Luka 2:1-52

2  Ke le ŋkeke mawo me la, sedede tso Kaisaro Augusto gbɔ be woaŋlɔ anyigba dzi nɔlawo katã ƒe ŋkɔ;  (ŋkɔŋɔŋlɔ gbãtɔ sia va eme esime Kirenio nye nutomefia le Siria;)  eye amewo katã zɔ mɔ yi be woaŋlɔ yewo ŋkɔ, ame sia ame le wo dedu me.  Yosef hã dzo le Galilea, tso du si nye Nazaret me yi Yudea, le David ƒe du, si woyɔna be Betlexem me, le esi wònye David ƒe aƒe kple ƒomea me tɔ ta,  be woaŋlɔ woa kple Maria, ame si wotsɔ nae wòɖe, abe ale si wodo eƒe ŋugbe nɛ ene, si ƒo fu tsi ɖo azɔ, la ƒe ŋkɔ.  Esime wonɔ afi ma la, eƒe ŋkekeawo de be wòadzi vi.  Eye wòdzi ŋutsuvi, si nye eƒe ŋgɔgbevi, eye wòxatsa avɔ ɖe eŋu, eye wòtsɔe mlɔ lãnuɖunu me, elabena teƒe aɖeke menɔ anyi na wo le amedzrodzeƒea o.  Alẽkplɔlawo hã nɔ nuto ma ke me le gbedadaƒo, nɔ woƒe lãhawo ŋu dzɔm le zã me.  Kasia, Yehowa ƒe dɔla va tsi tsitre ɖe wo gbɔ, eye Yehowa ƒe ŋutikɔkɔe klẽ ƒo xlã wo, eye vɔvɔ̃ ɖo wo ŋutɔ. 10  Gake mawudɔla la gblɔ na wo be: “Migavɔ̃ o, elabena kpɔ ɖa! Meva dzidzɔ gã si ame sia ame akpɔ la ŋuti nya nyui gblɔ ge na mi, 11  elabena wodzi Xɔla, si nye Kristo Aƒetɔ la, na mi egbea le David ƒe du la me. 12  Eye esia anye dzesi na mi: Miakpɔ vidzĩ si ŋu woxatsa avɔ ɖo, si wotsɔ mlɔ lãnuɖunu me.” 13  Eye enumake dziƒoʋakɔ gã aɖe va kpe ɖe mawudɔla la ŋu nɔ Mawu kafum nɔ gbɔgblɔm be: 14  “Ŋutikɔkɔe na Mawu le dziƒo boo, eye ŋutifafa nanɔ ame siwo ŋu wòkpɔa ŋudzedze ɖo la dome le anyigba dzi.” 15  Eye esi mawudɔlawo dzo le alẽkplɔlaawo gbɔ yi dziƒo la, wode asi gbɔgblɔ me na wo nɔewo be: “Mina míadze agbagba ɖe sia ɖe ayi Betlexem, ne míakpɔ nu sia si dzɔ, si Yehowa na míenya la ɖa.” 16  Eye woɖe abla yi, eye wokpɔ Maria kple Yosef kpakple vidzĩ, si nɔ anyimlɔƒe le lãnuɖunu me la. 17  Esi wokpɔe la, woka nya siwo wogblɔ na wo tso ɖevi sue sia ŋu la ta. 18  Eye ame siwo katã se nya siwo alẽkplɔlawo gblɔ na wo la ƒe mo wɔ yaa, 19  gake Maria de asi nya siawo katã dzadzraɖo me, henɔ wo ŋu bum le eƒe dzi me. 20  Emegbe alẽkplɔlaawo trɔ dzo, eye wonɔ Mawu dom ɖe dzi henɔ ekafum ɖe nu siwo katã wose hekpɔ, abe ale si wogblɔe na wo ene, la ta. 21  Ke esi wòde ŋkeke enyi, be woatso aʋa nɛ la, woyɔ eŋkɔ hã be Yesu, si nye ŋkɔ si mawudɔla la yɔ hafi wova fɔ eƒe fu. 22  Eye esi woƒe ŋutikɔkɔ ƒe ŋkekeawo de le Mose ƒe sea nu la, wokɔe yi Yerusalem, be woatsɔe aɖo Yehowa ŋkume, 23  abe ale si woŋlɔe ɖe Yehowa ƒe se la me ene be: “Ele be woayɔ atsu sia atsu si ʋu dɔ nu la be Yehowa ƒe nu kɔkɔe,” 24  eye be woasa vɔ abe ale si wogblɔe ɖe Yehowa ƒe se la me ene be: “Akpakpa* eve alo ahɔnɛ eve.” 25  Eye kpɔ ɖa! Ŋutsu aɖe nɔ Yerusalem, si ŋkɔe nye Simeon, eye ŋutsu sia nye ame dzɔdzɔe kple mawuvɔ̃la, si nɔ mɔ kpɔm na Israel ƒe akɔfafa, eye gbɔgbɔ kɔkɔe nɔ edzi. 26  Gawu la, Mawu ɖee fiae to gbɔgbɔ kɔkɔe la dzi be maku o, va se ɖe esime wòkpɔ Yehowa ƒe Kristo la hafi. 27  Eva gbedoxɔa me