Dzo kpo yi emenuwo dzi

Dzo kpo yi emenuawo dzi

Luka 14:1-35

14  Eye wòva eme be, esi wòyi Farisitɔwo ƒe kplɔlawo dometɔ aɖe ƒe aƒe me le sabat dzi be yeaɖu nu la, wonɔ ŋku lém ɖe eŋu vevie.  Eye kpɔ ɖa! Ame aɖe si le tetedɔ lém la nɔ eŋkume.  Eya ta Yesu gblɔ na ame siwo nya Sea nyuie la kple Farisitɔwo be: “Ðe se ɖe mɔ be woada dɔ na ame le sabat dzi loo alo se meɖe mɔ o?”  Ke wozi kpi. Tete wòlé amea, da dɔa nɛ hedo mɔe.  Eye wògblɔ na wo be: “Mia dometɔ kae li, si ne viaŋutsu alo eƒe nyitsu ge ɖe vudo me la, maɖee enumake le sabat ŋkeke dzi o?”  Eye womete ŋu gblɔ nya aɖeke tsɔ ɖo nya siawo ŋu nɛ o.  Esi wòkpɔ ale si ame kpekpeawo nɔ bubunɔƒewo tiam na wo ɖokuiwo la, ewɔ kpɔɖeŋu aɖe na wo, gblɔ na wo be:  “Ne ame aɖe kpe wò va srɔ̃ɖekplɔ̃ ŋu la, mègava nɔ bubunɔƒe gãtɔ kekeake o. Ðewohĩ ɣemaɣi la, ekpe ame aɖe si nye bubume wu wò la hã,  eye ame si kpe mia kple ame ma la ava gblɔ na wò be: ‘Tsɔ wò nɔƒe na ame sia.’ Ekema àtsɔ ŋukpe ayi aɖanɔ nɔƒe si bɔbɔ ɖe anyi wu. 10  Gake ne wokpe wò la, yi ɖanɔ anyi ɖe nɔƒe si bɔbɔ ɖe anyi wu, be ne ame si kpe wò la va la, ne wòagblɔ na wò be, ‘Xɔ̃nye, yi ɖanɔ nɔƒe si ŋu bubu le wu.’ Ekema anye bubu na wò le ame siwo hã wokpe kpe ɖe ŋuwò la katã ŋkume. 11  Elabena ame sia ame si doa eɖokui ɖe dzi la, woabɔbɔe ɖe anyi, eye ame si bɔbɔa eɖokui la, woadoe ɖe dzi.” 12  Azɔ egblɔ na ame si kpee la hã be: “Ne èɖo ŋdɔnuɖukplɔ̃ alo fiẽnuɖukplɔ̃ la, mègayɔ xɔ̃wòwo, alo nɔviwòwo, alo wò ƒometɔwo, alo aƒelika kesinɔtɔwo o. Ðewohĩ woawo hã woava kpe wò gbe ɖeka, eye ema azu eteƒeɖoɖo na wò. 13  Ke boŋ ne èɖo kplɔ̃ la, kpe ame dahewo, nuwɔametɔwo, atatututɔwo, ŋkuagbãtɔwo; 14  eye àkpɔ dzidzɔ, elabena naneke mele wo si woatsɔ aɖo eteƒe na wò o. Elabena woaɖo eteƒe na wò le ame dzɔdzɔewo ƒe tsitretsitsi la me.” 15  Esi ame siwo hã wokpe dometɔ ɖeka se nya siawo la, egblɔ nɛ be: “Dzidzɔtɔe nye ame si ɖua abolo le Mawu fiaɖuƒe la me.” 16  Yesu gblɔ nɛ be: “Ame aɖe ɖo fiẽnuɖukplɔ̃ gã aɖe, eye wòkpe ame geɖewo. 