Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Internet Dzi Biblia | ŊƆŊLƆ KƆKƆEAWO—XEXE YEYE GƆMEƉEƉE (ƑE 1984 TƆ) Kpɔ esi me wogbugbɔ to le ƒe 2013 me

Romatɔwo 5:1-21

5  Eya ta fifia si wobu mí ame dzɔdzɔewo le xɔse ta la, mina míanɔ ŋutifafa me kple Mawu to mía Aƒetɔ Yesu Kristo dzi,  ame si hã dzi míeto kpɔ mɔnu le amenuveve sia si me míele tsitre ɖo fifia ŋu to xɔse me; eye mina míatso aseye le mɔkpɔkpɔ na Mawu ƒe ŋutikɔkɔe la ta.  Eye menye ema ɖeɖe ko o, ke mina míatso aseye le xaxawo me hã, esi míenyae be xaxa hea dzidodo vanɛ ta;  dzidodo hã hea ŋudzedzekpɔkpɔɖeameŋu vanɛ; ŋudzedzekpɔkpɔɖeameŋu hã hea mɔkpɔkpɔ vanɛ,  eye mɔkpɔkpɔ la menana ame ɖua ŋukpe o; elabena wotrɔ Mawu ƒe lɔlɔ̃ la kɔ ɖe míaƒe dziwo me to gbɔgbɔ kɔkɔe, si wona mí la dzi.  Elabena le nyateƒe me la, esime míeganye gbɔdzɔgbɔdzɔtɔwo la, Kristo ku ɖe ame mavɔ̃mawuwo ta le ɣeyiɣi ɖoɖi la dzi.  Elabena bebli hafi ame aɖe aku ɖe ame dzɔdzɔe ta; ɛ̃, ame nyui ya la, ɖewohĩ ame aɖe ado dzi aku ɖe eta.  Gake Mawu ɖe ye ŋutɔ ƒe lɔlɔ̃ na mí fia le esia me be, esime míeganye nu vɔ̃ wɔlawo la, Kristo ku ɖe mía ta.  Eya ta esi wobu mí ame dzɔdzɔewo azɔ to eƒe ʋua dzi ta la, woaɖe mí tso dziku la me geɖe wu to eyama dzi. 10  Elabena ne woto Via ƒe ku me dzra mía kple Mawu dome ɖo esime míenye eƒe futɔwo la, ekema azɔ si wova dzra mía kplii dome ɖo la, woaɖe mí geɖe wu to eƒe agbe la me. 11  Eye menye ema ɖeɖe ko o, ke míele aseye tsom hã le Mawu me to mía Aƒetɔ Yesu Kristo dzi, ame si dzi woto dzra mía dome ɖo azɔ. 12  Esia tae ale si ko to ame ɖeka dzi nu vɔ̃ ge ɖe xexea me, eye to nu vɔ̃ me ku la va, eye ale ku la kaka ɖe amewo katã dome, esi wo katã wɔ nu vɔ̃ ŋuti la . . . 13  Elabena va se ɖe esime Se la va la, nu vɔ̃ le xexea me, gake wometsoa ame aɖeke nu be ewɔ nu vɔ̃ ne se aɖeke meli o. 14  Gake ku ɖu fia tso Adam dzi va se ɖe Mose dzi, ɖe ame siwo mewɔ nu vɔ̃ si sɔ kple Adam ƒe sedzidadaa o la gɔ̃ hã dzi, eya si ɖi ame si ava va la. 15  Gake nunanaa faa ya tɔ mele abe ale si vodada la tɔ nɔ ene o. Elabena ne ame ɖeka ƒe vodadae na ame geɖewo ku la, Mawu ƒe amenuveve la kple eƒe nunana faa kpakple amenuveve si to ame ɖeka, si nye Yesu Kristo dzi la, sɔ gbɔ fũu na ame geɖewo. 16  Eye nunana faa la tɔ mele abe ale si nuwo yi edzi le ame ɖeka ma, si wɔ nu vɔ̃ la, tɔ gome ene o. Elabena ʋɔnudɔdrɔ̃ si tso vodada ɖeka me la he fɔbubu vae, gake nunana si tso vodada geɖe me la na wobu amewo be wole dzɔdzɔe. 17  Elabena ne ame ɖeka ƒe vodada mee ku to ɖu fia to ame ma dzi la, ekema ame siwo xɔ amenuveve la kple dzɔdzɔenyenye ƒe nunana faa le agbɔsɔsɔ me la anɔ agbe ahaɖu fia geɖe wu to ame ɖeka, si nye Yesu Kristo dzi. 18  Eya ta esi wònye vodada ɖekae he fɔbubu vae na ame ƒomeviwo katã ta la, nenema kee nuwɔna dzɔdzɔe ɖekae na wobu ame ƒomeviwo katã be wole dzɔdzɔe hena agbekpɔkpɔ. 19  Elabena ale si ko ame ɖeka ƒe tomaɖomaɖo na ame geɖewo zu nu vɔ̃ wɔlawo la, nenema kee to ame ɖeka ƒe toɖoɖo me hã woana ame geɖewo nazu ame dzɔdzɔewo. 20  Azɔ Se la hã va nɔ exa, bene vodada nasɔ gbɔ ɖe edzi. Gake afi si nu vɔ̃ sɔ gbɔ le la, afi mae amenuveve la hã sɔa gbɔ geɖe wu le. 21  Kple susu ka? Bene ale si ko nu vɔ̃ kple ku ɖu fiae la, amenuveve la hã naɖu fia nenema ke to dzɔdzɔenyenye me hena agbe mavɔ kpɔkpɔ, to mía Aƒetɔ Yesu Kristo dzi.

Etenuŋɔŋlɔ