Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Romatɔwo 8:1-39

8  Eya ta fɔbubu aɖeke meli na ame siwo le ƒomedodo me kple Kristo Yesu la o.  Elabena gbɔgbɔ ma si naa agbe le Kristo Yesu me la, ƒe se na ablɔɖe wò tso nu vɔ̃ kple ku ƒe se la me.  Elabena esi wònye ŋusẽ menɔ Se la ŋu o le esi wògbɔdzɔ to ŋutilã me ta la, Mawu to ale si wòdɔ ye ŋutɔ Via ɖa le nu vɔ̃ ŋutilã ƒe nɔnɔme me, ɖe nu vɔ̃ ta la, me bu fɔ nu vɔ̃ le ŋutilã me,  bene Se la ƒe nudidi dzɔdzɔe la nava eme le mí ame siwo le zɔzɔm, menye le ŋutilã la nu o, ke boŋ le gbɔgbɔ la nu, la gome.  Elabena ame siwo nɔa agbe ɖe ŋutilã la nu la, tsɔa woƒe susuwo ɖoa ŋutilã la ƒe nuwo ŋu, gake ame siwo nɔa agbe ɖe gbɔgbɔ la nu la, ɖe gbɔgbɔ la ƒe nuwo ŋu.  Elabena ŋutilã la ŋu bubu hea ku vanɛ, gake gbɔgbɔ la ŋu bubu hea agbe kple ŋutifafa vanɛ;  elabena ŋutilã la ŋu bubu fia Mawu ƒe futɔ nyenye, elabena ŋutilã la mebɔbɔna ɖe Mawu ƒe se la te o, eye le nyateƒe me la, mate ŋui hã o.  Eya ta ame siwo nɔa agbe ɖe ŋutilã nu la mate ŋu adze Mawu ŋu o.  Ke miawo la, ne Mawu ƒe gbɔgbɔ la le mia me ŋutɔŋutɔ la, ekema miele agbe ɖe ŋutilã la nu o, ke ɖe gbɔgbɔ la nu boŋ. Gake ne Kristo ƒe gbɔgbɔ la mele ame aɖe si o la, ame sia menye etɔ o. 10  Gake ne Kristo le ƒomedodo me kpli mi la, ekema ŋutilã la ku le nu vɔ̃ ta, gake gbɔgbɔ la nye agbe le dzɔdzɔenyenye ta. 11  Ke ne ame si fɔ Yesu tso ame kukuwo dome la ƒe gbɔgbɔ le mia me la, ekema ame si fɔ Kristo Yesu tso ame kukuwo dome la ana miaƒe ŋutilã siwo kuna la hã nagbɔ agbe to eƒe gbɔgbɔ si le mia me la dzi. 12  Eya ta nɔviwo, agba le mía dzi, menye le ŋutilã la gome be míanɔ agbe ɖe ŋutilã nu o; 13  elabena ne mienɔa agbe ɖe ŋutilã nu la, ekema miele kuku ge godoo; gake ne miewua ŋutilã ƒe dɔwɔwɔwo to gbɔgbɔ la dzi la, mianɔ agbe. 14  Elabena ame siwo katã Mawu ƒe gbɔgbɔ kplɔna la, ame siawoe nye Mawu ƒe viwo. 15  Elabena menye kluvinyenye ƒe gbɔgbɔ, si ana miaganɔ vɔvɔ̃m, ye miexɔ o, ke boŋ viwo zuzu ƒe gbɔgbɔ ye miexɔ, gbɔgbɔ si ʋãa mí míedoa ɣli be: “Abba,* Fofo!” 16  Gbɔgbɔ la ŋutɔ ɖia ɖase kpena ɖe míaƒe gbɔgbɔ ŋu be Mawu ƒe viwo míenye. 17  Ke ne viwoe míenye la, ekema domenyilawo hãe míenye: ɛ̃, Mawu ƒe domenyilawo, gake Kristo ƒe hati domenyilawo, ne míekpe fu kplii, bene woado mí ɖe dzi hã kplii. 18  Eya ta mebuna be, ɣeyiɣi sia me fukpekpewo meɖi naneke ne wotsɔe sɔ kple ŋutikɔkɔe si woava ɖe afia le mía me la o. 19  Elabena nuwɔwɔ la ƒe mɔkpɔkpɔ vevi la le Mawu ƒe viwo ƒe ɖeɖe fia la lalam. 