Romatɔwo 9:1-33

9  Nyateƒe tom mele le Kristo me; nyemele aʋatso kam o, elabena nye dzitsinya ɖia ɖase nam le gbɔgbɔ kɔkɔe me,  be mele nu xam vevie hele veve sem madzudzɔmadzudzɔe le nye dzi me.  Elabena ɖe madi be woaɖe nye ŋutɔ ɖa abe ame si woƒo fi de ene tso Kristo la ŋu le nɔvinyewo, ame siwo nye ƒonyemeawo le ŋutilã nu la ta hafi,  ame siwo nye Israel viwo, siwo tɔe nye vinyenye la kple ŋutikɔkɔe la kple nubablawo kple Se la tsɔtsɔ na kple subɔsubɔdɔ kɔkɔe kpakple ŋugbedodoawo;  ame siwo tɔ tɔgbuiawo nye, ame siwo me Kristo la do tso le ŋutilã nu: woakafu Mawu, ame si ƒo nuwo katã ta la, yi mavɔmavɔ me. Amen.  Ke hã, menye abe ɖe Mawu ƒe nya la do kpo nu ene o. Elabena menye ame siwo katã do tso Israel me lae nye “Israel” ŋutɔŋutɔ o.  Eye menye be esi wonye Abraham ƒe dzidzime ta la, wo katã wonye viwo o, hafi boŋ: “Nu si woayɔ be ‘wò dzidzime’ la ato Isak dzi.”  Egɔmee nye be, ŋutilãmeviwo menye Mawu ƒe viwo ŋutɔŋutɔ o, ke boŋ ŋugbedodo la ƒe viwoe wobuna dzidzime la.  Elabena ŋugbedodonya la yi ale: “Magava le ƒe si gbɔna ƒe ɣealewoɣi, eye viŋutsuvi anɔ Sara si.” 10  Ke hã, menye kpɔɖeŋu ma koe li o, ke esime Rebeka fɔ venɔviwo ƒe fu to ame ɖeka, si nye mía tɔgbui Isak, me la tɔ hã li: 11  elabena esime womekpɔ dzi wo o, eye womewɔ nyui alo vɔ̃ aɖeke haɖe o la, bene Mawu ƒe tameɖoɖo si ku ɖe tiatia la ŋu nayi edzi atso Ame si yɔa ame la gbɔ, ke menye tso dɔwɔwɔwo me o ta la, 12  wogblɔ nɛ be: “Xoxoetɔ anye kluvi na ɖevitɔ.” 13  Abe ale si woŋlɔe ɖi ene, be: “Melɔ̃ Yakob, gake Esau ya, melé fui.” 14  Ekema nya kae míagblɔ? Be madzɔmadzɔnyenye le Mawu gbɔa? Gbeɖe! 15  Elabena egblɔ na Mose be: “Makpɔ nublanui na ame si makpɔ nublanui na, eye nye dɔme atrɔ ɖe ame si ŋu nye dɔme atrɔ ɖo la ŋu.” 16  Eya ta metso ame si le didim alo ame si le du sim la ƒe lɔlɔ̃nu me o, ke boŋ etso Mawu, ame si kpɔa nublanui la, ƒe lɔlɔ̃nu me. 17  Elabena Ŋɔŋlɔ la gblɔ na Farao be: “Esia tututu tae meɖe mɔ nèkpɔtɔ li ɖo, bene maɖe nye ŋusẽ afia le gowòme, eye bene woaɖe gbeƒã nye ŋkɔ le anyigba blibo la katã dzi.” 18  Eya ta ekpɔa nublanui na ame si wòdi be yeakpɔe na, gake ame si ŋu wòdi be yeaɖe asi le wòasẽ dzi me la, eɖea asi le eŋu. 19  Eya ta àgblɔ nam be: “Ekema nu ka tae wògabua fɔ ame ɖo? Elabena ame kae tsi tsitre ɖe eƒe lɔlɔ̃nu si wòɖe gblɔ eme kɔ la ŋu kpɔ?” 20  Oo, ame, ekema ame kae nènye, be nàɖo nya ŋu na Mawu? Ðe nu si wome la agblɔ na ame si mee la be, “Nu ka tae nèwɔm alea?” 21  Nya ka gblɔm nèle? Ðe ŋusẽ mele zemela si ɖe tsu dzi, be wòatsɔ anyi si wònya la ƒe ɖe ame ze si woazã hena nu si ŋu bubu le, eye wòagatsɔ eƒe ɖe ame ze si woazã hena nu si ŋu bubu mele o la oa? 22  Eya ta ne Mawu di be yeaɖe yeƒe dɔmedzoe afia, eye yeana woanya yeƒe ŋusẽ, gake wòtsɔ dzigbɔgbɔ blewu ɖe mɔ ɖe dziku ƒe ze siwo le dzadzraɖoɖi na tsɔtsrɔ̃ la ŋu, 23  bene wòana woanya ŋutikɔkɔe ƒe agbɔsɔsɔ si le esi ɖe nublanuikpɔkpɔ ƒe ze, siwo wòdzra ɖo ɖi do ŋgɔ hena ŋutikɔkɔe la ŋu, 24  siwo nye míawo, ame siwo wòyɔ, menye tso Yudatɔwo ɖeɖe ko dome o, ke boŋ tso dukɔwo hã dome la, ekema nya kae míagblɔ tso eya ŋu? 25  Ele abe ale si wògblɔe le Hosea me hã ene, be: “Ame siwo menye nye dukɔ tsã o la, mayɔ wo be ‘nye dukɔ,’ eye ame si nyemelɔ̃ tsã o la be ‘lɔlɔ̃tɔ’; 26  eye le afi si wogblɔ na wo le be: ‘Menye nye dukɔe mienye o’ la, afi mae woayɔ wo le be ‘Mawu gbagbe la ƒe viwo.’” 27  Gawu la, Yesaya do ɣli ɖe Israel ŋuti be: “Togbɔ be Israel viwo ƒe xexlẽme anɔ abe ƒutake ene hã la, ame susɔeawoe woaɖe. 28  Elabena Yehowa abia akɔnta le anyigba dzi, eye ana wòatsɔ ahawu enu kaba.” 29  Eye abe ale si Yesaya gblɔe ɖi do ŋgɔ ene la: “Ne ɖe aʋakɔwo ƒe Mawu,* Yehowa, megblẽ dzidzime aɖeke ɖi na mí o la, anye ne míezu abe Sodom ene, eye anye ne wowɔ mí abe Gomora ene.” 30  Ekema nya kae míagblɔ? Eyae nye be, togbɔ be dukɔwo me tɔwo metiaa dzɔdzɔenyenye yome o hã la, woƒe asi su dzɔdzɔenyenye, si nye dzɔdzɔenyenye si tso xɔse me, la dzi; 31  gake Israel ya, togbɔ be enɔ dzɔdzɔenyenye ƒe se aɖe yome hã la, eƒe asi mesu se sia dzi o. 32  Nu ka tae? Elabena meti eyome to xɔse me o, ke boŋ abe to dɔwɔwɔwo me ene. Wokli “nukikli ƒe kpe” la; 33  abe ale si woŋlɔe ɖi ene be: “Kpɔ ɖa! Mele kpe si ana woakli nu kple agakpe si ana woadze anyi la ɖom anyi le Zion, gake ame si ziɔ eƒe xɔse ɖe eŋu la maɖu ŋukpe o.”

Etenuŋɔŋlɔ

Woyɔe le Helagbe me be Sa·ba·oth′, si sɔ kple nya “Zebaot” le Eʋegbe me.