17  Eye wòdɔ eƒe kluvi ɖa le fiẽnuɖuɣia be wòagblɔ na ame kpekpeawo be: ‘Miva, elabena nuwo sɔ gbe vɔ.’ 18  Gake wo katã wote taflatsɛdodo le mɔ ɖeka tɔgbi nu. Ame gbãtɔ gblɔ nɛ be: ‘Meƒle agble aɖe, eye ele nam be mayi aɖakpɔe ɖa; meɖe kuku, nyemate ŋu ava o.’ 19  Eye ame bubu gblɔ be: ‘Meƒle nyi eveveve teƒe atɔ̃, eye meyina wo do ge kpɔ, meɖe kuku, nyemate ŋu ava o.’ 20  Ame bubu hã gblɔ be: ‘Meɖe nyɔnu koe nye esia, eye le susu sia ta nyemate ŋu ava o.’ 21  Eya ta kluvi la trɔ va hegblɔ nya siawo na eƒe aƒetɔ la. Tete aƒetɔ la do dɔmedzoe ŋutɔ, eye wògblɔ na eƒe kluvi la be, ‘Netsɔ, yi dua ƒe ablɔwo me kple kpɔdomewo, eye nàkplɔ ame dahewo, nuwɔametɔwo, ŋkuagbãtɔwo, kple atatututɔwo ava afii.’ 22  Le ɣeyiɣi aɖe megbe la, kluvi la gblɔ be: ‘Aƒetɔ, wowɔ nu si ƒe se nède la dzi, gake nɔƒe gali.’ 23  Eye aƒetɔ la gblɔ na kluvi la be: ‘Yi mɔwo dzi kple teƒe siwo ŋu wotɔ kpɔ ɖo, eye nàzi amewo dzi be woava eme, ale be nye aƒea me nayɔ. 24  Elabena mele egblɔm na mi be: Ame mawo, siwo mekpe hafi la, dometɔ aɖeke maɖɔ nye fiẽnuɖuɖu la kpɔ o.’” 25  Ke ameha gã aɖewo nɔ mɔa zɔm kplii, eye wòtrɔ gblɔ na wo be: 26  “Ne ame aɖe va gbɔnye, eye melé fu fofoa kple dadaa kple srɔ̃a kple viawo kple nɔviaŋutsuwo kple nɔvianyɔnuwo, ɛ̃, kple ye ŋutɔ ƒe luʋɔ kura gɔ̃ hã o la, mate ŋu anye nye nusrɔ̃la o. 27  Ame sia ame si metsɔa eƒe fuwɔameti hedzea yonyeme o la mate ŋu anye nye nusrɔ̃la o. 28  Le kpɔɖeŋu me, mia dometɔ kae li, eye ne ele didim be yeatu xɔ kɔkɔ aɖe la, manɔ anyi ahabu eŋu kɔnta gbã, akpɔ ɖa ne nu sɔ gbɔ ɖe esi be wòawu enu oa? 29  Ne menye nenema o la, ɖewohĩ aɖo egɔme anyi, gake mate ŋu awu enu o, eye ame siwo katã kpɔe la ate fewuɖuɖu le eŋu 30  agblɔ be, ‘Ame sia dze xɔtutu gɔme, gake mete ŋu wu enu o.’ 31  Alo fia kae li, si ne eyina aʋa kpe ge kple fia bubu la, manɔ anyi ade adaŋu gbã, ne ate ŋu atsɔ asrafo akpe ewo anɔ te ɖe ame si gbɔna kpekpe ge kplii la ƒe asrafo akpe blaeveawo nu oa? 32  Ne ekpɔe be yemate ŋu aɖu ame ma dzi o la, ekema ne ame kemɛa le adzɔge ʋĩi gbɔna la, adɔ eƒe amewo ɖa be woawɔ ŋutifafa kplii. 33  Eya ta mia dometɔ si magbe nu le eƒe nunɔamesiwo katã gbɔ o la mate ŋu anye nye nusrɔ̃la o. 34  “Nyateƒee wònye be nu nyui aɖee dze nye. Gake ne dze kura gɔ̃ hã bu eƒe ŋusẽ la, nu kae woatsɔ adee? 35  Menyo na anyigba alo na zazã abe aɖu ene hã o. Wotsɔnɛ ƒua gbe. Ame si to li na be wòasee la, nesee.”

Etenuŋɔŋlɔ