Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Luka 16:1-31

16  Eye wògblɔ na nusrɔ̃lawo hã be: “Kesinɔtɔ aɖe nɔ anyi, eye aƒedzikpɔla le esi, eye wotso enu nɛ be ele eƒe nuwo dome gblẽm.  Eya ta eyɔe hegblɔ nɛ be, ‘Nya kae nye esia sem mele le ŋuwò? Tsɔ wò aƒedzikpɔkpɔ ŋuti nuŋlɔɖia vae, elabena mègate ŋu le aƒea dzi kpɔ ge azɔ o.’  Eye aƒedzikpɔla la gblɔ na eɖokui be: ‘Nu ka wɔ ge mala, esi wònye nye aƒetɔ le aƒedzikpɔkpɔdɔ la xɔ ge le asinye? Ŋusẽ mele ŋunye mawɔ dɔ sesẽ aɖeke o, nubiabia hã kpea ŋu nam.  Ahã! Menya nu si mawɔ, ale be ne woxɔ aƒedzikpɔkpɔdɔ la le asinye la, amewo axɔm ɖe woƒe aƒewo me.’  Eye esi wòyɔ ame siwo nyi fe le eƒe aƒetɔ ŋu la dometɔ ɖe sia ɖe vae la, egblɔ na gbãtɔ be: ‘Ho nenie nènyi le nye aƒetɔ ŋu?’  Egblɔ be: ‘Ami baf* alafa ɖeka.’ Egblɔ nɛ be: ‘Gbugbɔ xɔ wò nuŋlɔɖigbalẽa nàbɔbɔ nɔ anyi, eye nàŋlɔ kaba be blaatɔ̃.’  Emegbe egblɔ na ame bubu be: ‘Ke wò ɖe, ho nenie nènyi?’ Egblɔ be: ‘Lu kɔr* alafa ɖeka.’ Egblɔ nɛ be: ‘gbugbɔ xɔ wò nuŋlɔɖigbalẽa, eye nàŋlɔ blaenyi.’  Eye aƒedzikpɔla la ƒe aƒetɔ kafui, togbɔ be enye ame madzɔmadzɔ hã, elabena edze aɖaŋu; elabena nuɖoanyi sia me viwo dze aɖaŋu ɖe woawo ŋutɔ ƒe dzidzime ŋu wu kekeli la ƒe viwo.  “Mele egblɔm na mi hã be: Mitsɔ kesinɔnu madzɔmadzɔwo dze xɔlɔ̃woe na mia ɖokui, be ne wova vɔ la, woaxɔ mi ɖe nɔƒe mavɔwo. 10  Ame si nye nyateƒetɔ le nu suetɔ kekeake me la, enyea nyateƒetɔ le nu geɖewo hã me, eye ame si nye ame madzɔmadzɔ le nu suetɔ kekeake me la, enye ame madzɔmadzɔ le nu geɖewo hã me. 11  Eya ta ne mieɖee fia be yewonye nyateƒetɔwo le kesinɔnu madzɔmadzɔwo gome o ɖe, ame kae aka ɖe mia dzi atsɔ nu vavã ade mia si? 12  Eye ne mieɖee fia be yewonye nyateƒetɔwo le nu si nye ame bubu tɔ me o ɖe, ame kae atsɔ nu si nye mia ŋutɔwo tɔ ana mi? 13  Aƒemesubɔvi aɖeke mate ŋu anye kluvi na aƒetɔ eve o; elabena alé fu ɖeka, eye wòalɔ̃ evelia loo alo alé ɖe ɖeka ŋu, eye mabu evelia ɖe naneke me o. Miate ŋu anye Mawu kple Kesinɔnuwo siaa ƒe kluviwo o.” 14  Ke Farisitɔwo, siwo nye galɔ̃lawo la, nɔ to ɖom nya siawo katã, eye wote heheɖoɖo ɖe eta. 15  Eya ta egblɔ na wo be: “Miawoe nye ame siwo tsoa afia na mia ɖokuiwo be yewonye ame dzɔdzɔewo le amewo ŋkume, gake Mawu nya miaƒe dziwo; elabena nu si nye nu kɔkɔ le amegbetɔwo dome la nye ŋunyɔnu le Mawu ya ŋkume. 