20  Elabena wobɔbɔ nuwɔwɔ la ɖe toflokonyenye te, menye to ye ŋutɔ ƒe lɔlɔ̃nu me o, ke boŋ le ame si bɔbɔe ɖe anyi la ta, hena mɔkpɔkpɔ, 21  be woaɖe nuwɔwɔ la ŋutɔ hã tso gbegblẽ ƒe kluvinyenye la me, eye wòakpɔ Mawu ƒe viwo ƒe ablɔɖe si me ŋutikɔkɔe le la. 22  Elabena míenyae be nuwɔwɔ blibo la katã le ŋeŋem ɖekae, eye wòle veve sem ɖekae va se ɖe fifia. 23  Menye ema ɖeɖe koe o, ke boŋ mí ame siwo si kutsetse gbãtɔ, si nye gbɔgbɔ la, le ŋutɔ hã, ɛ̃, mía ŋutɔwo hã míele ŋeŋem le mía ɖokui me, esime míele lalam vevie be Mawu naxɔ mí míanye viawo, be woana ɖeɖe mí tso míaƒe ŋutilãwo me to tafe la dzi. 24  Elabena wona ɖeɖe mí le mɔkpɔkpɔ sia me; gake mɔkpɔkpɔ si wokpɔna la menye mɔkpɔkpɔ o, elabena ne ame aɖe le nane kpɔm la, ɖe wògakpɔa mɔ nɛa? 25  Gake ne míele mɔ kpɔm na nu si kpɔm míele o la, míetsɔa dzidodo yia edzi nɔa elalam. 26  Nenema kee gbɔgbɔ la hã kpena ɖe mía ŋu le míaƒe gbɔdzɔgbɔdzɔ me; elabena nu si wòle be míado gbe ɖa abia, abe ale si wòhiã be míawɔe ene la, míenyae o, gake gbɔgbɔ la ŋutɔ xɔa míaƒe ŋeŋe siwo míeɖe gblɔ o la, ɖe akɔ. 27  Ke hã, ame si dzroa dziwo me kpɔ la nya gbɔgbɔ la ƒe taɖodzinu, elabena exɔa ame kɔkɔewo ƒe nya ɖe akɔ le Mawu ƒe lɔlɔ̃nu nu. 28  Ke míenyae be Mawu naa eƒe nuwo katã wɔa dɔ aduadu hena ame siwo lɔ̃a Mawu la ƒe nyonyo, ame siwo nye ame yɔyɔwo le eƒe tameɖoɖo la nu; 29  elabena ame siwo ŋu wòtrɔ susu ɖo gbã la, eɖo wo ɖi hã do ŋgɔ be woanɔ ye Vi la ƒe nɔnɔme me, bene wòanye ŋgɔgbevi le nɔvi geɖewo dome. 30  Gawu la, ame siwo wòɖo ɖi do ŋgɔ la, woawo ke hãe wòyɔ; eye ame siwo wòyɔ la, woawo kee nye ame siwo wòbu ame dzɔdzɔewoe. Mlɔeba la, ame siwo wòbu ame dzɔdzɔewoe la, woawo kee wòdo ɖe dzi. 31  Ekema, nya kae míagblɔ na nu siawo? Ne Mawu le mía dzi ɖe, ame kae atsi tsitre ɖe mía ŋu? 32  Eya, ame si meve nu le ye ŋutɔ Via kura gɔ̃ hã ŋu o, ke boŋ wòtsɔe na ɖe mí katã ta la, nu ka tae malɔ̃ faa atsɔ nu bubuawo katã hã akpe ɖe eŋuti na mí o? 33  Ame kae atso Mawu ƒe ame tiatiawo nu? Mawu ye nye Ame si bua wo be wole dzɔdzɔe. 34  Ame kae abu fɔ? Kristo Yesu ye nye ame si ku, ɛ̃, míagblɔ boŋ be eyae nye ame si wofɔ tso ame kukuwo dome, ame si le Mawu ƒe ɖusi me, ame si hã xɔa míaƒe nya ɖe akɔ. 35  Ame kae ama mí ɖa tso Kristo la ƒe lɔlɔ̃ la gbɔ? Fukpekpe loo alo xaxa alo yometiti alo dɔwuame alo amamanɔnɔ alo afɔku alo yi yea? 36  Abe ale si woŋlɔe ɖi ene, be: “Wole mía wuwu dzi ŋkeke blibo la katã le tawò, wobu mí abe alẽ siwo woyina wuwu ge ene.” 37  Gake le nu siawo katã me la, míeɖua dzi bliboe to ame si lɔ̃ mí la dzi. 38  Elabena meka ɖe edzi bliboe be, ku alo agbe alo mawudɔlawo alo dziɖuɖuwo alo nu siwo li fifia alo nu siwo le vava ge alo ŋusẽwo 39  alo kɔkɔƒe alo gogloƒe alo nuwɔwɔ bubu aɖeke, mate ŋu ama mí ɖa tso Mawu ƒe lɔlɔ̃, si le Kristo Yesu, mía Aƒetɔ, me la gbɔ o.

Etenuŋɔŋlɔ