Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Filemon 1:1-25

 Paulo, ame si nye gamenɔla le Kristo Yesu ta, kple mía nɔvi Timoteo, le esia ŋlɔm na Filemon, míaƒe lɔlɔ̃tɔ kple hadɔwɔla,  kple mía nɔvinyɔnu Apia, kple mía hati asrafo Arxipo, kpakple hame si le aƒewò me:  Amenuveve kple ŋutifafa, si tso Mawu mía Fofo kple Aƒetɔ Yesu Kristo gbɔ la, nanɔ anyi kpli mi.  Medaa akpe na nye Mawu ɣesiaɣi ne meyɔ ŋkɔwò le nye gbedodoɖawo me,  esi meyi edzi le wò lɔlɔ̃ kple xɔse, si le asiwò ɖe Aƒetɔ Yesu kple ame kɔkɔewo katã ŋu la ŋuti nya sem ta;  bene wò xɔse, si me ame bubuwo kpɔa gome le la, nadze le nuwɔna me to ale si nàlɔ̃ ɖe edzi be nu nyui sia nu nyui si tso mía gbɔ la ku ɖe Kristo ŋu me.  Elabena nɔvi, mekpɔ dzidzɔ kple akɔfafa geɖe le wò lɔlɔ̃ ta, elabena dzo gaɖoa ame kɔkɔewo ƒe dzi me to dziwò.  Le susu sia tututu ta la, togbɔ be dzideƒo geɖe le asinye le Kristo ƒe ŋkɔ me be maɖe gbe na wò be nàwɔ nu si sɔ hã la,  mele nu xlɔ̃m wò le lɔlɔ̃ me boŋ, esi wònye nye ame tsitsi Paulo ye ta, ɛ̃, eye fifia hã menye gamenɔla le Kristo Yesu ta; 10  mele nu xlɔ̃m wò tso vinye, Onesimo, ame si mezu fofo na esime mele bablawo me le gaxɔ me ŋu, 11  ame si ŋu viɖe aɖeke menɔ na wò tsã o, gake fifia viɖe le eŋu na mía kpli wò siaa. 12  Megbugbɔ le ame sia tututu ɖom ɖe wò, ɛ̃, eya, si nye ame si nye ŋutɔ melɔ̃ vevie la. 13  Madi be mana wòanɔ gbɔnye, ale be wòayi edzi anɔ dɔ tsɔm nam le nye gaxɔ me babla, siwo me mele ɖe nya nyui la ta, me ɖe tewòƒe hafi. 14  Gake nyemedi be mawɔ naneke ne mèda asi ɖe edzi hafi o, bene nu nyui si nàwɔ la naganye le dzizizi ta o, ke boŋ wòanye esi wò ŋutɔ nèlɔ̃ faa be yeawɔ. 15  Ðewohĩ le nyateƒe me la, esia tae wòdzo hena ɣeyiɣi vi aɖe ɖo, bene wòagbugbɔ ava nɔ gbɔwò tegbee, 16  menye abe kluvi ene azɔ o, ke abe ame si wu kluvi ene boŋ, abe nɔvi lɔlɔ̃tɔ ene, vevietɔ na nye, ke hã, na wò ya wu, le ŋutilãmeƒomedodowo me kple Aƒetɔ la hã me. 17  Eya ta ne èbum wò hadɔwɔlae la, ekema xɔe dɔmenyotɔe abe ale si nàxɔm ene. 18  Gawu la, ne eda vo aɖe ɖe ŋuwò alo nyi nane ƒe fe le ŋuwò la, bui nam. 19  Nye Paulo ŋutɔe tsɔ nye asiwo le eŋlɔm: maɖo eteƒe . . . nyemedi be magblɔ na wò be ènyi ɖokuiwò gɔ̃ hã ƒe fe le ŋunye o. 20  Ɛ̃, nɔvi, na makpɔ viɖe tso ŋuwò le Aƒetɔ la ta: na dzo naɖo nye dzi me le Kristo me. 21  Esi meɖo ŋu ɖe wò toɖoɖo ŋu ta la, mele agbalẽ sia ŋlɔm na wò, eye menyae be àwɔ nu geɖe wu esiwo megblɔ kura gɔ̃ hã. 22  Gake hekpe ɖe ema ŋu la, dzra dzeƒe ɖo ɖi nam, elabena mele mɔ kpɔm be to miaƒe gbedodoɖawo me la, woana ablɔɖem le mia ta. 23  Epafra, hatinye gamenɔla le Kristo Yesu ta, do gbe na wò; 24  eye Marko, Aristarxo, Dema, Luka, hanyedɔwɔlawo, hã do gbe na wò. 25  Aƒetɔ Yesu Kristo ƒe amenuveve nanɔ anyi kple gbɔgbɔ si mieɖena fiana la.

Etenuŋɔŋlɔ