azɔ to gbɔgbɔ la ƒe ŋusẽ dzi; eye esi Yesu, ɖevi sue la, dzilawo kɔe vae be woawɔ nɛ abe ale si wòle le sea nu ene la, 28  eya ŋutɔ xɔe ɖe eƒe abɔwo dome, eye wòkafu Mawu gblɔ be: 29  “Azɔ Aƒetɔ Dziɖulagã, èle mɔ ɖem na wò dɔla be wòadzo le ŋutifafa me le wò nya la nu; 30  elabena nye ŋkuwo kpɔ mɔ si dzi nàto aɖe ame, 31  mɔ si nèdzra ɖo le dukɔwo katã ŋkume, 32  kekeli si aɖe nu si tsyɔ ŋkume na dukɔwo la ɖa, kple wò dukɔ Israel ƒe ŋutikɔkɔe.” 33  Eye fofoa kple dadaa ƒe mo wɔ yaa le nya siwo gblɔm wònɔ tso eŋu la ŋuti. 34  Azɔ hã, Simeon yra wo, gake egblɔ na Maria si nye dadaa be: “Kpɔ ɖa! Woɖo ame sia anyi hena ame geɖewo ƒe anyidzedze kple fɔfɔ ake le Israel, kple dzesi si ŋu woaƒo nu atsi tsitre ɖo 35  (ɛ̃, yi legbe aɖe aƒo ɖe wò ŋutɔ wò luʋɔ), bene woaɖe ame geɖewo ƒe dzimesusuwo afia.” 36  Ke nyɔnu nyagblɔɖila aɖe nɔ anyi, si ŋkɔe nye Hana, ame si nye Fanuel vinyɔnu, tso Aser toa me (nyɔnu sia tsi xɔ ƒe geɖe, eye esime wònye ɖetugbui si menya ŋutsu o woɖe la, ƒe adre koe wònɔ anyi kple srɔ̃a, 37  eye azɔ wònye ahosi si xɔ ƒe blaenyi vɔ ene), gake medzona le gbedoxɔa me gbeɖe o, eye wòwɔa subɔsubɔdɔ kɔkɔe zã kple keli, le nutsitsidɔ kple kokoƒoƒowo me. 38  Eye le gaƒoƒo ma tututu me la, ete va, eye wòde asi akpedada me na Mawu henɔ nu ƒom tso ɖevi la ŋu na ame siwo katã nɔ Yerusalem ƒe ɖeɖe la lalam. 39  Eye esi wowɔ nu siwo katã Yehowa ƒe se la bia vɔ la, wotrɔ dzo yi Galilea le woawo ŋutɔ ƒe du Nazaret me. 40  Eye ɖevi sue la yi edzi nɔ tsitsim henɔ ŋusẽ kpɔm, eye nunya yɔe fũu, eye Mawu ƒe amenuveve nɔ edzi. 41  Ke edzilawo yia Yerusalem ƒe sia ƒe na ŋutitotoŋkekenyuia ɖuɖu. 42  Eye esi wòxɔ ƒe wuieve la, wogayi le ŋkekenyuia ƒe kɔa nu, 43  eye wonɔ afi ma va se ɖe esime ŋkekeawo wu enu. Gake esi wotrɔ gbɔna la, Yesu ŋutsuvi la tsi megbe le Yerusalem, gake edzilawo mede dzesii o. 44  Esi wotsɔe be anɔ ameha si nɔ mɔa zɔm dome ta la, wozɔ ŋkeke ɖeka ƒe mɔ, eye azɔ wote edidi le ƒometɔwo kple ame nyanyɛwo dome. 45  Gake esi womenɔ ekpɔm o ta la, wotrɔ yi Yerusalem, heva dii nyuie. 46  Ke le ŋkeke etɔ̃ megbe la, wokpɔe le gbedoxɔa me wòbɔbɔ nɔ anyi ɖe nufialawo dome, eye wònɔ to ɖom wo henɔ nyawo biam wo. 47  Gake eƒe nugɔmesese kple eƒe nyaŋuɖoɖowo wɔ mo yaa na ame siwo katã nɔ to ɖomee la. 48  Ke esi wokpɔe la, ewɔ nuku na wo, eye dadaa gblɔ nɛ be: “Vinye, nu kae nye esi nèwɔ ɖe mía ŋu? Kpɔ ɖa, mía kple fofowò míetsi dzodzodzoe nɔ diwòm.” 49  Gake egblɔ na wo be: “Nu ka tae wòle be mianɔ diyem? Mienyae be ele be manɔ Fofonye ƒe aƒe me oa?” 50  Gake womese nya si wògblɔ na wo la gɔme o. 51  Eye wòyi kpli wo, eye wòva Nazaret, eye wòyi edzi bɔbɔ eɖokui na wo. Eye dadaa dzra nya siawo katã ɖo nyuie ɖe eƒe dzi me. 52  Eye Yesu yi edzi nɔ tsitsim, eye eƒe nunya hã nɔ dzidzim ɖe edzi, eye wònɔ amenuveve kpɔm le Mawu kple amewo siaa gbɔ.

Etenuŋɔŋlɔ

Alo “ƒeƒlelu.”