Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Luka 13:1-35

13  Ɣemaɣi tututu la, ame aɖewo nɔ afi ma siwo gblɔ Galileatɔ siwo ƒe ʋu Pilato tsɔ tsaka woƒe vɔsawoe la ŋu nya nɛ.  Eya ta eɖo eŋu na wo gblɔ be: “Ðe miesusu be Galileatɔ siawo nye nu vɔ̃ wɔlawo wu Galileatɔ bubuawo, le esi wokpe nu siawo ƒe fu taa?  Mele egblɔm na mi be menye nenemae kura o; gake ne mietrɔ dzi me o la, woatsrɔ̃ mi katã nenema ke.  Alo ame wuienyi ma, siwo dzi Siloa xɔ kɔkɔ la mu dze hewu wo la, ɖe miesusu be woawoe nye fenyilawo wu ame bubu siwo katã le Yerusalem laa?  Mele egblɔm na mi be menye nenemae kura o; gake ne mietrɔ dzi me o la, woatsrɔ̃ mi katã nenema ke.”  Azɔ ewɔ kpɔɖeŋu sia be: “Gboti aɖe si wodo la nɔ ame aɖe ƒe waingble me, eye wòva di kutsetse le edzi, gake mekpɔ ɖeke o.  Eye wògblɔ na waingbledela la be, ‘Ƒe etɔ̃ sɔŋ ye nye esia si meva dia kutsetse le gboti sia dzi, gake nyemekpɔa ɖeke le edzi o. Lãe ƒu anyi! Nu ka tae wòaxɔ anyigba ada ɖi dzodzro?’  Eɖo eŋu nɛ gblɔ be, ‘Aƒetɔ, na wòaganɔ anyi ƒe sia hã, ne maku do aƒo xlãe ado aɖu ɖe eŋu;  eye ne eva tse le etsɔ me la, enyo; gake ne mele nenema o la, nàlãe aƒu anyi.’” 10  Ke enɔ nu fiam le ƒuƒoƒeawo dometɔ ɖeka le sabat dzi. 11  Eye kpɔ ɖa! Nyɔnu aɖe si gbɔgbɔ aɖe na wònɔ dɔ lém ƒe wuienyie nye ema, eye wòxa gobaa, eye mete ŋu dzɔna ɖe tsitrenu kura o la, nɔ afi ma. 12  Esi Yesu kpɔe la, eyɔe hegblɔ nɛ be: “Nyɔnu, wotu wò tso wò dɔléle la me.” 13  Eye wòda eƒe asiwo ɖe edzi; eye enumake wòdzɔ kã, eye wòte Mawu dodo ɖe dzi. 14  Gake ƒuƒoƒea dzi kpɔla, si do dziku vevie elabena Yesu da dɔ na amea le sabat dzi la, te gbɔgblɔ na ameha la be: “Ŋkeke adee li be woawɔ dɔ le wo dzi; eya ta miva ne woada dɔ na mi le woawo dzi boŋ, ke menye le sabat ŋkeke la dzi o.” 15  Gake Aƒetɔ la ɖo eŋu nɛ gblɔ be: “Alakpanuwɔlawo, ɖe mia dometɔ ɖe sia ɖe meɖea ka eƒe nyitsu alo eƒe tedzi le kpo me, eye wòkplɔnɛ yina ɖanaa tsii oa? 16  Ekema ɖe ɣeyiɣi mede be woaɖe ka nyɔnu sia, si nye Abraham vinyɔnu, si Satana bla, kpɔ ɖa! ƒe wuienyi sɔŋ la, le sabat ŋkeke dzi oa?” 17  Esi wògblɔ nya siawo la, edze ŋukpe dzi na ame siwo tsi tsitre ɖe eŋu la katã; gake ameha bliboa ya de asi dzidzɔkpɔkpɔ me le ŋutikɔkɔedɔ siwo katã wòwɔ la ta. 18  Eya ta eyi edzi gblɔ be: “Nu kae Mawu fiaɖuƒe la ɖi, eye nu kae matsɔe asɔ kplii? 