Luka 17:1-37

17  Eye wògblɔ na eƒe nusrɔ̃lawo be: “Nu siwo ana woakli nu la ava godoo. Ke hã, baba na ame si dzi wotona vana!  Ade edzi ne wotsɔ té tsi ɖe kɔ nɛ, eye wotsɔe ƒu gbe ɖe atsiaƒu me, wu be wòana ɖevi sue siawo dometɔ ɖeka nakli nu.  Mikpɔ mia ɖokui dzi nyuie. Ne nɔviwò wɔ nu vɔ̃ la, ka mo nɛ, eye ne etrɔ dzi me la, tsɔe kee.  Ne ewɔ nu vɔ̃ ɖe ŋuwò zi adre kura gɔ̃ hã le ŋkeke ɖeka me, eye wògatrɔ va zi adre gblɔ be: ‘Metrɔ dzi me’ la, ele be nàtsɔe akee.”  Ke apostoloawo gblɔ na Aƒetɔ la be: “Na xɔse geɖe wu mí.”  Eye Aƒetɔ la gblɔ be: “Ne xɔse le mia si de atiku sue aɖe* ƒe lolome nu la, ekema miagblɔ na gboti sia be, ‘Ho, ne nàyi aɖadze atsiaƒu me!’ eye aɖo to mi.  “Mia dometɔ ka ƒe kluvie anɔ agble ŋlɔm alo anɔ lãwo kplɔm nɛ, eye ne etso gbedadaƒo gbɔ la, wòagblɔ nɛ be: ‘Va afii enumake, ne nàbɔbɔ anɔ kplɔ̃ ŋu’?  Ðe magblɔ nɛ boŋ be: ‘Di nane nam maɖu fiẽ sia, eye do akɔtawu nàsubɔm va se ɖe esime maɖu nu ano nu vɔ, eye emegbe àte ŋu aɖu nu ano nu’ oa?  Mada akpe na kluvi la le esi wòwɔ dɔ siwo wode esi la ta o, menye nenemae oa? 10  Nenema kee miawo hã, ne miewɔ nu siwo katã wode mia si la, migblɔ be: ‘Kluvi siwo ŋu viɖe aɖeke mele o ye míenye. Nu si wòle be míawɔ lae míewɔ.’” 11  Eye esi wòyina Yerusalem la, eto Samaria kple Galilea. 12  Eye esi wònɔ gegem ɖe kɔƒe aɖe me la, kpodɔléla ewo va do goe, gake wotsi tsitre ɖe adzɔge ɖaa. 13  Eye wokɔ gbe dzi gblɔ be: “Yesu, Nufiala, kpɔ nublanui na mí!” 14  Eye esi wòkpɔ wo ɖaa la, egblɔ na wo be: “Miyi ɖatsɔ mia ɖokui fia nunɔlawo.” Eye esi woyina la, wo ŋuti kɔ. 15  Esi wo dometɔ ɖeka kpɔ be yeƒe dɔa vɔ na ye la, etrɔ henɔ Mawu dom ɖe dzi lelele. 16  Eye wòva tsyɔ mo anyi ɖe Yesu ƒe afɔ nu henɔ akpe dam nɛ; gawu la, Samariatɔe wònye. 17  Yesu ɖo eŋu gblɔ be: “Menye wo ame ewo ŋutie kɔ oa? Ke ame asieke mamlɛawo ya ɖe? 18  Ðe womekpɔ ame aɖeke si trɔ be yeatsɔ ŋutikɔkɔe ana Mawu o, negbe dukɔ bubu me tɔ sia koa?” 19  Eye wògblɔ nɛ be: “Tso nàdzo, wò xɔse na nèhaya.” 20  Ke esi Farisitɔwo biae be ɣekaɣie Mawu fiaɖuƒe la ava hã la, eɖo eŋu na wo gblɔ be: “Mawu fiaɖuƒe la mava gaglãa ame sia ame nakpɔ o, 21  eye womanɔ gbɔgblɔm hã be, ‘Kpɔ afii ɖa!’ alo ‘Afi mɛ!’ o. Elabena kpɔ ɖa! Mawu fiaɖuƒe la le mia dome.” 22  Eye wògblɔ na nusrɔ̃laawo be: “Ŋkekewo li gbɔna, esime miadi be yewoakpɔ Amegbetɔvi la ƒe ŋkekeawo dometɔ ɖeka, gake miakpɔe o. 23  Eye amewo agblɔ na mi be, ‘Kpɔ afi mɛ ɖa!’ alo ‘Kpɔ afii ɖa!’ Migado go o, eye migaƒu du dze wo yome o. 24  Elabena abe ale si dzi kea dzo tso dziƒo ƒe go ɖeka me, eye wòklẽna yia dziƒo ƒe go evelia me ene la, nenema kee Amegbetɔvi la hã anɔ. 25  Gake gbã la, ele nɛ be wòato fukpekpe geɖe me, eye dzidzime sia agbe nu le egbɔ. 26  Gawu la, abe ale si wòdzɔ le Noa ƒe ŋkekeawo me ene la, nenema kee wòanɔ le Amegbetɔvi la ƒe ŋkekeawo hã me: 27  wonɔ nu ɖum, wonɔ nu nom, ŋutsuwo nɔ srɔ̃ ɖem, wonɔ nyɔnuwo tsɔm na be woaɖe, va se ɖe ŋkeke ma si dzi Noa ge ɖe aɖakaʋu la me, eye tsiɖɔɖɔa va, eye wòtsrɔ̃ wo katã. 28  Nenema kee abe ale si wòdzɔ le Lot ƒe ŋkekeawo me ene: wonɔ nu ɖum, wonɔ nu nom, wonɔ nu ƒlem, wonɔ nu dzram, wonɔ nuku ƒãm, wonɔ xɔ tum. 29  Gake le ŋkeke si dzi Lot do go tso Sodom la, dzo kple dzokpe dza tso dziƒo va tsrɔ̃ wo katã. 30  Nenema kee wòanɔ le ŋkeke ma si dzi woaɖe Amegbetɔvi la ɖe go afia la dzi. 31  “Le ŋkeke ma dzi la, ame si le xɔ ta, evɔ eƒe nuwo le aƒea me la, negaɖi be yeava tsɔ wo o, eye ame si le agble me la hã negatrɔ ava nu siwo le megbe la gbɔ o. 32  Miɖo ŋku Lot srɔ̃ dzi. 33  Ame sia ame si dina be yeakpɔ yeƒe luʋɔ ta dedie na ye ɖokui la abui, gake ame sia ame si abui la axɔe ɖe agbe. 34  Mele egblɔm na mi be: Le zã ma me la, ŋutsu eve anɔ aba ɖeka dzi; woakplɔ ɖeka, gake woagblẽ evelia ya ɖi. 35  Nyɔnu eve anɔ wɔ tum le té ɖeka dzi; woakplɔ ɖeka, gake woagblẽ evelia ya ɖi.” 36  * —— 37  Eya ta woɖo eŋu nɛ gblɔ be: “Afi kae, Aƒetɔ?” Egblɔ na wo be: “Afi si ŋutilã le la, afi mae hɔ̃wo hã aƒo ƒu ɖo.”

Etenuŋɔŋlɔ

Helagbe, “sinapi.”