Romatɔwo 7:1-25

7  Nɔviwo, ɖe wòanye be mienyae oa, (elabena mi ame siwo nya se lae mele nu ƒom na,) be Se la ɖua aƒetɔ ɖe ame dzi zi ale si wòle agbe oa?  Le kpɔɖeŋu me, se bla nyɔnu srɔ̃tɔ ɖe srɔ̃a ŋu ŋkeke ale si ŋutsua le agbe; gake ne ŋutsua ku la, ekema wotu nyɔnua tso srɔ̃a ƒe se la me.  Eya ta ne srɔ̃a le agbe la, woayɔe be ahasiwɔla ne eva zu ŋutsu bubu tɔ. Gake ne srɔ̃a ku la, ekema evo tso ŋutsua ƒe se la me, si na be ne eva zu ŋutsu bubu tɔ la, menye ahasiwɔla o.  Eya ta nɔvinyewo, wona miawo hã miezu ame kukuwo le Se la gome to Kristo la ƒe ŋutilã me, ale be miazu ame bubu, si nye ame si wofɔ tso ame kukuwo dome, la tɔ, bene míatse ku na Mawu.  Elabena esi míenɔ agbe le ŋutilã nu la, nu vɔ̃ ƒe dzodzro sesẽ siwo Se la he ɖe go la nɔ dɔ dzi le míaƒe ŋutinuwo me, bene míatse ku na ku.  Gake azɔ la, wotu mí tso Se la me, elabena míeku na nu si wotsɔ lé mí ɖi sesĩe la, bene míazu kluviwo le gɔmesese yeye nu to gbɔgbɔ la me, eye menye le gɔmesese xoxo la nu to se si woŋlɔ ɖi la dzi o.  Ekema nya kae míagblɔ? Ðe Se la nye nu vɔ̃a? Gbeɖe! Le nyateƒe me la, ne menye Se lae o la, anye ne nyemenya nu si nu vɔ̃ nye o; le kpɔɖeŋu me, nyemanya nu si ŋubiabiã nye o, ne menye ɖe Se la gblɔ be: “Mele be nàbiã ŋu o.”  Gake esi nu vɔ̃ la kpɔ mɔnu to sedede la dzi ta la, ena ŋubiabiã ɖe sia ɖe ƒomevi va nyɔ ɖe menye, elabena ne se meli o la, ekema nu vɔ̃ ku.  Nyateƒee, menɔ agbe semanɔsitɔe tsã; gake esi sedede la va ɖo la, nu vɔ̃ gagbɔ agbe, gake nye ya meku. 10  Eye se si wode hena agbe la, nye ya mekpɔe be wodee hena ku. 11  Elabena esi nu vɔ̃ la kpɔ mɔnu to sedede la dzi ta la, eble nunye heto edzi wum. 12  Evɔ Se la le kɔkɔe, eye sedede la le kɔkɔe, le dzɔdzɔe, henyo hafi. 13  Ekema ɖe nu nyui la zu ku nama? Gbeɖe! Hafi nu vɔ̃ boŋ ye zui, bene wòadze ƒãa be, nu vɔ̃ toa nu nyui me hea ku vanɛ nam; ale be nu vɔ̃ la navɔ̃ɖi ɖe edzi wu to sedede la me. 14  Elabena míenyae be gbɔgbɔmenue Se la nye; gake ŋutilãmeme, si wodzra ɖe nu vɔ̃ te, ye nye ya menye. 15  Elabena nu si wɔm mele la, nyemenyae o. Elabena nu si medina la, menye eyae mewɔna o; hafi nu si melé fu la boŋ ye mewɔna. 16  Gake ne nu si nyemedina o lae mewɔna la, ekema melɔ̃ ɖe edzi be Se la nyo. 17  Ke meganye nyee le ewɔm o, ke boŋ nu vɔ̃ si le menye lae. 18  Elabena menyae be le menye—egɔmee nye: le nye ŋutilã me—la, nu nyui aɖeke meli o; elabena didi ƒe ŋutete le menye, gake nu si nyo wɔwɔ ƒe ŋutete ya meli o. 19  Elabena nu nyui, si medina la, nyemewɔnɛ o, gake nu vɔ̃ɖi, si nyemedina o la, eya boŋ mewɔna. 20  Ke ne nu si nyemedina o lae mewɔna la, ekema meganye nyee le ewɔm o, ke boŋ nu vɔ̃ si le menye lae. 21  Eya ta mekpɔ se sia le gonyeme: ne medi be mawɔ nu si sɔ la, nu vɔ̃ɖi boŋ nɔa menye. 22  Mekpɔa dzidzɔ le Mawu ƒe se la ŋu ŋutɔ le ame si menye le ememe la gome, 23  gake mekpɔ se bubu aɖe le nye ŋutinuwo me, si le aʋa wɔm kple nye susu ƒe se, eye wòléam aboyoe yina na nu vɔ̃ ƒe se, si le nye ŋutinuwo me. 24  Oo, nye nublanuitɔ! Ame kae aɖem tso ŋutilã sia si ana maku la si me? 25  Akpe na Mawu to Yesu Kristo, mía Aƒetɔ, la dzi! Eya ta le nye susu me la, menye kluvi na Mawu ƒe se la, gake le nye ŋutilã me la, na nu vɔ̃ ƒe se la.

Etenuŋɔŋlɔ