19  Ele abe atiku sue aɖe* si ame aɖe tsɔ da ɖe eƒe abɔ me la ene, eye wòtsi va zu ati, eye dziƒoxewo va mlɔa eƒe alɔwo dzi.” 20  Eye wògagblɔ be: “Nu kae matsɔ Mawu fiaɖuƒe la asɔ kplii? 21  Ele abe amɔwɔʋãnu si nyɔnu aɖe tsɔ de amɔwɔ dzidzenu gã teƒe etɔ̃ me, va se ɖe esime amɔwɔ bliboa ʋã la ene.” 22  Eye wòyi ɖato du me yi du me kple kɔƒe yi kɔƒe nɔ nu fiam, eye wònɔ mɔzɔzɔa dzi ɖo ta Yerusalem. 23  Ke ŋutsu aɖe gblɔ nɛ be: “Aƒetɔ, ame ʋɛ aɖewo koe akpɔ ɖeɖea?” Egblɔ na wo be: 24  “Miʋli sesĩe be miato ʋɔtru bii la nu age ɖe eme, elabena mele egblɔm na mi be: Ame geɖewo adi be yewoage ɖe eme, gake womate ŋui o, 25  ne aƒetɔa nya tso hetu ʋɔa vɔ, eye mietsi tsitre ɖe ʋɔtrua godo le ʋɔa ƒom hele gbɔgblɔm be, ‘Aƒetɔ, ʋui na mí.’ Ke boŋ aɖo eŋu agblɔ na mi be, ‘Nyemenya afi si mietso o.’ 26  Ekema miade asi gbɔgblɔ me be, ‘Míeɖu nu, eye míeno nu le ŋkuwòme, eye nèfia nu le míaƒe ablɔwo me.’ 27  Gake aƒo nu agblɔ na mi be: ‘Nyemenya afi si mietso o. Mite ɖa le gbɔnye, mi nu madzɔmadzɔ wɔlawo katã!’ 28  Afi mae miaƒe avifafa kple aɖukliɖuɖu anɔ, ne miekpɔ Abraham kple Isak kple Yakob kpakple nyagblɔɖilawo katã le Mawu fiaɖuƒe la me, gake wotsɔ miawo ya ƒu gbe ɖe xexe. 29  Gawu la, amewo atso ɣedzeƒe kple ɣetoɖoƒe, kpakple dziehe kple anyiehe, eye woabɔbɔ anɔ kplɔ̃ ŋu aɖu nu le Mawu fiaɖuƒe la me. 30  Eye kpɔ ɖa! Mlɔetɔ aɖewo li, siwo ava zu gbãtɔwo, eye gbãtɔ aɖewo li, siwo ava zu mlɔetɔwo.” 31  Le gaƒoƒo ma tututu dzi la, Farisitɔ aɖewo va gblɔ nɛ be: “Tso nàdzo le afi sia, elabena Herodes le didim be yeawu wò.” 32  Eye wògblɔ na wo be: “Miyi ɖagblɔ na abei ma be: ‘Kpɔ ɖa! Mele gbɔgbɔ vɔ̃wo nyam le go dom, eye mele dɔ dam egbe kple etsɔ, eye mawu nye dɔ la nu le ŋkeke etɔ̃agbe.’ 33  Ke hã, ele be mayi nye mɔzɔzɔa dzi egbe kple etsɔ kpakple ŋkeke si kplɔe ɖo, elabena womeɖe mɔ be woawu nyagblɔɖila le afi aɖeke o, negbe le Yerusalem ko. 34  Yerusalem, Yerusalem, nyagblɔɖilawo wula si ƒu kpe ame siwo wodɔ ɖo ɖe egbɔ—zi nenie medi be maƒo viwòwo nu ƒu abe ale si koklonɔ ƒoa viawo nu ƒu ɖe eƒe aʋalawo te ene, gake mielɔ̃ o! 35  Kpɔ ɖa, wogblẽ miaƒe aƒe la ɖi na mi! Mele egblɔm na mi be: Miegale kpɔ ye ge o, va se ɖe esime miagblɔ be, ‘Woayra ame si gbɔna le Yehowa ƒe ŋkɔ me!’”

Etenuŋɔŋlɔ

Helagbe, “sinapi.”