxlɔ̃ame bubu geɖewo, eye wòyi edzi nɔ nya nyui la gblɔm na ameawo. 19  Gake le esi wògbe nya na nutomedziɖula Herodes le nɔvia srɔ̃ Herodia, kple nu gbegblẽ siwo katã Herodes wɔ, ŋuti ta la, 20  egawɔ nu vɔ̃ɖi bubu tsɔ kpe esiawo: ede Yohanes gaxɔ me. 21  Ke esi wonyrɔ ameawo katã la, wonyrɔ Yesu hã, eye esi wònɔ gbe dom ɖa la, dziƒo nu ʋu, 22  eye gbɔgbɔ kɔkɔe la ɖi ɖe edzi abe ahɔnɛ ene, eye gbe aɖe ɖi tso dziƒo be: “Wòe nye Vinye si gbɔ nyemelɔ̃a nu le o; mekpɔ ŋudzedze ɖe ŋuwò.” 23  Gawu la, Yesu ŋutɔ, esime wòdze eƒe dɔa gɔme la, exɔ abe ƒe blaetɔ̃ ene, eye le amewo ƒe susu nu la, enye Yosef vi, Eli vi, 24  Matat vi Lewi vi, Melxi vi, Yona vi, Yosef vi, 25  Matatia vi, Amos vi, Naxum vi, Esli vi, Nagae vi, 26  Mahat vi, Matatia vi, Semei vi, Yosek vi, Yoda vi, 27  Yohanan vi, Raesa vi, Zerubabel vi, Sealtiel vi, Neri vi, 28  Melxi vi, Adi vi, Kosam vi, Elmadam vi, Er vi, 29  Yesu vi, Eliezer vi, Yorim vi, Matat vi, Lewi vi, 30  Simeon vi, Yuda vi, Yosef vi, Yonam vi, Eliakim vi, 31  Melea vi, Mena vi, Matata vi, Natan vi, David vi, 32  Isai vi, Obed vi, Boaz vi, Salmon vi, Naxeson vi, 33  Aminadab vi, Arni vi, Xezron vi, Perez vi, Yuda vi, 34  Yakob vi, Isak vi, Abraham vi, Tara vi, Naxor vi, 35  Seruk vi, Regu vi, Peleg vi, Eber vi, Sela vi, 36  Kainan vi, Arpaxsad vi, Sem vi, Noa vi, Lamex vi, 37  Metusala vi, Henox vi, Yared vi, Mahalaleel vi, Kainan vi, 38  Enos vi, Set vi, Adam vi, Mawu ƒe vi.

Etenuŋɔŋlɔ