16  “Se la kple Nyagblɔɖilawo nɔ anyi va se ɖe Yohanes dzi. Tso ɣemaɣi la, wole Mawu fiaɖuƒe la ŋuti nya gblɔm wònye nya nyui, eye ame ƒomeviwo katã le ʋiʋlim ɖo ta egbɔ. 17  Vavãe, ele bɔbɔe be dziƒo kple anyigba nu nava yi, wu be Se la ƒe ŋɔŋlɔdzesi ɖeka nado kpo emevava. 18  “Ame sia ame si gbe srɔ̃a heɖe bubu la, ewɔ ahasi, eye ŋutsu si ɖe nyɔnu si srɔ̃a gbe la, ewɔ ahasi. 19  “Ke ŋutsu aɖe nye kesinɔtɔ, eye wòdoa aɖabɛwu kple aklalawu, eye wòɖua agbe blibaa tso ŋkeke yi ŋkeke. 20  Ke wokɔa nubiala aɖe si ŋkɔe nye Lazaro la, va dana ɖe eƒe agbo nu, eye abiwo yɔ eŋuti fũu, 21  eye wòdina be yeaɖu nu siwo le dudum tso kesinɔtɔ la ƒe kplɔ̃ dzi, aɖi ƒo. Ɛ̃, avuwo hã vana heɖuɖɔa eƒe abiawo me. 22  Ke eva dzɔ be nubiala la ku, eye mawudɔlawo kɔe yi Abraham ƒe akɔnu. “Eye kesinɔtɔ la hã ku, eye woɖii. 23  Eye esi wònɔ Hades* la, ewu eƒe mo dzi esime wònɔ fu kpem vevie, eye wòkpɔ Abraham ɖa ʋĩi, eye Lazaro le eƒe akɔnu. 24  Eya ta eyɔ gblɔ be: ‘Fofo Abraham, kpɔ nublanui nam, eye dɔ Lazaro ɖa be wòatsɔ eƒe asibide nu atɔ tsi me ava ge ɖe aɖe dzi nam, elabena mele veve sem helĩhelĩ le dzobibi gã sia me.’ 25  Gake Abraham gblɔ be: ‘Vinye, ɖo ŋku edzi be èxɔ wò nu nyuiwo katã le wò agbe me, gake Lazaro ya xɔ vɔ̃ɖiawo. Gake fifia la, eƒe dzi dze eme le afi sia, evɔ wò ya èle veve sem helĩhelĩ. 26  Eye gawu la, woɖe ʋe globo aɖe ɖe mía kple miawo dome, si wɔe be, ame siwo di be yewoatso afi sia ava mia gbɔ la mate ŋui o, eye ame aɖeke hã mate ŋu atso afi ma ava mía gbɔ o.’ 27  Azɔ egblɔ be: ‘Ne nenemae la, ekema fofo, mele biabiam be nàdɔe ɖe fofonye ƒe aƒe me, 28  elabena nɔviŋutsu atɔ̃ le asinye, bene wòaɖi ɖase na wo tsitotsito, bene woawo hã nagava fukpeƒe sia o.’ 29  Gake Abraham gblɔ be, ‘Mose kple Nyagblɔɖilawo le wo gbɔ; na woaɖo to woawo.’ 30  Eye wògblɔ be, ‘Gbeɖe, fofo Abraham, ne ame aɖe tso ame kukuwo dome yi wo gbɔ la, woatrɔ dzi me.’ 31  Gake egblɔ nɛ be, ‘Ne womeɖoa to Mose kple Nyagblɔɖilawo o la, ne ame aɖe fɔ tso ame kukuwo dome hã la, mate ŋu ana woatrɔ o.’”

Etenuŋɔŋlɔ

Baf ɖeka le lita 22.
Kɔr ɖeka le lita 220.
Kpɔ Nya Bubuwo, Akpa 8 lia.